ក្រុងរ៉ូម៖ បុរសអ៊ីតាលីម្នាក់ដែលចង់បានវិញ្ញាបនបត្រវ៉ាក់សាំងកូវីដខ្លាំងពេក តែមិនព្រមចាក់វ៉ាក់សាំងពិតប្រាកដ បានព្យាយាមលេងល្បិចលាត់ដៃក្លែងក្លាយឱ្យបុគ្គលិកសុខាភិបាលចាក់វ៉ាក់សាំង។ នេះបើយោងតាមមន្ដ្រីម្នាក់បាននិយាយកាលពីថ្ងៃសុក្រ។
ទោះជាមានពណ៌សម្បុរដូចស្បែកធម្មជាតិមែនតែគ្មាននរណាភ្លើ ដល់ថ្នាក់មើលមិនដឹងថា ជាស្បែកស៊ីលីកូននោះទេ ហើយបុរសវ័យខ្ទង់ ៥០ឆ្នាំរូបនេះ ត្រូវបានគេរាយការណ៍ប្រាប់ប៉ូលិសមូលដ្ឋានពេលជួបហេតុការណ៍នេះកាលពីរាត្រីថ្ងៃព្រហស្បតិ៍នៅក្រុង Biella ភាគពាយព្យប្រទេសអ៊ីតាលី។
ប្រមុខរដ្ឋាភិបាលប្រចាំតំបន់ Piedmont លោក អាល់ប៊ើត ស៊ីរីយ៉ូ បានឱ្យដឹងក្នុងសេចក្ដីថ្លែងការណ៍លើហ្វេសប៊ុកថា៖ «ករណីនេះពិតជាគួរឱ្យចង់សើចខ្លាំងណាស់ បើវាមិនធ្ងន់ធ្ងរទេនោះ»។
លោកបានបន្ដថា៖ «ករណីនេះមិនអាចអត់ឱនឱ្យបានទេ ដោយសារតែសហគមន៍ទាំងមូលពិតជាបានលះបង់ខ្លាំងណាស់ចំពោះការប្រយុទ្ធប្រឆាំងនឹងជំងឺឆ្លងមួយនេះ ទាំងការស្រោចស្រង់ជីវិតមនុស្ស ការចំណាយរបស់សង្គម និងសេដ្ឋកិច្ចជាតិ»។
រឿងរ៉ាវដៃចាក់វ៉ាក់សាំងក្លែងក្លាយនេះ បានកើតឡើងមុនពេលច្បាប់រឹតបន្ដឹងរបស់អ៊ីតាលីចូលជាធរមាននៅថ្ងៃចន្ទនេះសម្រាប់អ្នកដែលមិនបានចាក់វ៉ាក់សាំងប្រឆាំងជំងឺកូវីដ១៩។
តាំងពីខែសីហា ការបង្ហាញ «បណ្ណបៃតង» ឬ (Green Pass) បញ្ជាក់ពីការបានចាក់វ៉ាក់សាំង ឬទើបជាសះស្បើយពីជំងឺកូវីដ ឬតេស្ដអវិជ្ជមាន ត្រូវបានអនុញ្ញាតសម្រាប់ការចូលក្នុងបរិវេណអគារបិទជិត ដូចជា ភោជនីយដ្ឋាន សារមន្ទីរ រោងភាពយន្ត សាលមហោស្រព និងចូលរួមព្រឹត្ដិការណ៍កីឡានានា។
ប៉ុន្ដែចាប់ពីថ្ងៃទី៦ ខែធ្នូមក សកម្មភាពទាំងនេះនឹងត្រូវបានរឹតបន្ដឹងចំពោះអ្នកកាន់បណ្ណពណ៌បៃតងដិត ឬ «Super Green Pass» ដែលត្រូវបានចេញឱ្យសម្រាប់តែអ្នកបានចាក់វ៉ាក់សាំង ឬទើបជាសះស្បើយពីជំងឺកូវីដប៉ុណ្ណោះ។
បណ្ណបៃតងស៊េរីចាស់ត្រូវបានពន្យារឱ្យប្រើត្រឹមខែតុលានៅតាមទីកន្លែងការងារ និងបន្ដមានសុពលភាពសម្រាប់មូលហេតុការងារប៉ុណ្ណោះ ដែលមានន័យថា អ្នកអត់ទាន់ចាក់វ៉ាក់សាំងអាចទៅធ្វើការធម្មតាបាន ដោយគ្រាន់តែបង្ហាញលទ្ធផលតេស្ដអវិជ្ជមាន។
ការរឹតបន្ដឹងថ្មី ដែលបង្កឱ្យមានការតវ៉ារប៉េះរប៉ោះនៅតាមទីប្រជុំជន ទូទាំងប្រទេសអ៊ីតាលីនាចុងសប្ដាហ៍ថ្មីៗនេះ ត្រូវបានដាក់ឱ្យអនុវត្ដក្រោយមានករណីឆ្លងកើនឡើង ក៏ដូចជាក្ដីបារម្ភនៃវីរុសបំប្លែងខ្លួន អូមីក្រុង។
អ៊ីតាលីគឺជាប្រទេសនៅអឺរ៉ុបដំបូងគេ ដែលរងការផ្ទុះជំងឺកូវីដនៅដើមឆ្នាំ២០២០ តែបច្ចុប្បន្ន ស្ថានភាពបានធូរស្រាលច្រើនជាងបណ្ដាប្រទេសភូមិផងជិតគ្នា។ កាលពីថ្ងៃព្រហស្បតិ៍ អ៊ីតាលី មានការឆ្លងថ្មី ១៦៨០០ករណីក្នុងរយៈពេល ២៤ម៉ោង និងអ្នកស្លាប់ ៧២នាក់។
ចំនួនប្រជាជនចាក់វ៉ាក់សាំងអាយុ ១២ឆ្នាំ៨៥នាក់បានទទួលវ៉ាក់សាំងគ្រប់ដូស ហើយសប្ដាហ៍នេះពលរដ្ឋពេញវ័យត្រូវបានលើកទឹកចិត្ដឱ្យមកទទួលដូសជំរុញថែមទៀត៕ AFP/HR