.jpg)
លោក អ៊ិន សុភិន អគ្គនាយកក្រុមហ៊ុនមហាហង្ស ដែលរៀបចំការប្រកួត Miss Grand Cambodia ពេលទទួលដំណើរវិលវិញរបស់ Miss Grand Cambodia 2021។ រូប ហ្វេសប៊ុក
ភ្នំពេញៈ កញ្ញា ប៉ូគឹមថេង សុធីតា កំពុងតែបានបំបែកកំណត់ត្រាថ្មីមួយទៀត ក្នុងពិភពប្រកួតប្រជែងសម្រស់កញ្ញាឯកដ៏អស្ចារ្យអន្តរជាតិ Miss Grand International ដោយស្រីស្រស់ជាតំណាងឱ្យកម្ពុជា ឆ្នាំ ២០២១ បានពានសម្រាប់ជ័យជម្នះមួយប្រសើរជាងឆ្នាំមុន គឺជាប់ដល់វគ្គ Top10 ខណៈកាលពីឆ្នាំ ២០២០ កម្ពុជាបានឈានដល់វគ្គ Top20 នោះ។
ស្រីស្រស់វ័យ ២៣ ឆ្នាំ ជាម្ចាស់មកុដកញ្ញាឯកដ៏អស្ចារ្យនៃកម្ពុជា ឆ្នាំ ២០២១ កញ្ញា ប៉ូគឹមថេង សុធីតា ទទួលបានប្រជាប្រិយភាពខ្លាំងជាងគេ សម្រាប់បេក្ខភាពជាប់វគ្គកំពូលទាំង ១០ រូប (Top10 Miss Grand International 2021) ក្នុងការប្រកួតផ្តាច់ព្រ័ត្រនៃការប្រកួតកញ្ញាឯកដ៏អស្ចារ្យអន្តរជាតិឆ្នាំ ២០២១ ដែលរៀបចំ នៅកោះភូកេត ប្រទេសថៃ និងបានបញ្ចប់ការប្រកួតកាលពីថ្ងៃទី ៤ ខែ ធ្នូ ឆ្នាំ ២០២១ កន្លងមក។
ខណៈពេលវិលត្រឡប់មកពីការបំពេញនូវភារកិច្ចដ៏ល្អ នៅក្នុងការប្រកួត Grand International 2021 កាលពីថ្ងៃទី ៥ ខែធ្នូ កញ្ញា ប៉ូគឹមថេង សុធីតា ទទួលបានការស្វាគមន៍យ៉ាងខ្លាំងពីបងប្អូនខ្មែរ ដែលនិយមគាំទ្រលើពិភពកញ្ញាឯកនេះ និងមានភាពកក់ក្តៅផងដែរ ដោយមានវត្តមានអគ្គនាយកនៃក្រុមហ៊ុនមហាហង្ស ដែលរៀបចំការប្រកួត Miss Grand Cambodia គឺលោក អ៊ិន សុភិន បានទៅទទួលដោយផ្ទាល់នៅឯព្រលានយន្តហោះអន្តរជាតិភ្នំពេញ។
គួរបញ្ជាក់ដែរថា កញ្ញា ប៉ូគឹមថេង សុធីតា ស្ថិតនៅលើលេខរៀងទី១ នៃការបេក្ខភាពប្រកួតបោះឆ្នោត ដើម្បីរកប្រជាប្រិយភាពជាងគេទាំង ១០ រូប នៃកម្មវិធីប្រកួត Miss Grand International 2021 វគ្គផ្តាច់ព្រ័ត្រ ដោយប្រទេសកម្ពុជា បានទទួលពានមួយឈ្មោះថា ពាន Popular Vote of Top10 Miss Grand International 2021។ ចំណែកឯលទ្ធផលនៃការប្រកួតផ្តាច់ព្រ័ត្រវិញ ជយលាភីទាំង ៥ រូបនៃការប្រកួតកញ្ញាឯកដ៏អស្ចារ្យអន្តរជាតិឆ្នាំ ២០២១ (Miss Grand International 2021) គឺម្ចាស់មកុដកញ្ញាឯកប្រចាំឆ្នាំ ២០២១ (លេខ ១) បានទៅលើកញ្ញាមកពីប្រទេសវៀតណាម លេខ ២ (1st Runner up) បានទៅប្រទេសអេក្វាទ័រ លេខ ៣ (2nd Runner up) បានប្រទេសប្រេស៊ីល លេខ ៤ (3rd Runner up) បានទៅប្រទេសព័រតូរីកូ និងលេខ៥ (4th Runner up) បានទៅលើប្រទេសអាហ្វ្រិកខាងត្បូង។
កញ្ញា សុធីតា ទទួលបានការស្វាគមន៍ខ្លាំងពីអ្នកគាំទ្រពេលត្រឡប់វិញ។ រូប ហ្វេសប៊ុក
កញ្ញា ប៉ូគឹមថេង សុធីតា ក៏បានសម្តែងពីចំណាប់អារម្មណ៍ដ៏រំភើប សម្រាប់សមិទ្ធផល ដែលខ្លួនទើបទទួលបានពីការខិតខំ គឺជាពាន Top10 ជាលើកដំបូង ក្នុងពិភព Miss Grand Cambodia ដែរថា៖ «ពាន Top10 នេះ មិនត្រឹមតែជាមោទនភាព និងជ័យជម្នះសម្រាប់តែរូបនាងខ្ញុំប៉ុណ្ណោះទេ គឺជាជោគជ័យសម្រាប់បងប្អូនខ្មែរទាំងអស់ និងប្រទេសកម្ពុជា ទាំងមូលតែម្តង»។
បើគិតត្រឹមថ្ងៃទី ២ ខែ ធ្នូ ឆ្នាំ ២០២១ បេក្ខភាពជាតំណាងឱ្យកម្ពុជា ស្រីស្អាតជារាជិនីសម្រស់កម្ពុជា បានជាប់ការបោះឆ្នោត Top5 Miss Popular Vote នៃកម្មវិធី។ ដោយកញ្ញា ប៉ូគឹមថេង សុធីតា ឈរលេខ ៣ បន្ទាប់ពីកញ្ញាឯកតំណាងប្រទេសអេហ្ស៊ីប ឈរលេខ ១ និងអាហ្វ្រិកខាងត្បូង ឈរលេខ ២ ខណៈម៉ាឡេស៊ី ឈរលេខ ៤ និងវៀតណាម ឈរលេខ ៥។
នេះបើតាមផេចផ្លូវការនៃកញ្ញាឯកដ៏អស្ចារ្យនៃកម្ពុជាបង្ហើរនាថ្ងៃទី ២ ខែធ្នូថា៖ «កម្ពុជាយើងបានធ្លាក់មកលេខ ៣ នៃ Top 5 Miss Popular Vote ដើម្បីទៅ Top 10 វគ្គផ្ដាច់ព្រ័ត្រកម្មវិធី Miss Grand international 2021។ មុននេះបន្ដិច Admin ក៏បាន Vote អស់ $១ ០០០ រួចហើយ។ admin នឹងសម្រុក Vote បន្ដទៀតរហូតដល់ថ្ងៃ Final។ មូលហេតុមិនទាន់សម្រុក Vote ខ្លាំង ព្រោះថាប្រទេសដែលបុក Vote ខ្លាំងៗដូចជា Malaysia និងវៀតណាម ភាគច្រើនគេសម្រុកនៅចុងម៉ោង»៕
វីដេអូ៖
