ភ្នំពេញ: ផ្ដើមពីវេលាដ៏លំបាកអំឡុងពេលកម្ពុជាកំពុងប្រយុទ្ធប្រឆាំងនឹងការរីករាលដាលនៃជំងឺកូវីដ ដែលគ្រាមុនចំនួនអ្នកឆ្លងប្រចាំថ្ងៃជិត ១ ពាន់នាក់ វាមិនត្រឹមតែជះឥទ្ធិពលដល់ការរស់រានរបស់ពលរដ្ឋប៉ុណ្ណោះទេ ប៉ុន្ដែវាថែមទាំងបានបង្អាក់លទ្ធភាពជួយដល់កុមារកម្ពុជាដែលផ្ទុកជំងឺកាចសាហាវផងដែរ។
រូបភាពមុខវត្ដឧណ្ណាលោម ជាមួយសំណេរភាសាសរសេរថា «ខែសីហា រាជធានីភ្នំពេញ» ទូរទស្សន៍អន្ដរជាតិ NHK World បានផ្សព្វផ្សាយបេសកកម្មមនុស្សធម៌ក្នុងការសង្គ្រោះជីវិតកុមារកម្ពុជាផ្ទុកជំងឺមហារីកពីសំណាក់បុរសជនជាតិជប៉ុនម្នាក់ ក្រោមចំណងជើងថា «សង្គ្រោះជីវិតកុមារនៅជប៉ុន» ទៅកាន់ពិភពលោកនៅថ្ងៃទី ១ និងទី ២ ធ្នូ ឆ្នាំ ២០២១។
វេជ្ជបណ្ឌិត យូស៊ីអូកា ហ៊ីដេតុ ជាគ្រូពេទ្យវះកាត់កុមារ បាននិយាយនៅក្នុងវីដេអូទូរទស្សន៍ NHK World រយៈពេល ២៨ នាទីនៃកម្មវិធី Side by Side ថា៖ «ជប៉ុនមានមន្ទីរកុមារមួយក្នុងចំណោមប្រជាជន ១ លាននាក់។ តែនៅកម្ពុជា វិទ្យាស្ថានជំនាញបែបនេះកាន់តែកម្រខ្លាំងថែមទៀត។ កុមារជាច្រើនបានស្លាប់ដោយសារកង្វះការព្យាបាល និងលុយកាក់»។
លោកបានបន្ថែមថា៖ «ខ្ញុំចង់ឱ្យមជ្ឈមណ្ឌលរបស់យើងរីកធំជាងនេះ ដើម្បីទទួលការព្យាបាលកុមារកាន់តែច្រើន និងបង្កើតស្ដង់ដាសម្រាប់ការព្យាបាលអ្នកជំងឺ»។
យ៉ាងណាមិញ វិបត្ដិកូវីដ បានបង្កការលំបាកកាន់តែខ្លាំងចំពោះសកម្ម-ភាពជួយសង្គ្រោះកុមារ ជាពិសេស ការធ្វើដំណើររបស់អ្នកឯកទេសជំងឺមហារីកមកពីប្រទេសជប៉ុន និងការបញ្ជូនកុមារមហារីកទៅទទួលការព្យាបាលនៅមន្ទីរពេទ្យជប៉ុនផ្ទាល់។
លោកវេជ្ជបណ្ឌិត ដែលបានបង្កើតអង្គការបេះដូងដំបូងចេញពីប្រទេសមីយ៉ាន់ម៉ា អំឡុងទសវត្សរ៍ឆ្នាំ ១៩៩០ រូបនេះ បានបន្ដក្នុងវីដេអូថា៖ «ការវះកាត់ប្រកបដោយភាពស្មុគស្មាញត្រូវបានធ្វើឡើងពីសំណាក់ក្រុមការងារនៃមន្ទីរពេទ្យសាកលវិទ្យាល័យជប៉ុនរៀងរាល់ខែ។ ឥឡូវនេះ សកម្មភាពទាំងនេះ ត្រូវបានផ្អាក ពីព្រោះពួកគាត់មានការងារធ្វើ។ ដូច្នេះ ការធ្វើចត្ដាឡីស័ក ២សប្ដាហ៍ក្នុងប្រទេសទាំងសងខាង មែនហើយ! វាពិតជាលំបាក តែគ្មានជម្រើសឡើយ»។
លោក ហ៊ីដេតុ បាននិយាយមុនពេលទូរទស្សន៍អន្ដរជាតិជប៉ុនមួយនេះបង្វែរកាមេរ៉ាទៅផ្ដោតលើកុមារីតូចកើតមហារីកម្នាក់ ដែលកំពុងទទួលការវះកាត់ដ៏សំខាន់មួយថា៖ «បើខ្ញុំមិនមកទីនេះ កុមារទាំងអស់នេះនឹងមិនមានសង្ឃឹមឡើយ។ នេះគឺជាការស្លាប់រស់របស់កុមារនៅកម្ពុជា»។
នៅក្នុងវីដេអូនោះក៏បានរៀបរាប់អំពីដំណើរដើមទងនៃការបង្កើតអង្គការេបះដូងជប៉ុន និងមជ្ឈមណ្ឌលព្យាបាលកុមារ បេះដូងជប៉ុន ក្នុងឆ្នាំ ២០១៨ ក្នុងមន្ទីរពេទ្យបង្អែកពញាឮនៃខេត្ដកណ្ដាល ជាទីដែលលោកវេជ្ជបណ្ឌិតប្រើជំនាញរបស់ខ្លួនវះកាត់កុមារមហារីកជាច្រើននាក់ផងដែរ។
ក្រៅពីបេសកកម្មព្យាបាលកុមារមហារីក មជ្ឈមណ្ឌលក៏បានបណ្ដុះបណ្ដាលវេជ្ជបណ្ឌិតជំនាញក្នុងស្រុក ដែលលោក ហ៊ីដេតុ ចង់ឱ្យពួកគេអាចធ្វើការវះកាត់កុមារមហារីករហូតដល់ ៩០ ភាគរយ។
លោកបានឱ្យដឹងថា៖ «យើងមានផែនការរយៈពេល ១០ ឆ្នាំ ដើម្បីបង្កើតក្រុមការងារមួយ ដែលអាចដោះស្រាយការវះកាត់ ៩០ ភាគរយ។ ឥឡូវយើងត្រូវបង្កើនល្បឿនផែនការបន្ថែមទៀត។ តើមាននរណាដឹងថា ពេលណានឹងមានវិបត្ដិជំងឺសកលមកបន្ដទៀត? ក៏ប្រហែលជាអាចមានសង្គ្រាម ហើយការហោះហើរលើអាកាសត្រូវបានបញ្ឈប់ទាំងស្រុង។ ការបណ្ដុះបណ្ដាលគ្រូពេទ្យ ត្រូវតែធ្វើឡើងឱ្យបានឆាប់បំផុត»។
NHK World ក៏បានបង្ហាញពីប្រវត្ដិ និងសកម្មភាពរបស់វេជ្ជបណ្ឌិតក្នុងស្រុកម្នាក់ឈ្មោះ ហោ ប៊ីស៊ីផាន ដែលលោកមានបំណងចូលរួមបេសកកម្មជាមួយលោកវេជ្ជបណ្ឌិតជប៉ុន និងបង្កើនជំនាញរបស់ខ្លួនកាន់តែខ្លាំង។
វេជ្ជបណ្ឌិត កាកាហ្ស៊ុ ម៉ារីកុ ប្រធានផ្នែកជំងឺកុមារ បានផ្ដល់បទសម្ភាសថា៖ «ពួកគេចង់ការពារប្រជាជនរបស់ពួកគេដោយខ្លួនឯង។ វិបត្ដិកូវីដបានជះឥទ្ធិពលអាក្រក់ណាស់ទៅហើយ តែវាបានធ្វើឱ្យពួកគេ [ក្រុមគ្រូពេទ្យកម្ពុជា] កាន់តែមានការតាំងចិត្ដខ្ពស់ថែមទៀត។ ខ្ញុំចង់ឱ្យលោក ប៊ីស៊ីផាន ក្លាយជាវេជ្ជបណ្ឌិតកម្ពុជាដឹកនាំមន្ទីរពេទ្យនេះ។ ខ្ញុំចង់ឱ្យមជ្ឈមណ្ឌលព្យាបាលជំងឺកុមារ បេះដូង ក្លាយជាមន្ទីរពេទ្យលោក ប៊ីស៊ីផាន និងជាទីកន្លែងសម្រាប់អ្នកជំនាញវ័យក្មេងមកទទួលការបណ្ដុះបណ្ដាល»។
លោកវេជ្ជបណ្ឌិតវ័យក្មេង ហោ ប៊ីស៊ីផាន បាននិយាយថា៖ «នាពេលអនាគត ខ្ញុំចង់ក្លាយជាវេជ្ជបណ្ឌិតវះកាត់កុមារម្នាក់ដ៏ល្អ ជាពិសេស ជួយកុមារតូចៗ ដែលត្រូវការការវះកាត់ និងការយកចិត្ដទុកដាក់»។
ដោយសារវិធានការសុខាភិបាលកម្ពុជាត្រូវបានបន្ធូរបន្ថយ ដែលអ្នកដំណើរចាក់វ៉ាក់សាំងពីបរទេសមិនចាំបាច់ធ្វើចត្ដាឡីស័កទៀត លទ្ធភាពសម្រាប់គ្រូពេទ្យជំនាញបន្ដកិច្ចការសង្គ្រោះកុមារកម្ពុជាទៀត។
យោងតាមអ្នកនាង រ៉េមី ហូរីកាវ៉ា ជាបុគ្គលិកផ្នែកទំនាក់ទំនងរបស់អង្គការបេះដូងជប៉ុន បានប្រាប់ ភ្នំពេញ ប៉ុស្ដិ៍ថា៖ «លោកវេជ្ជបណ្ឌិត យូស៊ីអូកា នឹងមកកាន់កម្ពុជាពីប្រទេសជប៉ុន ដើម្បីធ្វើការវះកាត់កុមារបន្ថែមទៀតនាសប្ដាហ៍ក្រោយ។ លោកនឹងអាចស្នាក់នៅយូរជាងគម្រោងដោយសារតែការដែលមិនចាំបាច់ធ្វើចត្ដាឡីស័ក»។
ទស្សនាវីដេអូពីបេសកកម្មអង្គការបេះដូងជប៉ុនតាមតំណភ្ជាប់ https://www3.nhk.or.jp/nhkworld/en/ondemand/video/2037082/៕