ភ្នំពេញៈ ទើបតែបានជួយលើកទឹកចិត្ត និងគាំទ្រដល់បេក្ខនារីជាកញ្ញាឯកតំណាងឱ្យកម្ពុជា ក្នុងការប្រកួតអន្តរជាតិ Miss Grand International 2021 នៅប្រទេសថៃ រំលងទៅថ្មីៗ ស្រាប់តែតារាចម្រៀងស្រីល្បី ពេជ្រ សោភា ក៏ងាកមកខំខ្នះខ្នែងស្វែងរកការគាំទ្រពីសំណាក់បងប្អូនខ្មែរ ដើម្បីជួយដល់តំណាងកញ្ញាឯកចក្កវាឡកម្ពុជា ក្នុងការប្រកួតអន្តរជាតិ Miss Universe 2021 នៅអ៊ីស្រាអែលវិញម្តង។
ដោយមានចំណែកចូលរួមជួយឧបត្ថម្ភប្រាក់ជួយដល់សំឡេងបោះឆ្នោតគាំទ្រពីសំណាក់តារាចម្រៀងស្រី ពេជ្រ សោភា ផងដែរនោះ រាជិនីសម្រស់កម្ពុជា ក្នុងការប្រកួតអន្តរជាតិ Miss Grand International 2021 នៅថៃកញ្ញា ប៉ូគឹមថេង សុធីតា វ័យ២៣ ឆ្នាំ បានវិលមកមាតុប្រទេសវិញ នាំលទ្ធផលពាន Top10 ផ្នែក Popular Vote។ យ៉ាងណាមិញ ការប្រកួតអន្តរជាតិ Miss Universe 2021 ដែលរៀបចំនៅទីក្រុងអេឡាត (Eilat) ប្រទេសអ៊ីស្រាអែល នឹងចាប់ផ្តើមការប្រកួតថ្ងៃទី ១២ ខែធ្នូ នាចុងសប្តាហ៍នេះ ហើយតារាចម្រៀងស្រីល្បី នៅហង្សមាស ពេជ្រ សោភា ក៏ចង់ឱ្យកម្ពុជាទទួលលទ្ធផលល្អកម្រិតណាមួយផងដែរ តាមសំឡេងបោះឆ្នោតជួយគាំទ្រពីបងប្អូនខ្មែរ។ ការប្រកួតឆ្នាំនេះ មានតំណាងរាជិនីសម្រស់កញ្ញាឯកចក្កវាឡកម្ពុជា ឆ្នាំ២០២១ កញ្ញា ងិន ម៉ារ៉ាឌី ហៅ ងិន រ៉ូហ្សា មានវ័យ ២២ ឆ្នាំ។
អ្នកនាង ពេជ្រ សោភា បង្ហើរសារតាមហ្វេសប៊ុកកាលពីថ្ងៃម្សិលមិញថា៖ «នេះជាលុយ ដែលខាងខ្ញុំទទួលបានពីបងប្អូនយប់មិញសម្រាប់ Vote (បោះឆ្នោត) ជូន Miss Universe Cambodia យើង បងប្អូនអាចបន្ត Vote (បោះឆ្នោត) ជូនគាត់បានតាមរយៈ App Miss Universe ឬក៏អាចផ្ញើតាមរយៈនាងខ្ញុំក៏បាន។ ABA (001884812) Than Kimsan សម្រាប់បងៗណាដែលគាត់ផ្ញើហើយគាត់អាចថតស្គ្រីន (Screen Shot) ដាក់ចូលខមមិន (Comment) បាន»។
កញ្ញា ងិន ម៉ារ៉ាឌី ហៅ រ៉ូហ្សា បានត្រៀមខ្លួនយ៉ាងល្អ ដើម្បីចេញដំណើរធ្វើជាតំណាងឱ្យកម្ពុជាក្នុងការប្រកួតកញ្ញាឯកចក្កវាឡពិភពលោក ឆ្នាំ ២០២១ លើកទី៧០ នៅទីក្រុងអេឡាត (Eilat) ប្រទេសអ៊ីស្រាអែល ដោយមានបេក្ខភាពចូលរួមប្រកួតចំនួន ៨០ ប្រទេស។
កញ្ញា រ៉ូហ្សា មានកម្ពស់ ១,៦៥ ម៉ែត្រ វ័យ ២២ ឆ្នាំ កើតនៅភ្នំពេញ គឺជាបេក្ខភាព ១ រូប របស់កម្ពុជា ដែលបានដាក់ពាក្យចូលរួមការប្រកួតកញ្ញាឯកចក្កវាឡកម្ពុជា ឆ្នាំ ២០២១ ក្រោយពីបានត្រៀមខ្លួនរយៈពេល ១ ឆ្នាំមក។
កញ្ញា រ៉ូហ្សា មានដើមទុនអាជីពដំបូង ជាតារាម៉ូដែល និងបទពិសោធ ការងារសង្គមសិល្បៈ រយៈពេល ៦ ឆ្នាំ គួបផ្សំរូបសម្ផស្ស សមត្ថភាព និងទេពកោសល្យនោះ ទើបបានជំរុញឱ្យទឹកចិត្តស្រីស្អាតរាងតូចច្រឡឹង មានសុទិដ្ឋិនិយមខ្លាំង និងបានគ្រងតំណែងកញ្ញាឯកចក្កវាឡកម្ពុជាប្រចាំឆ្នាំ ២០២១៕