The Phnom Penh Post Search

Search form




Logo of Phnom Penh Post newspaper Phnom Penh Post - រូបសំណាកបុរាណ​វិល​ត្រឡប់​មកកាន់​​អារាម​នេ​ប៉ាល់​​វិញ​ បន្ទាប់ពីបាត់​​​រាប់​ទសវត្សរ៍​​​ទៅ​នៅ​​សហរដ្ឋអាមេរិក

រូបសំណាកបុរាណ​វិល​ត្រឡប់​មកកាន់​​អារាម​នេ​ប៉ាល់​​វិញ​ បន្ទាប់ពីបាត់​​​រាប់​ទសវត្សរ៍​​​ទៅ​នៅ​​សហរដ្ឋអាមេរិក

Content image - Phnom Penh Post
ប្រជាជន​គោរព​រូបសំណាក​ព្រះ ដែល​ត្រូវបានប្រគល់ត្រឡប់មក​អារាម​នេប៉ាល់វិញ ពីសហរដ្ឋអាមេរិក។ AFP

រូបសំណាកបុរាណ​វិល​ត្រឡប់​មកកាន់​​អារាម​នេ​ប៉ាល់​​វិញ​ បន្ទាប់ពីបាត់​​​រាប់​ទសវត្សរ៍​​​ទៅ​នៅ​​សហរដ្ឋអាមេរិក

ក្រុង​កាត្មាន់ឌូ៖ រូបចម្លាក់​ដែលមាន​អាយុកាល​រាប់​សតវត្ស​រ៍​នៃ​ព្រះ​ហិណ្ឌូ​ចំនួន២ ត្រូវបាន​ដំឡើង​ឡើងវិញ​នៅ​អារាម​មាតុភូមិ​ ​ក្នុង​រដ្ឋធានីកាត្មាន់ឌូ​ប្រទេស​នេ​ប៉ាល់​កាលពី​ថ្ងៃ​សៅរ៍។ នេះជារយៈពេល​ជិត៤០​ឆ្នាំ​បន្ទាប់ពីចម្លាក់​ត្រូវបាន​លួចហើយ​ក្រោយមក​បាន​លេច​វត្តមាន​​ឡើង​នៅក្នុង​សហរដ្ឋអាមេរិក។

រូបសំណាក​ថ្ម​របស់​ព្រះនាងលក្ម្សី និងព្រះ​នរាយណ៍ ត្រូវបាន​បញ្ជូន​ត្រឡប់​ទៅកាន់​ប្រទេស​នេ​ប៉ាល់​ដោយសារ មន្ទីរសិល្បៈ​ដាឡាស់ និង FBI បន្ទាប់ពី​ការស៊ើបអង្កេត​អស់​រយៈពេល​ជាច្រើន​ខែ​ដោយ​សកម្មជននិង​មន្ត្រី​អាមេរិកនិង​នេ​ប៉ាល់។

រូបសំណាក​បុរាណ​ត្រូវបាន​គេ​លួច​យក​ពី​ប្រាសាទ​ក្នុង​ឆ្នាំ១៩៨៤ហើយ​វាស្រាប់តែ​បាន​បង្ហាញខ្លួន​នៅ​សារមន្ទីរក្រុង​ដាឡាស ៦​ឆ្នាំ​ក្រោយមកដោយ​ខ្ចីប្រាក់​ពី​អ្នកប្រមូលវត្ថុ​សិល្បៈ​បុរាណ។

ស្នាដៃ​រូបសំណាក​នេះ​មាន​អាយុកាល​ចន្លោះ​ពី​សតវត្សរ៍​ទី១២និង​ទី១៥ហើយ​វាគឺជា​​វត្ថុ​បុរាណ​វប្បធម៌​ ១ក្តាប់​តូច​ដែល​បាន​ប្រគល់ជូន​ប្រទេស​នេ​ប៉ាល់​ពីសារ​មន្ទីរ​បរទេសនិង​អ្នកប្រមូលទិញ​​នៅ​ឆ្នាំនេះ។

អាចារ្យ​សូត្រធម៌និង​អ្នកស្រុក​លេងភ្លេង​ប្រពៃណីខណៈ​រូបសំណាក​នេះ​ត្រូវបាន​ដង្ហែ​ទៅកាន់​ព្រះវិហារដែល​ត្រូវបាន​ប្រក់​ដោយ​កម្រងផ្កា​និង​ផ្កាភ្ញីរុក្ខជាតិ​ ​ដើម្បី​ស្វាគមន៍​ការមកដល់។

រូបសំណាក​ត្រូវបាន​គេ​យកមក​ដាក់​នៅលើ​ខឿន​​ថ្ម​ដើម​របស់​វាដោយរូប​សំណាក​​​ចម្លង​ដែល​អ្នកស្រុក​បាន​គោរពបូជា​ជំនួស​វិញ​ត្រូវបាន​រំកិល​​ផ្លាស់​ទៅ​ឈរ​ក្បែរចម្លាក់ដើម​។

Content image - Phnom Penh Post
ក្បួនដង្ហែ​ស្វាគមន៍​​រូបសំណាក​ព្រះ ដែល​ត្រូវបានប្រគល់ត្រឡប់មក​អារាម​នេប៉ាល់វិញ ពីសហរដ្ឋអាមេរិក។ AFP

លោក Dilendra Raj Shrestha នៃ​យុទ្ធនា​ការស្តារ​បេតិកភណ្ឌ​នេ​ប៉ាល់​បាន​និយាយថា៖ «យើង​សប្បាយចិត្ត​ខ្លាំងណាស់ការខិតខំ​ប្រឹងប្រែងរ​បស់​យើង​ក្នុង​រយៈពេល​ពី៣ ទៅ ៤ឆ្នាំ​បានទទួល​ផ្លែផ្កាហើយ​គ្រប់គ្នា​កំពុង​ប្រារព្ធ​ពិធីដ៏អស្ចារ្យ​នេះ​»។

លោក​បាន​បន្ថែមថាឧបករណ៍​ចាប់​សញ្ញា​ឡាស៊ែរនិង​កាមេរ៉ា CCTV ឥឡូវនេះ​ត្រូវបាន​ដំឡើង​នៅក្នុង​ប្រាសាទ​ដើម្បី​ការពារ​រូបសំណាកពី​ការ​ប៉ុនប៉ង​លួច។

ឯកអគ្គរដ្ឋទូត​សហរដ្ឋអាមេរិក​ប្រចាំ​ប្រទេស​នេ​ប៉ាល់ Randy Berry បាន​និយាយថា៖ «យើង​កំពុង​មើលឃើញ​ការចាប់ផ្តើម​នៃ​និន្នាការ​មួយដើម្បី​នាំយក​ព្រះ​របស់​នេ​ប៉ាល់​មកវិញ​ពី​សហរដ្ឋអាមេរិកពី​អឺរ៉ុបពី​ប្រទេស​ផ្សេងទៀត​មក​កាន់​ប្រទេសដើម​​កំណើត​»។

លោក​បន្ត​ថា៖ «ខ្ញុំ​សង្ឃឹមថា​នេះ​ជា​លើកដំបូង​នៃ​ការ​ប្រារព្ធ​ពិធី​បែបនេះ»​។

ប្រទេស​នេ​ប៉ាល់​មានជំនឿ​​សាសនា​យ៉ាង​ជ្រាលជ្រៅហើយ​ប្រាសាទ​ហិណ្ឌូនិង​ពុទ្ធសាសនាព្រមទាំង​កន្លែង​បេតិកភណ្ឌ​នៅតែ​ជា​ផ្នែក​សំខាន់​​នៃ​ជីវិត​ប្រចាំថ្ងៃ​​របស់ប្រជាជន។

ប៉ុន្តែ​ទីតាំង​ជាច្រើន​ត្រូវបាន​បោះបង់ចោល​នូវ​រូបចម្លាក់និង​ផ្ទាំងគំនូរ​ដែលមាន​អាយុកាល​រាប់​សតវត្សរ៍​មកហើយរួមទាំង​បង្អួច​​ឈើ​មានគ្រឿងលម្អនិង​សូម្បីតែ​ទ្វារដែលជារឿយៗត្រូវបាន​គេ​លួច​បន្ទាប់ពី​ប្រទេស​នេះ​បាន​បើកទូលាយ​ដល់​ពិភព​ខាងក្រៅ​ក្នុង​ទសវត្សរ៍​ឆ្នាំ១៩៥០។

សាស្ត្រាចារ្យ Erin L. Thompson បាន​និយាយថា៖ ខ្ញុំ​គិតថា​មានការ​ផ្លាស់ប្តូរ​ជាស​កល...ប្រទេស​ជាច្រើន​កំពុង​ទាមទារ​វត្ថុ​បុរាណ​របស់​ពួកគេ​មកវិញ»។

វត្ថុបុរាណ​ចំនួន៦ ត្រូវបាន​ប្រគល់ជូន​ប្រទេស​នេ​ប៉ាល់​ក្នុងឆ្នាំនេះហើយ​អាជ្ញាធរ​កំពុង​ស្វែងរក​បន្ថែមទៀត​ពី​ប្រទេស​​បារាំងសហរដ្ឋអាមេរិកនិង​ចក្រភព​អង់គ្លេស៕ AFP

Content image - Phnom Penh Post
រូបសំណាក​​ត្រូវបាន​បញ្ជូន​ត្រឡប់​ទៅកាន់​ប្រទេស​នេ​ប៉ាល់​ ដោយសារមន្ទីរសិល្បៈ​ដាឡាស់។ AFP

អត្ថបទគួរចាប់អារម្មណ៍