.jpg)
សិល្បករ ២៧ នាក់ ទាំងកុមារ និងមនុស្សចាស់ នៅសាលសម្ដែងនៃមជ្ឈមណ្ឌលវប្បធម៌ និងវិទ្យាសាស្ត្ររុស្ស៊ី។ រូបថត សហការី
ភ្នំពេញ: មជ្ឈមណ្ឌលវប្បធម៌ និងវិទ្យាសាស្ត្ររុស្ស៊ី (RCSC) ប្រចាំរាជធានីភ្នំពេញ កាលពីថ្ងៃសុក្រកន្លងទៅនេះបានរៀបចំការសម្ដែងល្ខោនរឿង Dostoevsky and We ដើម្បីឧទ្ទិសដល់ខួបលើកទី ២០០ នៃអ្នកនិពន្ធរុស្ស៊ី Fyodor Mikhailovich Dostoevsky និងចូលរួមអបអរការសម្រេចចិត្តរបស់ថ្នាក់ដឹកនាំកម្ពុជាក្នុងការបើកប្រទេស រួមទាំងពិធីបុណ្យ ការតាំងពិព័រណ៍ និងការសម្តែងល្ខោន ជាគ្រឹះដ៏សំខាន់នៃជីវិតវប្បធម៌។
Dostoevsky and We ជាល្ខោននិយាយ អមដោយតន្ត្រី ការរាំ ច្រៀង និងវីដេអូ រយៈពេល ៧៥ នាទី។
ល្ខោននិយាយនេះបង្កើតឡើងតាមរយៈសាច់រឿង The Village of Stepanchikovo and its inhabitants របស់អ្នកនិពន្ធរុស្ស៊ី Dostoevsky អំពីម្ចាស់ដីចិត្តល្អ Nastasya ដែលមានក្មួយប្រុសបញ្ចប់ការសិក្សាពីសាកលវិទ្យាល័យ St. Petersburg មកលេង។ លោក Foma ដែលសោយរាជ្យនៅក្នុងផ្ទះ Nastasya តែងតែធ្វើបាបសមាជិកគ្រប់គ្នាក្នុងផ្ទះ គ្មានអ្នកណាអាចប្រឆាំងនឹងគាត់បានឡើយ។ តែជម្លោះធ្ងន់ធ្ងរ ដែលកើតឡើងត្រូវបានដោះស្រាយដោយមិននឹកស្មានដល់។
លោក Vitaly Smyshlyaev អ្នកសរសេរបារ៉ូលជនជាតិរុស្ស៊ីបានឱ្យដឹងពីជោគជ័យនៃកម្មវិធី និងភាពរីករាយ ដែលក្រុមរបស់លោកបានសម្ដែងនៅលើឆាក បន្ទាប់ពីអាក់ខានជិត ១ ឆ្នាំ ដោយសារកូវីដ។
និស្សិតខ្មែរចូលរួមបង្កើតការសម្ដែងជាឃ្លីបវីដេអូផ្ញើពីរុស្ស៊ីមកវិញ។ រូបថត សហការី
លោកបានប្រាប់ ភ្នំពេញ ប៉ុស្ដិ៍ ថា៖ «បើទោះជាវាជាល្ងាចថ្ងៃសុក្រ ចុងសប្ដាហ៍ ចរាចរណ៍មមាញឹក យើងរំភើបចិត្តណាស់ ដែលមានភ្ញៀវជាង ១៤០ នាក់មកចូលរួម។ ប្រតិកម្មរបស់ទស្សនិកជនអំឡុងពេល និងក្រោយការសម្តែងបង្ហាញពីភាពកក់ក្តៅ និងគាំទ្រ ដែលធ្វើឱ្យអ្នកសម្ដែងរបស់យើង ដែលមិនមែនជាអ្នកជំនាញអី មានកម្លាំងចិត្ត និងភាពធូរស្រាលក្នុងការសម្ដែង និងច្រៀង»។
លើសពីនោះ អ្នកចូលរួមជាច្រើនបានសម្ដែងភាពរីករាយ កោតសរសើរចំពោះការសម្ដែងទៅកាន់ប្រធានមជ្ឈមណ្ឌល RCSC អ្នកនាង Irina Tsatsulina និងអ្នកសម្ដែងទាំងអស់មានទាំងការសូមថតរូបជុំគ្នាដោយទឹកមុខរីករាយទៀតផង។
លោកក៏បានឱ្យដឹងពីហេតុផល ដែលលោកដាក់ឈ្មោះសាច់រឿង Dostoevsky and We ដែលថា៖ «Dostoevsky បានសរសេរសៀវភៅកាលពី ១៥០ ឆ្នាំមុន ប៉ុន្តែសំណួរទាំងអស់ដែលគាត់បានដាក់នៅក្នុងប្រលោមលោករបស់គាត់ នៅតែមានជាប់ទាក់ទងមកដល់ជីវិតផ្ទាល់ខ្លួន និងសង្គមរបស់យើងសព្វថ្ងៃនេះ»។
ក្នុងការជ្រើសរើសសាច់រឿងនេះ មកសម្ដែងក្នុងឱកាសនេះ លោក Vitaly បញ្ជាក់ថា អ្នកនិពន្ធ Dostoevsky បានរងទុក្ខជាច្រើនក្នុងជីវិត ប៉ុន្តែនៅក្នុងសៀវភៅរបស់គាត់តែងតែមានចន្លោះសម្រាប់ក្តីសង្ឃឹម និងជំនឿនាពេលអនាគត។
សិល្បករសម្ដែងល្ខោនដើម្បីឧទ្ទិសដល់អ្នកនិពន្ធជនជាតិរុស្ស៊ី។ រូបថត សហការី
ដូចនេះ វាជាឱកាសដ៏ល្អមួយ ដើម្បីរំឭកដល់ប្រជាពលរដ្ឋអំពីការបើកប្រទេសកម្ពុជាក្រោយជំងឺកូវីដ ១៩។
លោកបន្តទៀតថា ពួកគាត់បានបញ្ចូលវីដេអូជាច្រើននៅក្នុងផលិតកម្ម ពីព្រោះវីដេអូ គឺជាផ្នែកសំខាន់មួយនៃវប្បធម៌យុវវ័យនាពេលបច្ចុប្បន្ននេះ។
លោកបានឱ្យដឹងថា៖ «យើងក៏សង្ឃឹមថា ការសម្ដែងរបស់យើងនឹងជំរុញយុវជនឱ្យអានសៀវភៅ។ យ៉ាងហោចណាស់អ្នកចូលរួមនៅក្នុងផលិតកម្មបានងាកទៅរកសៀវភៅរបស់ Dostoevsky ផងដែរ»។
សិល្បករសម្ដែងសរុបមានចំនួន ២៧ នាក់ទាំងមនុស្សពេញវ័យ សិស្សសាលាមធ្យម និងបឋមសិក្សា។ សិល្បករ ១៤ នាក់ត្រូវបានចូលរួមដោយផ្ទាល់ ហើយ ១៣ នាក់មកពីរុស្ស៊ី កាហ្សាក់ស្ថាន និងកម្ពុជា បានរៀបចំជាវីដេអូឃ្លីប។
របៀបវារៈ សាច់រឿងសង្ខេបរបស់រឿងមានជាភាសាអង់គ្លេស និងខ្មែរ ដោយមានអ្នកចែកជូនទស្សនិកជននៅច្រកចូលនៃសាលសម្ដែង។
លោក Vitaly ជាអ្នករៀបចំកម្មវិធីនៅសហគមន៍សិល្បៈ Phnom Paint ថា៖ «ខ្ញុំគិតថា សាច់រឿង និងកម្មវិធីទាំងមូល ត្រូវបានយល់យ៉ាងច្បាស់ពីទស្សនិកជនគ្រប់រូប ព្រោះយើងបានបង្កើតនូវសិល្បៈចម្រុះ ដែលមានទាំង សោកនាដកម្ម កំប្លែង វីដេអូ ការរាំ តន្ត្រី និងល្ខោននិយាយ ហើយសាច់រឿងផ្ទាល់ស្ដីអំពីទំនាក់ទំនងគ្រួសារ ដែលផ្សារភ្ជាប់ទៅគ្រប់គ្នា មិនថាជាតិសាសន៍ណាមួយ»។
ល្ខោននិយាយ អមតន្ត្រី រាំ ច្រៀង និងវីដេអូ មានរយៈពេល ៧៥ នាទី។ រូបថត សហការី
អ្នកនិពន្ធរុស្ស៊ី Dostoevsky បានចំណាយពេលច្រើននៅអាស៊ី ហើយគំនិតចម្បងរបស់លោកគឺនាំយកវប្បធម៌អឺរ៉ុប និងអាស៊ីឱ្យកាន់តែជិតស្និទ្ធនឹងគ្នា។ ជាក់ស្ដែង ភាគច្រើននៅក្នុងវប្បធម៌លោកខាងលិច តែងតែមានសាច់រឿង ដែលតួអង្គចូលជាមួយក្រុមល្អ ដើម្បីតទល់នឹងអាក្រក់។
ប៉ុន្តែឥទ្ធិពលនៃវប្បធម៌អាស៊ីលើការងាររបស់ Dostoevsky ត្រូវបានបង្ហាញក្នុងវីដេអូមួយដោយនិស្សិត-ខ្មែរ ដែលកំពុងសិក្សានៅប្រទេសរុស្ស៊ី ហើយសាររបស់លោក Dostoevsky គឺ «ភាពស្រស់ស្អាតនឹងជួយពិភពលោក» ដែលនេះវាផ្សារភ្ជាប់ជាមួយពុទ្ធភាសិតមួយថា «ពៀររមែងរំងាប់ដោយការមិនចងពៀរ»។
មជ្ឈមណ្ឌល RCSC និងអ្នកស្ម័គ្រចិត្តមកពីសហគមន៍សិល្បៈ Phnom Paint បានធ្វើការងាររៀបចំយ៉ាងច្រើន ដើម្បីរៀបចំកម្មវិធីនេះឡើង។ ជាអកុសល មុនការសម្ដែងផ្ទាល់ ១០ ថ្ងៃ សិល្បករមួយចំនួនដែលជានិស្សិតខ្មែរត្រូវត្រឡប់ទៅបន្តការសិក្សានៅរុស្ស៊ីវិញ ធ្វើឱ្យចុងក្រោយពួកគេសម្រេចចិត្តបង្កើតការសម្ដែងជាឃ្លីបវីដេអូផ្ញើពីនាយសមុទ្រមកវិញ។
ប្រៀបធៀបទៅនឹងការសម្ដែងឆ្នាំមុន លោកថា៖ «វាពិបាកបន្តិចដែរក្នុងការជំរុញចិត្តឱ្យសិល្បករហ្វឹកហាត់ឡើងវិញ ឯទស្សនិកជនក៏ស្ទើរតែបាត់បង់ទម្លាប់នៃការចូលរួមជួបជុំក្នុងកម្មវិធីនានា។ ប៉ុន្តែ ជារួមគឺវាមិនអាក្រក់ពេកទេ ពេលកៅអីនៅតែពេញក្នុងរោងសម្ដែង»។
លោក Vitaly បានបញ្ចប់ដោយឱ្យទស្សនិកជនរង់ចាំនូវកម្មវិធីជាបន្តបន្ទាប់ទៀត ព្រោះឆាប់ៗនេះមជ្ឈមណ្ឌល RCSC នឹងមានការអញ្ជើញ កុមាររុស្ស៊ី និងខ្មែរមកចូលរួមសម្ដែងរឿងនិទានក្នុងឱកាសចូលឆ្នាំសកល បន្ថែមពីនោះក៏មានគម្រោងផលិតខ្សែភាពយន្តពីសាច់រឿង Dostoevsky and We ផងដែរ៕
