តារាចម្រៀងស្រី ដែលកំពុងតែឡើងកូដខ្លាំង នៅផលិតកម្ម ហ្គាឡាក់ស៊ី កញ្ញា តន់ ចន្ទសីម៉ា ជាមួយ បទ «Are You Ok?» ស្រូបបានអ្នកទស្សនា ១០០ លានដង ត្រឹមតែពេល ១ ខែ។ រូបថត ហ្វេសប៊ុក
ភ្នំពេញៈ បទ «Are You Ok?» របស់កញ្ញា តន់ ចន្ទសីម៉ា នៅផលិតកម្មហ្គាឡាក់ស៊ី ផ្ទុះការគាំទ្រខ្លាំង ក្នុងបណ្តាញសង្គម ដោយមានអ្នកទស្សនា ១០០ លានដង (100M Views) តែត្រឹមរយៈពេល ១ ខែ។
នេះបើយោងតាមការបង្ហោះសារពីសំណាក់តារាចម្រៀងស្រី និងលោក យឹម តាស្រង់ ជាអ្នកចាត់ការទូទៅផលិតកម្មហ្គាឡាក់ស៊ី ដែលមានឃ្លាដូចគ្នាទាំងស្រុងថា៖ «100M Views ត្រឹមតែ ៣១ ថ្ងៃ ជាលើកដំបូង! ដោយសេចក្តីរីករាយ និងគោរព អរគុណដល់ពុកម៉ែបងប្អូនទាំងអស់ ដែលបានគាំទ្រដល់ CAM-POP GALAXY NAVATRA»។
កាលពីបទចម្រៀងកែសម្រួលថ្មី «Are You Ok?» ដែលបកស្រាយដោយតារាចម្រៀងស្រី រាងតូចច្រឡឹង សំឡេងធ្ងន់កញ្ញា តន់ ចន្ទសីម៉ា ផ្ទុះការគាំទ្រយ៉ាងច្រើនមានចំនួន ៦០ លានដង (60M) តែត្រឹមរយៈពេល ២ សប្តាហ៍នោះ ម្ចាស់បទក៏បានប្រកាសឧបត្ថម្ភប្រាក់ចំនួន ១០០ លានរៀល ដើម្បីទ្រទ្រង់វិស័យសិល្បៈបុរាណផងដែរ។
នៅថ្ងៃនោះ គេក៏ឃើញអ្នកចាត់ការទូទៅផលិតកម្មហ្គាឡាក់ស៊ីលោក យឹម តាស្រង់ បង្ហើបជាសារនៅហ្វេសប៊ុកថា៖ «ចូលរួមអបអរនូវសន្តានចិត្តរបស់ប្អូន!ជោគជ័យធំណាស់ប្អូនស្រីគ្រាន់តែ ៣ ក្រុមហ៊ុនសោះទទួលបានជាង ៥០ ម៉ឺនដុល្លារទៅហើយ បើត្រឹមតែបានឮគេថា ខ្ញុំប្រាកដជា មិនជឿឡើយ តែនេះជាកិច្ចការខ្ញុំធ្វើផ្ទាល់»។
គួរបញ្ជាក់ដែរថា នៅថ្ងៃទី ២៧ ខែ តុលា ឆ្នាំ ២០២១ ក្រសួងវប្បធម៌ និងវិចិត្រសិល្បៈបានសម្រេចចេញទិដ្ឋាការបទចម្រៀង- «Are you ok»? របស់ផលិតកម្មហ្គាឡាក់ស៊ី ណាវ៉ាត្រា អាចផលិត MV ខារ៉ាអូខេថ្មីបាន។ លុះបន្ទាប់មកផលិតកម្មក៏បានធ្វើការកែតម្រូវចំណុចខ្វះខាត ស្របតាមលក្ខខណ្ឌរបស់ក្រសួង ដោយបទចម្រៀងមួយនេះបានបញ្ចេញ Full MV ផ្លូវការនៅថ្ងៃទី ៤ ខែ វិច្ឆិកា ឆ្នាំ ២០២១ ហើយក៏បានបំបែកកំណត់ត្រាថ្មីក្លាយជាចម្រៀងទី ១ ក្នុងប្រទេសកម្ពុជា ដែលទទួលបាននូវចំនួនអ្នកទស្សនាច្រើន ( Viewers) រហូតដល់ ៤ លានដងក្នុង YouTube ត្រឹមតែ ២៤ ម៉ោងតែប៉ុណ្ណោះ។
កាន់តែពិសេសទៀតនោះ បន្ទាប់ពីបានកែសម្រួលនូវចំណុចខ្វះខាត ឬលើសលស់នូវអត្ថន័យ ក្រោយទទួលរងការរិះគន់កាលពីចេញលើកដំបូង និងក្រោយពីបានទិដ្ឋាការទទួលស្គាល់ពីក្រសួងវប្បធម៌ និងវិចិត្រសិល្បៈមកនោះ ផលិតកម្ម ហ្គាឡាក់ស៊ី ណាវ៉ាត្រា បានលក់សិទ្ធិផលិតបន្តបទ- «Are You Ok?» ដែលជាការចេញលើកទី ២ របស់ខ្លួនទៅឱ្យក្រុមហ៊ុនចិន GESTOS ដើម្បីពង្រីកវិសាលភាពនៃវិស័យចម្រៀងសម័យទំនើបកាលពីថ្ងៃទី ៦ ខែវិច្ឆិកា ឆ្នាំ ២០២១ កន្លងមក៕
