ភ្នំពេញ: Rise គឺជាកម្មវិធីអាហារូបករណ៍មួយ ដែលកំពុងស្វែងរក យុវជនវ័យក្មេងដែលមានអាយុ ១៥-១៧ ឆ្នាំ ដែលស្ដែងចេញសក្ដានុពលនៅគ្រប់វិស័យ និងជំនាញ ដើម្បីជួយគាំទ្រដំណើរជីវិតរបស់ពួកគេពេញ ១ ជីវិត រួមមាន អាហារូបករណ៍ ឱកាសក្នុងការអភិវឌ្ឍអាជីព កញ្ចប់ឧបករណ៍បច្ចេកវិទ្យា និងការឧបត្ថម្ភចូលរួមកម្មវិធីជាច្រើនទៀត ជាទុនជួយពួកគេបង្កើនចំណេះដឹង អំឡុងពេលដោះស្រាយបញ្ហាសម្រាប់ពិភពលោក។
ឆ្នាំមុនដែលជាឆ្នាំដំបូងរបស់ Rise មិនមានសិស្សខ្មែរចូលរួមច្រើននោះទេ ព្រោះកង្វះទទួលព័ត៌មានបានទូលំទូលាយ។ យ៉ាងណាមិញកញ្ញា ធី ជូលី ដែលបានបញ្ចប់ការសិក្សាពីសាលារៀនសុវណ្ណភូមិ បន្ទាយមានជ័យ បានក្លាយជាបេក្ខភាពម្នាក់ក្នុងចំណោមអ្នកឈ្នះ ១០០ នាក់ ពីកម្មវិធី Rise ដោយរួមចំណែកស្ដែងនូវសមត្ថភាពយុវជនកម្ពុជាទៅកាន់ពិភពលោក។
បច្ចុប្បន្ននេះ និស្សិតកម្ពុជារូបនេះកំពុងបន្តការសិក្សាដោយទទួលបានអាហារូបករណ៍ថ្លៃសិក្សា ១០០ ភាគរយ នៅវិទ្យាស្ថាន IPU Tertiary Institute ប្រទេសនូវែលសេឡង់។
សញ្ញាជោគជ័យនៅឆ្នាំដំបូង Rise ក៏បានទាក់ទងមកសាលា Liger Leadership Academy ដើម្បីជំរុញការចូលរួម ផ្សព្វផ្សាយ និងកៀរគរយុវជន-យុវតីឱ្យបានរឹតតែច្រើន។
លោក ឃីធ ស៊ីមសិន អ្នកសម្របសម្រួលការសិក្សានៅ Liger Leadership Academy បានប្រាប់ ភ្នំពេញ ប៉ុស្តិ៍ថា៖ «ឆ្នាំនេះ ជាឆ្នាំទី២ របស់កម្មវិធី Rise ហើយ Rise បានទាក់ទងមកពួកយើង ដោយសារតែអ្នកតំណាងរបស់ពួកគេម្នាក់បានជួប ហើយមានការចាប់អារម្មណ៍ចំពោះអតីតសិស្សរបស់យើងម្នាក់ ដែលកំពុងសិក្សាអាហារូបករណ៍នៅ Dartmouth (សហរដ្ឋអាមេរិក)» ។
ដោយកម្មវិធី Rise ត្រូវនឹងបេសកកម្មរបស់សាលា ឆ្នាំនេះសិស្សានុសិស្ស Liger Leadership Academy ដែលគ្រប់អាយុទាំងអស់ក៏បានសម្រេចចិត្តចូលរួមក្នុងបំណងផ្សព្វផ្សាយឥទ្ធិពលវិជ្ជមាននៃកម្ពុជា។
ក្រៅពីសិស្សនៅសាលារបស់លោកអ្នកសម្របសម្រួលការសិក្សារូបនេះក៏អំពាវនាវផងដែរថា សិស្សានុសិស្សផ្សេងទៀតគួរតែចូលរួម ដោយសារកម្ពុជាកំពុងអភិវឌ្ឍ និងត្រូវការយុវជនមានសមត្ថភាពដោះស្រាយបញ្ហា ធ្វើការដកពិសោធបញ្ហា និងអនុវត្តគំនិតផ្ទាល់របស់ពួកគេ។
ទន្ទឹមនឹងរំលេចពីសារៈសំខាន់នៃឱកាសឱ្យសិស្សបញ្ចេញគំនិតធ្វើឱ្យពិភពលោកប្រសើរឡើងនោះ លោក ស៊ីមស៊ិន បានរំលេចភាពពិសេសនៃកម្មវិធីខាងលើនេះថា៖ «Rise គឺជាឱកាសឥតខ្ចោះ ក្នុងការធ្វើកិច្ចការទាំងនោះ។ វាផ្ដល់ឱ្យយុវជនមានបទពិសោធដ៏មានតម្លៃ ក្នុងការពង្រឹងសមត្ថភាព និងទំនុកចិត្តក្នុងការបន្តការងារនេះទៅថ្ងៃមុខ។ ចំណុចពិសេស អ្នកដែលឈ្នះនឹងអាចទទួលបានអាហារូបករណ៍ទៀតផង»។
ផលប្រយោជន៍ទទួលបានសម្រាប់អ្នកឈ្នះកម្មវិធីប្រកួតប្រកួតប្រជែង Rise គឺមានច្រើនទម្រង់។ ឱកាស និងអត្ថប្រយោជន៍មានលក្ខណៈផ្ទាល់ខ្លួន និងអាចបត់បែនបាន ស្របតាមតម្រូវការរបស់អ្នកឈ្នះ និងវិវឌ្ឍទៅតាមពេលវេលា។
អ្នកឈ្នះនឹងមានឱកាសដាក់ពាក្យស្នើសុំអត្ថប្រយោជន៍ពីបណ្តាញដៃគូរបស់ Rise ទាំងអស់ ដោយមានឱកាសភ្ជាប់ទៅនឹងកម្មវិធីរួមមាន អាហារូបករណ៍នៅអនុវិទ្យាល័យ ឱកាសហ្វឹកហាត់ការងារ និងអត្ថប្រយោជន៍ផ្សេងទៀត។
អ្នកឈ្នះនឹងមានឱកាសទទួលបានមូលនិធិ ដើម្បីយកអនុវត្តការពិសោធជាមួយគំនិតច្នៃប្រឌិតរបស់ខ្លួន ក្នុងការដោះស្រាយបញ្ហាធំៗនៅក្នុងសហគមន៍ខ្លួនផ្ទាល់ ឬជុំវិញពិភពលោក។ រីឯការគាំទ្រផ្នែកអប់រំ សំដៅលើឱកាសដាក់ពាក្យសុំអាហារូបករណ៍បន្តការសិក្សា។
លោក ស៊ីមស៊ិន បាននិយាយថា៖ «សិស្សជាច្រើនមានការព្រួយបារម្ភពីថវិកាថា បន្ទាប់ពីរៀនចប់នឹងធ្វើអ្វី អាចបន្តការសិក្សាបាន ឬយ៉ាងណា ដូច្នេះការចូលរួមប្រកួតប្រជែងនេះអាចផ្លាស់ប្ដូរជីវិតអ្នកពេញ ១ ជីវិត»។
ក្រសួងអប់រំ យុវជន និងកីឡា ក៏បានជំរុញសិស្សានុសិស្សទូទាំងប្រទេសឱ្យចូលរួមប្រកួតប្រជែងកម្មវិធី Rise ផងដែរ។ សម្ទុះសិស្សកម្ពុជាបានចូលរួមច្រើនក្នុងតួលេខឈានដល់ ១០ ប្រទេសកំពូល ដែលមានអ្នកចូលរួមច្រើនជាងគេ។
លោក ស៊ីមស៊ិន បានឱ្យដឹងដែរថា៖ «ពេលយើងចូលក្នុងសាលា យើងពិតជារីករាយណាស់ ដែលឃើញសិស្សៗពិភាក្សាគ្នាអំពីគំនិតរបស់ពួកគេ ហើយយើងឃើញមានកើនចំនួនអ្នកចូលរួមបំពេញទម្រង់ច្រើនក្នុងផេច ហ្វេសប៊ុករបស់យើងជារៀងរាល់ថ្ងៃ»។
ក្នុងការប្រកួតប្រជែងនេះដែរ អ្នកចូលរួមមាន ៣ ដំណាក់កាលគឺ៖ ១. ទាញយកកម្មវីធី រួចបង្កើតវីដេអូណែនាំខ្លួន ដោយថ្ងៃផុតកំណត់គឺ ថ្ងៃទី ២២ ធ្នូ ឆ្នាំ ២០២១។ ២. បង្កើតគម្រោង ដែលអាចជួយសហគមន៍របស់អ្នក និង៣. បញ្ចប់ការប្រកួតដោយផ្ដល់មតិស្ថាបនាទៅលើគម្រោងបេក្ខជនចូលរួមដទៃទៀត។
បេក្ខជន ៥០០ នាក់ នឹងទទួលបានថវិកាចំនួន ១ ០០០ ដុល្លារ ហើយយុវជនចំនួន ១០០ នាក់ នឹងត្រូវបានជ្រើសរើសដើម្បីទទួលបានជយលាភីដែលមានតម្លៃស្មើនឹង ៥០ ម៉ឺនដុល្លារ និងការគាំទ្រពេញ ១ ជីវិត។
លោក ស៊ីមស៊ិន បង្ហាញចំណាប់អារម្មណ៍ថា៖ «វាគឺជាក្ដីសុបិនរបស់យើងក្នុងការឃើញយុវជនវ័យក្មេងកម្ពុជាច្រើននាក់ចូលរួមក្នុងកម្មវិធីនេះ ហើយនឹងជាការរំភើបចិត្តមួយបើពួកគេឈានទៅដល់វគ្គពាក់កណ្ដាលផ្ដាច់ព្រ័ត្រ និងវគ្គផ្ដាច់ព្រ័ត្រ»។
តំណភ្ជាប់កម្មវិធីទូរស័ព្ទ https://gethelloorg.page.link/qRT8 ហ្វេសប៊ុក @risechallenge2021kh និងគ្រុបតេឡេក្រាម https://t.me/joinchat/XHyGNnvV38UwZjZl៕