ភ្នំពេញ: ទីភ្នាក់ងារបារាំងសម្រាប់ការអភិវឌ្ឍ (AFD) នៅកម្ពុជា និងស្ថានទូតបារាំងប្រចាំកម្ពុជា កាលពីថ្ងៃទី ៨ ខែ ធ្នូ ឆ្នាំ ២០២១ បានរៀបចំពិធីជួបជុំមួយ ដើម្បីរំឭកខួប ៨០ ឆ្នាំ របស់ AFD និងជាឱកាសសម្ពោធពិព័រណ៍ «សំឡេងស្ត្រី» ផង។
ចាប់តាំងពីពេលបង្កើតឡើងជាង ១សតវត្សរ៍ដោយឧត្តមសេនីយ៍ ហ្សាល ដឺហ្គោល AFD បានរក្សាគោលការណ៍មនុស្សធម៌ក្នុងការងារប្រយុទ្ធ-ប្រឆាំងវិសមភាពនៅក្នុងពិភពលោក និងការប្រែប្រួលបរិស្ថាន។
ឯកអគ្គរដ្ឋទូតបារាំងប្រចាំកម្ពុជា លោក ហ្សាក់ ប៉ឺឡេ បានផ្ដើមសុន្ទរកថាថា៖ «កម្មវិធីនេះគឺជាការប្រារព្ធដល់ស្ត្រីចំណាស់ម្នាក់គឺ AFD នេះឯង ដែលនៅតែមានវ័យក្មេង និងវិវឌ្ឍទៅមុខជារៀងរាល់ឆ្នាំ។ វាត្រូវបានប្រារព្ធនៅទីក្រុងប៉ារីស ថ្ងៃទី ២ ខែ ធ្នូ ឆ្នាំ ២០២១ ហើយនឹងធ្វើឡើងនៅទូទាំងពិភពលោកនៅទីភ្នាក់ងារ AFD ទាំងអស់ចាប់ពីខែកញ្ញាដល់ចុងឆ្នាំ»។
នៅប្រទេសកម្ពុជា ទីភ្នាក់ងារ AFD មានវត្តមានចាប់តាំងពីឆ្នាំ ១៩៩៣ ហើយបាននិងកំពុងលើកកម្ពស់កិច្ចសហប្រតិបត្តិការលើវិស័យកសិកម្ម ហេដ្ឋារចនាសម្ព័ន្ធ (ទឹក និងថាមពល) ការបណ្តុះបណ្តាលវិជ្ជាជីវៈ ការគ្រប់គ្រងហិរញ្ញវត្ថុ និងវប្បធម៌។
ក្នុងប្រវត្តិសាស្ត្រ និងគម្រោងនានា ស្ត្រី និងបុរសបានផ្លាស់វេនគ្នាក្នុងបណ្តាទសវត្សរ៍ចុងក្រោយ ដើម្បីជួយជ្រោមជ្រែង និងរួមគ្នាកសាង។ ដូច្នេះក្នុងការកសាងពិភពលោក ៨០ ឆ្នាំ បន្តទៀត AFD ច្បាស់ថា អនាគតមិនអាចកសាងឡើងដោយគ្មានវត្តមានស្ត្រីចូលរួមនោះឡើយ។
លោកឯកអគ្គរដ្ឋទូតបានបន្តថា៖ «AFD មានបំណងលើកស្ទួយស្ត្រី។ ដូច្នេះពិព័រណ៍ជាគោលដៅផ្សព្វផ្សាយ «សំឡេងស្ត្រី» កម្ពុជា ដែលមានលក្ខណៈបណ្ដុះគំនិត នៅក្នុងគម្រោងគាំទ្រដោយទីភ្នាក់ងារ AFD ក៏ដូចជាបង្ហាញអំពីប្រវត្តិ ការផ្ដួចផ្ដើមគំនិត និងបញ្ហាប្រឈមរបស់ពួកគេ»។
ក្នុងកម្មវិធីនេះដែរ នៅពេលដែលអ្នកចូលរួមដើរជុំវិញទីធ្លាជជែកសំណេះសំណាលគ្នា ពួកគាត់បានឃើញរូបថតស្ត្រីជាច្រើនរូប អមដោយសេចក្ដីសង្ខេបពីមុខជំនាញ។ ទោះជាតួនាទីខុសៗគ្នា តែពួកគាត់មានចំណុចប្រសព្វរួមមួយគឺ ពិសោធធ្លាប់រងការរើសអើងភេទ ដែលនាំឱ្យគាត់ពុះពារជម្នះរហូតឈានដល់ចំណុចមួយដែលពួកគាត់ស្រឡាញ់ពេញចិត្ត។
ក្នុងចំណោមស្ត្រីក្នុងរូបភាពនោះ អតីតអ្នកបម្រើការងារតាមផ្ទះ និងជាអ្នកមើលថែកុមារ អ្នកស្រី ផេង ស្រី ត្រូវបានគេមើលរំលង និងមិនអើពើអស់រយៈពេលជាច្រើនឆ្នាំ។ អ្នកធ្វើការក្រៅប្រព័ន្ធ នៅគ្រប់វិស័យរាប់ចាប់ពីអ្នកបម្រើការងារតាមផ្ទះរហូតដល់អ្នកលក់ដូរតាមផ្លូវ អ្នករត់កង់៣ បានប្រឈមមុខនឹងបញ្ហាវិសមភាពយេ៉នឌ័រយ៉ាងខ្លាំងក្លា។
អ្នកស្រី ស្រី បាននិយាយថា៖ «មនុស្សគ្រប់គ្នាគួរតែយល់អំពីទុក្ខលំបាកស្ដ្រីដែលប្រឈមក្នុងការងារបែបនេះ ការរើសអើង និងកំហឹងពីម្ចាស់ផ្ទះ។ គេហៅយើងអ្នកបម្រើ គឺស្មើថាយើងអ្នកមានវណ្ណៈទាប»។
សំណាងល្អ ដែលអ្នកស្រីបានចូលជាសមាជិក IDEA (សមាគមសេដ្ឋកិច្ចក្រៅប្រព័ន្ធប្រជាធិបតេយ្យ) ហើយអ្នកស្រីបានក្លាយជាអ្នកទាមទារសិទ្ធិរបស់ខ្លួនឯង ដែលស្ត្រីជាច្រើនមិនទាន់ទទួលបាន។
អ្នកស្រីបន្តថា៖ «តាម IDEA ខ្ញុំបានទទួលការបណ្ដុះបណ្ដាលផ្នែកពង្រឹងអំណាចស្ត្រី ដែលបានជួយឱ្យខ្ញុំក្លាហាន និងមានទំនុកចិត្តជាងមុនក្នុងការទាមទារសិទិ្ធ និងតស៊ូមតិសម្រាប់ខ្លួនខ្ញុំ»។
រីឯអ្នកស្រី ទុង សុភាព ជាអគ្គនាយិការងនៃអគ្គនាយកដ្ឋានអប់រំបណ្ដុះបណ្ដាលបច្ចេកទេស និងវិជ្ជាជីវៈ នៃក្រសួងការងារ និងបណ្ដុះបណ្ដាលវិជ្ជាជីវៈ គឺជាអ្នកត្រួសត្រាយផ្លូវដ៏សំខាន់ក្នុងការពង្រឹងអំណាចខ្លួនឯងរបស់ស្ត្រីនៅកម្ពុជា។
អ្នកស្រីបានលើកឡើងថា៖ «កាលពីសម័យខ្ញុំរៀន ស្ត្រីមានតែ ១,៥% ប៉ុណ្ណោះ ប៉ុន្តែបច្ចុប្បន្នខ្ញុំឃើញស្ត្រីជាច្រើនមានចំណេះដឹងជ្រៅជ្រះ។ ខ្ញុំសូមបន្តលើកទឹកចិត្តឱ្យស្ត្រីជំនាន់ក្រោយជឿជាក់ មានឆន្ទៈថា ពួកគេអាចធ្វើបាន។ ប្រសិនបើភ័យខ្លាច ឱកាសល្អៗនឹងកន្លងទៅ។ គ្មានការងារណា ដែលស្ត្រីមិនអាចធ្វើបាននោះទេ។ ឱ្យតែយើងចង់បាន យើងប្រាកដជាអាចទទួលបាន»។
នៅពីក្រោយរូបថតស្ត្រីទាំងនេះ គឺជាស្នាដៃអ្នកថតរូបវ័យក្មេង ម៉ិច សេរីរ័ត្ន និងរៀបចំ ដោយសមាគម Minor Act ដើម្បីបង្ហាញការប្ដេជ្ញាចិត្តរបស់ស្ត្រីក្នុងការជម្នះឧបសគ្គ រាំងស្ទះដល់ឯករាជភាពរបស់ពួកគេ។
កញ្ញាថា ឱកាសធ្វើការងារជាមួយស្ត្រីទាំងអស់នេះ ផ្ដល់ឱ្យកញ្ញាទាំងភាពរីករាយ និងរឿងរ៉ាវបង្កប់ដោយក្ដីសង្ឃឹម និងភាពមិនរីករាយពីទុក្ខសោកជាច្រើនក្នុងខ្សែជីវិតពួកគាត់។
កញ្ញាថា៖ «តាមរយៈពួកគាត់ ដែលតំណាងឱ្យសំឡេងស្ត្រីជាច្រើនរូបទៀត ខ្ញុំសង្ឃឺមថា គ្រប់កន្លែង ដែលរូបថត និងអត្ថន័យនេះបានទៅដល់ និងជាកម្លាំងចិត្តដល់ស្ត្រី ដែលជួបប្រទះរឿងដូចគ្នា។ ខ្ញុំរីករាយ ដែលបានឈរនៅលើអាជីពរបស់ខ្ញុំ ក្នុងការជួយចែកចាយដល់ស្ត្រី ដែលគិតថាត្រូវបានគេមើលរំលង»។
លោកស្រី អូហ្វេលី បួរីស នាយិកាទីភ្នាក់ងារ AFD ប្រចាំកម្ពុជា បានគាំទ្រការប្រារព្ធខួប ៨០ ឆ្នាំនៃ AFD ដោយផ្ដោតលើសមភាពរវាងស្ត្រី និងបុរស។
អ្នកស្រីបន្តថា៖ «ខ្ញុំសូមអរគុណដល់ស្ត្រីទាំងអស់ ដែលបានយល់ព្រមចូលរួមក្នុងគម្រោងនេះ ដើម្បីឱ្យសង្គមដឹងថា ស្ដ្រីមិនគួរត្រូវបានបង្ខំដោយផ្នត់គំនិតចាស់គំរិល តែជាកន្លែងដែលពួកគេអាចបង្ហាញទេពកោសល្យដោយគ្មានព្រំដែន»។
ការប្រារព្ធខួប AFD ៨០ ឆ្នាំ នេះក៏ជាឱកាសបង្ហាញអំពីការទូតបារាំងដែលផ្ដោតលើការអភិវឌ្ឍប្រកបដោយចីរភាព ដែលឯកអគ្គរដ្ឋទូត លោក ហ្សាក់ ប៉ឺឡេ សំដៅលើ៖ «ការការពារផែនដីពីផលវិបាកអវិជ្ជមាននៃបម្រែបម្រួលអាកាសធាតុ និងធានាបាននូវអនាគតមួយប្រសើរជាងមុនសម្រាប់មនុស្សទាំងអស់»៕