.jpg)
ក្រោយលាបរមៀត ក្រពើត្រូវបានព្យួរ ហើយដុតរោលហ្គាស។ ហេង ជីវ័ន
ភ្នំពេញ: ល្មូនជើង ៤ ក្រឡាពេញខ្លួនសំយុងកន្ទុយវែងធ្លាក់ក្បែរជញ្ជីងថ្លឹង រីឯសាច់លាបគ្រឿងអាំងលើចង្អើរភាយក្លិនឈ្ងុយដល់អតិថិជនឈរក្បែរតូបរទេះ រង់ចាំសាច់ក្រពើឆ្អិន។
ដ្បិតតែការទទួលទានសាច់ក្រពើមានជាយូរមកហើយ តែប្រជាប្រិយភាពសាច់ក្រពើអាំង គឺជាទំនោរដ៏ពេញនិយមថ្មីមួយ។
នៅរទេះស្លាក Nice Cow លោក ហាក់ វីរ៉ាត់ ព្យួរក្រពើឆៅៗទាំងមូល ទាក់ចំណាប់អារម្មណ៍អ្នកដំណើរឆ្លងកាត់ ដែលមានប្រតិកម្មខុសៗគ្នា។
ក្រៅពីអ្នកមកសុំថតរូប និងសួរនាំ អ្នកខ្លះ ទោះខ្លាចរអានៅតែទ្រាំសាករសជាតិដ៏កំពុងល្បីលើទីផ្សារនេះ។
ដើមឡើយលោក វីរ៉ាត់ មានលក់តែគោដុតទឹកប្រហុកទេ ប៉ុន្តែក្រោយមក លោក និងបងប្អូនជីដូនមួយ ក៏ពិភាក្សាគ្នាចង់ថែមមុខម្ហូបថ្មី។ តាមរយៈយូធូប លោកបានឃើញថា សាច់ក្រពើមានការពេញនិយម តែមានតែដោតចង្កាក់។ លោកក៏គិតថា ដើម្បីឱ្យប្លែកជាងគេគួរតែសាកដាក់លក់ទាំងឆៅ រួចអាំងជូនភ្ញៀវភ្លាមៗវិញ។
លោក ហាក់ វីរ៉ាត់ ជាមេចុងភៅ និងអ្នកគ្រប់គ្រងរបរនេះប្រាប់ ភ្នំពេញ ប៉ុស្តិ៍ថា៖ «យើងបានយកវាមកសាកល្បងអាំង ហើយឃើញថា មិនមានក្លិន [ធុំឆ្អាប] សាច់ផុយ និងឆ្ងាញ់។ យើងក៏សម្រេចយកវាមកដាក់លក់។ មកទល់ពេលនេះ គឺជាង ១ ខែហើយក៏ឃើញថា វាដើរល្អដែរ»។
សាច់ក្រពើប្រឡាក់គ្រឿងអាំងភ្លាមៗ ប្រើពេលពី ៧ ទៅ ៨ នាទី។ហេង ជីវ័ន
អ្នកមានបទពិសោធធ្វើចុងភៅក្នុងហាងបងប្អូនជាច្រើនឆ្នាំរូបនេះ ឱ្យដឹងដែរថា សាច់ក្រពើទាំងអស់នេះ ត្រូវបានយកមកពីខេត្តសៀមរាប តាមក្រុមហ៊ុនមានច្បាប់ទម្លាប់ត្រឹមត្រូវ។
ដូច្នេះលោកឱ្យគេដឹកជញ្ជូនមកដោយឥតបារម្ភថា វាជាសាច់មិនស្របច្បាប់ ឬចាប់ពីតំបន់អភិរក្សឡើយ។
លោកនិយាយថា៖ «យើងមានម៉ូយ ២ កន្លែង។ យើងយកក្រពើម្ដង ១០០-២០០ គីឡូ ប្រហែលជាបានក្រពើ ៤០-៥០ ក្បាល។ យើងលក់តែ ៣ ថ្ងៃអស់ហើយ។ ពេលខ្លះកន្លែង ១ អត់ក្រពើពី ៥ គីឡូឡើង យើងរក ១ កន្លែងទៀត ព្រោះសាច់ក្រពើដែលឆ្ងាញ់ មានអាយុពី ២-៣ ឆ្នាំ ដែលគេចិញ្ចឹមយកចន្លោះពី ៥ ទៅ ១០ គីឡូ»។
លោកបញ្ជាក់ថា ក្រពើ ៥ គីឡូសាច់ផុយ ហើយស្បែកផុយ។ តែចាប់ពី ៧ ទៅ ១០ គីឡូក្រាមសាច់វារាងច្រុបៗ ស្បែករាងស្វិតបន្តិច និងរសជាតិឆ្ងាញ់ជាង។ ចំពោះក្រពើទម្ងន់ ១០ គីឡូឡើងមិនសូវឆ្ងាញ់ទេ។
អ្នកលក់វ័យ ២៩ ឆ្នាំ រូបនេះ តំណាលត្រួសៗពីរបៀបយកក្រពើមករហូតដល់យកទៅលក់ថា៖ «ពេលយើង ទិញពីគេមក យើងឱ្យគេកាត់ក្បាល វះពោះ ធ្វើឱ្យស្អាត មុនផ្ញើមក។ ពេលមកដល់ យើងយកវាលាងទឹក លាបប្រេងរមៀត រួចយកទៅព្យួរ រោលហ្គាស សម្ងួតវា រហូតដល់ស្បែកវារាងក្រហមប្រហែលជា ៧-៨ នាទី»។
លោកបានបន្តថា៖ «បន្ទាប់មក យើងយកវាមកដាក់ធុង ដោយមានទឹកកកក្រាលទាំងលើ និងក្រោម ដើម្បីកុំឱ្យវាស្អុយ។ យើងចាប់ផ្ដើមទៅកន្លែងលក់ម៉ោង ៤:៣០ រសៀលដល់ម៉ោង
១០:៣០ យប់ ដោយយកវាមកព្យួរ ហើយពេលមានម៉ូយទិញ ទើបយើងកាប់ប្រឡាក់សាច់អាំងឱ្យ»។
សាច់ក្រពើរបស់លោកមានលក់នៅ ៣ ទីតាំង ច្បារអំពៅ ទួលទំពូង និងបឹងត្របែក។ ក្នុងរទេះ ១ គឺមានក្រពើ ១ ទៅ ២ ក្បាល ដោយលក់ក្នុង ១ គីឡូក្រាម តម្លៃ ៨ ម៉ឺនរៀល។
សាច់ក្រពើអាំងមានតម្លៃប្រមាណ ៨ ម៉ឺនរៀល ក្នុង ១ គីឡូក្រាម។ ហេង ជីវ័ន
សព្វថ្ងៃ សាច់ក្រពើលក់ដាច់គួរសមដែរ តែបើគ្មានកូវីដ លោក វីរ៉ាត់ ជឿថា អាចលក់ដាច់ជាងហ្នឹង។ តាមការសង្កេត លោកឃើញថា ភ្ញៀវដែលថា ខ្លាចពេលបានសាករួច ពួកគាត់ចាប់ចិត្ត សរសើរថា សាច់ស្រស់ មិនឆ្អាប និងមិនដូចក្រពើគេលក់មុននោះទេ។
ការលក់ជាសាច់ឆៅរួចចម្អិនភ្លាមៗ ទទួលបានរសជាតិឆ្ងាញ់ជាងសាច់ដោតចង្កាក់ ព្រោះលោកមានទឹកជ្រលក់ប្រឡាក់សាច់ឱ្យកាន់តែមានឱជារស។ ភ្ញៀវមកទិញជាបន្តបន្ទាប់ ក៏ជួយផ្សព្វផ្សាយតៗគ្នា។
រូបមន្តទឹកជ្រលក់រូបមន្តរបស់លោក គឺជាអ្វីដែលភ្ញៀវចាប់ចិត្តខ្លាំង ដោយមានជម្រើស ទឹកកាពិ ទឹកតៅហ៊ូ ទឹកត្រីកោះកុង ទឹកប្រហុក និងអំបិលម្រេច។ ភ្ញៀវភាគច្រើនចូលចិត្តទឹកតៅហ៊ូ ដែលត្រូវនឹងសាច់ក្រពើខ្លាំង។ បន្លែផ្ទាប់សាច់ក្រពើអាំង មិនខុសពីបន្លែគោដុតទេ គឺត្រសក់ ជីរ ចេកខ្ចី កញ្ឆែត ត្រកួន និងស្ពៃក្ដោបជាដើម។
លោក វីរ៉ាត់ បន្ថែម ថា៖ «ប៉ុន្តែក៏មានអតិថិជនខ្លះ គាត់សួរពីមុខម្ហូបដែលអាចប្រើសាច់នេះបាន។ តាមពិតក្រៅពីអាំង យើងយកឆាក្ដៅ ម្ជូរក្រាក់ បំពង និងច្រើនទៀតបាន។ ដូច្នេះអ្នកខ្លះគាត់កុម្ម៉ង់សាច់ឆៅយើង ១-២ គីឡូទៅសាកធ្វើម្ហូប ហើយគាត់ថាពិតជាឆ្ងាញ់ប្លែកខ្លាំងណាស់»។
លោកប្រើពេលអាំងសាច់ក្រពើចន្លោះពី ៧ ទៅ ៨ នាទី។ តែដើម្បីឱ្យការងារកាន់តែលឿន និងដើម្បីកុំឱ្យម៉ូយរង់ចាំយូរ លោកថា លោកកំពុងគិតនឹងអាំងឱ្យឆ្អិន ៥០ ទៅ ៧០ ភាគរយមុននឹងព្យួរ ដើម្បីចំណេញពេលភ្ញៀវចាំត្រឹមតែ ៣-៤ នាទីជាការស្រេច។
ក្រពើត្រូវបាននាំយកពីខេត្តសៀមរាប ហើយសាច់ឆ្ងាញ់ជាក្រពើអាយុ ២-៣ឆ្នាំ ទម្ងន់ ៥ ទៅ ១០ គីឡូក្រាម។ហេង ជីវ័ន
រយៈពេលជាង ១ ខែ នៃការដាក់លក់ស្ទាបស្ទង់ លោកថា លោកមានការពិបាកតិចតួចដែរ ជួនកាលមេឃភ្លៀង និងវិបត្តិកូវីដនាំឱ្យស្ងាត់បន្តិចដែរ។ ទោះបីជាមានថ្ងៃខ្លះ រអាក់រអួលភ្ញៀវ តែនិយាយជារួម អាជីវកម្មលក់សាច់ក្រពើដំណើរការល្អ។
លោកជឿជាក់ថា៖ «នៅថ្ងៃមុខនឹងកាន់តែមានការពេញនិយមខ្លាំង ដោយសារបច្ចុប្បន្ន ខ្ញុំមានម៉ូយកាន់តែច្រើន ទាំងម៉ូយថ្មី និងចាស់។ ខ្ញុំកំពុងគិតបន្ថែម នាំចូលចៀម និងពពែពីខាងកំពង់ចាមមកទៀតដាក់ឱ្យបាន ៤ មុខ។ ចំពោះគោ យើងចង់ពន្លះស្បែកជាប់សាច់ ហើយលាបគ្រឿងដាក់ព្យួរដូចនំអន្សមជ្រូក»។
លោកក៏បង្ហើបគម្រោងដែរថា៖ «ដាច់ឆ្នាំហ្នឹង យើងចង់រៀបគម្រោងឱ្យប្លែកពីគេថែមទៀត។ យើងក៏កំពុងរកកន្លែងបើកហាង និងបើកជាសិទ្ធិផ្ដាច់មុខសម្រាប់អ្នកចង់យកទៅលក់បន្តជាការចែករទេះលក់ជាដើម»។
លោកក៏ទទួលភ្ញៀវដែលចង់អាំង ដុតគោ ក្រពើ ចៀម ឬពពែក្នុងកម្មវិធីនៅគេហដ្ឋាន ដោយអាចទាក់ទងទូរស័ព្ទលេខ ០៩៦ ៦១០ ៤៦ ៤៦ និង ០៣១ ៣១៦ ១១៣៦៕
