ភ្នំពេញ: នៅពេលពន្លឺព្រះអាទិត្យប៉ះនឹងតំណក់ទឹក មនុស្សគ្រប់គ្នាស្ទើរតែមិនជឿថា ពួកគេអាចទទួលបានបទពិសោធឥន្ទធនូនារដូវរំហើយ នៅទីតាំងជាក់លាក់មួយ ទាំងបាតុភូតធម្មជាតិច្រើនកើតឡើងនៅភូមិសាស្ត្រមានភ្លៀងរលឹមបើកថ្ងៃ។
បើមិនមានការបកស្រាយផ្ទាល់ពី សិល្បករ វុធ លីណូ ដែលជាអ្នកបង្កើតគម្រោងនេះឡើង គ្រប់គ្នាទំនងជាមិនជឿទេ ថាឥន្ទធនូនៅ១កន្លែងអាចទៅរួចបានយ៉ាងដូចម្ដេច។
លោក លីណូ ទទួលបានគំនិតតាំងពីដើមឆ្នាំនេះ តែលោកបានបង្ហើបឱ្យ ភ្នំពេញ ប៉ុស្តិ៍ ដឹងពីសិល្បៈផ្គុំឥន្ទធនូ បង្កប់ខ្លឹមសារ កាលពីខែកញ្ញា។
លោកធ្លាប់ប្រាប់ថា៖ «ខ្ញុំចង់បង្កើតអ្វីមួយពីវត្ថុធាតុដែលមនុស្សមិនអាចប៉ះបាន។ ខ្ញុំចង់លើកឡើងអំពីភាព-ខុសគ្នារបស់មនុស្សជាតិ សហគមន៍ស្រឡាញ់ភេទដូចគ្នា ក៏ដូចជាសក្ដានុពល ភាពអស្ចារ្យដែលកើតឡើងពីធាតុផ្សំធម្មជាតិ។ ខ្ញុំ និងក្រុមការងារកំពុងសាកល្បង សង្ឃឹមអាចបង្ហាញសាធារណជននៅចុងឆ្នាំនេះ»។
លោកបានស្ដែងចេញជាលទ្ធផលពិតមែនគឺ សិល្បៈផ្គុំឥន្ទធនូ និងយុទ្ធនាការ «ខ្ញុំទទួលយក» ក្រោមការគាំទ្រពីសហគមន៍ឥន្ទធនូកម្ពុជា (RoCK) ស្ថានទូតកាណាដា និង សួន ឧត្តម កាលពីថ្ងៃទី ១១ ខែធ្នូ។
លោកថា វាហាក់ដូចមិនមែនជាការពិត ហើយគ្រប់គ្នា ដែលបានទៅទស្សនាផ្ទាល់ សុទ្ធតែទទួលស្គាល់ថា វាប្រៀបបីដូចវេទមន្ត ដែលពួកគេមិនធ្លាប់គិតថា អាចកើតឡើងបាន។
សហស្ថាបនិកគម្រោង ស-ស រូបនេះឱ្យដឹងដែរថា៖ «តាមរយៈការបង្កើតឡើងវិញនូវបាតុភូតធម្មជាតិ និងឧតុនិយមនៃឥន្ទធនូនេះ ខ្ញុំចង់បង្កើតសិល្បៈ ដែលផ្សារភ្ជាប់ទៅមនុស្សទាំងអស់ ហើយអនុញ្ញាតឱ្យពួកគេទទួលបានបទពិសោធ និងភាពស្រស់ស្អាត មិនគិតពីអាយុ យេនឌ័រ អត្តសញ្ញាណ វប្បធម៌ ជំនឿ ឬចំណាប់អារម្មណ៍»។
រំឭកទៅដល់គំនិតបំផុស ដែលនាំឱ្យមានការបង្កើតឥន្ទធនូ និងយុទ្ធនាការ «ខ្ញុំទទួលយក» លើកដំបូងរបស់ លីណូ គឺកើតឡើងនៅពេលលោកអង្គុយក្នុងសួន។ លោកក៏នឹកគិតពីធម្មជាតិដែលនាំលោកឱ្យផ្ដោតទៅលើសេចក្ដីស្រឡាញ់របស់មនុស្សចំពោះធម្មជាតិ គុណតម្លៃនៃភាពស្រស់ស្អាត និងភាពរួបរួមរបស់វា។
សិល្បករដែលផ្ដោតទៅលើសិល្បៈច្រើនទម្រង់រូបនេះថា៖ «ខណៈពេល ដែលខ្ញុំកំពុងគិតអំពីការងារសិល្បៈនេះ ខ្ញុំបានពិភាក្សាជាមួយមិត្តរួមការងាររបស់ខ្ញុំ លោក ព្រហ្ម អ៊ីរ៉ូ នៅ RoCK ហើយយើងក៏គិតថា វាស័ក្ដិសម ជាមួយនឹងយុទ្ធនាការ «ខ្ញុំទទួលយក» របស់ RoCK និង ដៃគូ ដែលកំពុងធ្វើការ លើការតស៊ូមតិ ដើម្បីសមភាពអាពាហ៍ពិពាហ៍សម្រាប់អ្នកស្រឡាញ់ភេទដូចគ្នានៅកម្ពុជា។ យើងចង់រំឭកថា ដូចឥន្ទធនូ យើងទាំងអស់គ្នាជាវិសាលគមនៃមនុស្សជាតិ»។
លោកបន្តទៀតថា៖ «អ្នកណាក៏ស្គាល់ និងកោតសរសើរពីឥន្ទធនូ។ ដូច្នេះ ខ្ញុំគិតថា ចុះបើខ្ញុំអាចនាំឱ្យមនុស្សភ្ជាប់ទំនាក់ទំនងជាមួយវា ព្រោះពណ៌ចម្រុះដែលនៅជាប់គ្នារបស់វាបង្កើតឱ្យមានភាពស្រស់ស្អាត។ ចំណុចនេះឯង ដែលយើងចង់ឱ្យមនុស្សជាតិបានឱបក្រសោបវា»។
លោកបានបង្កើតប៊ូតុងឱ្យទស្សនិកជន ចុចបញ្ជាប្រព័ន្ធភ្លើង និងទឹកភ្លៀងធ្វើការ។ ឥន្ទធនូលេចឡើងនៅប្រហែលម៉ោង ៣:៤០ ដល់ ៤:៤០ នាទីរសៀលដោយពន្លឺថ្ងៃ ពេលព្រះអាទិត្យលេចនៅចំមុំជាក់លាក់មួយ។ ឥន្ទធនូក៏លេចឡើង នៅពេលងងឹតពីម៉ោង ៦ ដល់ ១ យប់ ដោយពន្លឺអគ្គិសនីមិនសូវច្បាស់ដូចពេលថ្ងៃឡើយ។
សិល្បករ លីណូ បន្តថា៖ «វេទមន្ត និងភាពស្រស់ស្អាតនៃឥន្ទធនូ គឺអាចធ្វើទៅបាន និងអាចមើលឃើញ នៅពេលដែលធាតុទឹក ពន្លឺ និងខ្យល់មកជាមួយគ្នាក្នុងលក្ខខណ្ឌជាក់លាក់។ ដូចគ្នាដែរ សង្គមអាចមានភាពស្រស់បំព្រង និងរឹងមាំ នៅពេលដែលមនុស្សមកជួបជុំគ្នាដោយសាមគ្គីភាព ដោយមិនគិតពីភាពខុសគ្នា»។
ដើម្បីលើកទឹកចិត្តឱ្យគ្រប់គ្នាផ្សព្វផ្សាយសេចក្តីស្រឡាញ់ តម្លៃនៃភាពខុសគ្នា និងសាមគ្គីភាព លោក និងដៃគូសហការបានបង្កើតការប្រកួតថតរូបជាមួយឥន្ទធនូនេះរួចបង្ហោះក្នុងហ្វេសប៊ុក ឬ/និងអ៊ីនស្តាក្រាម ភ្ជាប់នឹងពាក្យ #ខ្ញុំទទួលយក ដើម្បីឈ្នះរង្វាន់ពី RoCK នៅថ្ងៃទី ១៥ មករា។
ស្នាដៃសិល្បៈផ្គុំឥន្ទធនូ នឹងបន្តដល់ថ្ងៃទី ៩ ខែ មករា ឆ្នាំ ២០២២។
លោកបញ្ជាក់ថា៖ «ខ្ញុំចង់បង្កើតស្នាដៃសិល្បៈ ដែលឆ្លងកាត់ព្រំដែន និងភាពខុសគ្នា ស្នាដៃដែលផ្តល់ឱ្យទស្សនិកជននូវបទពិសោធពិសេស និងលើកកម្ពស់ការយល់ចិត្ត។ ខ្ញុំសង្ឃឹមថា ស្នាដៃសិល្បៈផ្គុំឥន្ទធនូ នឹងអាចធ្វើរឿងទាំងនេះបាន»។
អ្នកចង់ចូលទស្សនាសូមទៅកាន់ សួន ឧត្តម (Odom Garden Park) ដែលបើកពីម៉ោង ៨ ព្រឹក ដល់ម៉ោង ១០ យប់ នៅលើមហាវិថីនរោត្តម ១៦០-១៥៨៕