រូបភាពដកស្រង់ពីវីដេអូឃ្លីបខ្លីនៃភាពយន្ត The Cleaning Lady ដែល អេឡូឌី សម្ដែងជាតួឯកស្រី។ រូបថត FOX
ភ្នំពេញ: នៅពេលដែល អេឡូឌី យុង (Elodie Yung) បានចុះកុងត្រាថតភាពយន្តភាគ «The Cleaning Lady» នាងបាននឹកដល់ឱកាសក្នុងការសម្ដែងជាតួអង្គហែលឆ្លងកាលៈទេសៈច្រើនសណ្ឋាន។
តំណែងតួឯករបស់នាងលើកនេះ គឺជាតួអង្គជនអន្តោប្រវេសន៍កម្ពុជា មួយរូបដែលបានមកដល់ទឹកដីហ្វីលីពីន រួចបន្តទៅអាមេរិក ដើម្បីជម្នះស្ថានភាពលំបាក និងតស៊ូជម្នះការពារកូនប្រុសរបស់នាង។
តារាស្រីវ័យ ៤០ ឆ្នាំរូបនេះ បានថ្លែងក្នុងជំនួបពិភាក្សា FoX TCA កាលពីពាក់កណ្ដាលខែធ្នូ ពេលដែលវីដេអូឃ្លីបខ្លីនៃសាច់រឿងត្រូវបានសម្ពោធ យ៉ាងដូច្នេះថា៖ «ឪពុកខ្ញុំមកពីប្រទេសមួយ (កម្ពុជា) និងត្រូវកសាងជម្រកថ្មីនៅទឹកដីបារាំង។ ដូច្នេះខ្ញុំអាចស្វែងយល់ ដាក់អារម្មណ៍ទៅនឹងសាច់រឿងនេះបានច្រើន»។
នាងបានបន្តទៀតថា៖ «ខ្ញុំរីករាយណាស់ដែលខ្ញុំអាចសម្ដែងជាតួឯក ដែលមានសភាពដូចនឹងការពិតរបស់ខ្ញុំ ធាតុពិត សាវតា ក៏ដូចជាអ្វីដែលខ្ញុំអាចរំលេចចេញមកក្នុងនាមជាតារាសម្ដែង ១ រូប»។
រឿង The Cleaning Lady យកលំនាំតាមរឿងភាគអាហ្សង់ទីនឆ្នាំ ២០១៧ ក្រោមចំណងជើងដូចគ្នា ដោយផ្ដោតលើតួអង្គ Thony De La Rosa សម្ដែងដោយកញ្ញា អេឡូឌី។
Thony ជាគ្រូពេទ្យកម្ពុជាដ៏ឆ្លាតវៃមកពីកម្ពុជា ដែលមកបម្រើការនៅទីក្រុងម៉ានីល ប្រទេសហ្វីលីពីន។ នារីវេជ្ជបណ្ឌិតរូបនេះបានរៀបការជាមួយបុរសហ្វីលីពីនឈ្មោះ Marco Salonga បន្ទាប់មកនាងបានសម្រេចចិត្តយ៉ាងតានតឹងមួយដោយធ្វើដំណើរទាំងពុំមានឯកសារស្របច្បាប់ទៅកាន់សហរដ្ឋអាមេរិក ដើម្បីស្វែងរកការព្យាបាលសង្គ្រោះជីវិតកូនប្រុសរបស់នាង ដែលត្រូវបានធ្វើរោគវិនិច្ឆ័យឃើញមានជំងឺខ្សោយប្រព័ន្ធស៊ាំដ៏កម្រមួយ។
ទៅដល់ក្រុងឡាសវេហ្គាសដោយមិនចុះចាញ់នឹងបញ្ហានៅទីនោះ នាងបានបង្ខំចិត្តលាក់ខ្លួន ហើយក្លាយជានារីអនាម័យលាងបង្គន់ ក្នុងក្រុមជនអន្ធពាល ដោយរត់គេចពី FBI និងលាក់ការសម្ងាត់ពីបងស្រីថ្លៃហ្វីលីពីនឈ្មោះ Fiona Salonga ដែលមករស់នៅអាមេរិកខុសច្បាប់។
ដោយប្រើបញ្ញា ជំនាញ និងសមត្ថភាពពិសេស នាងបានជួយសង្គ្រោះជីវិតមនុស្សជាច្រើនពីជនឧក្រិដ្ឋ។ ប៉ុន្តែក្រោយពេលនាងបានឃើញថ្លុកឈាមនៃឃាតកម្មផ្ទាល់នឹងភ្នែក នាងក៏សម្រេចចិត្តលូកដៃក្នុងពិភពបងធំនៅក្រុងឡាសវេហ្គាស ដោយចាត់ការក្រុមអន្ធពាល ដើម្បីសង្គ្រោះក្រុមគ្រួសាររបស់នាង។
តារាហូលីវូដខ្មែរបារាំង អេឡូឌី យុង សម្ដែងជាតួ Thony។ រូបថត FOX
យោងតាមវេបសាយ deadline.com រឿងភាគ The Cleaning Lady គឺជាការបើកទំព័រថ្មីរបស់ FOX ដែលបានជ្រើសរើសតួឯកស្រីអាស៊ីសម្ដែងក្នុងភាពយន្តម៉ោងមាស ឬម៉ោងបញ្ចាំងសម្បូរមនុស្សទស្សនា។
កញ្ញា អេឡូឌី កើតនៅក្រុងប៉ារីស ប្រទេសបារាំង នៅថ្ងៃទី ២២ ខែ កុម្ភៈ ឆ្នាំ ១៩៨១ ដោយមានឪពុកជាខ្មែរ និងម្ដាយជាជនជាតិបារាំង។
នាងបានប្រឡូកវិស័យការថតភាពយន្ដភាគទូរទស្សន៍ក្នុងវ័យ ២០ ឆ្នាំ និងធ្លាប់សម្ដែងក្នុងរឿងហូលីវូដល្បីៗជាច្រើនកន្លងមក។
នាងបានបញ្ចប់ការសិក្សាពីសាលា London Academy of Music and Dramatic Art និងទទួលបានសញ្ញាបត្រជាន់ខ្ពស់ផ្នែកច្បាប់ពីសាកលវិទ្យាល័យក្រុងប៉ារីស។ នាងក៏បានហ្វឹកហាត់គុនការ៉ាតេអស់រយៈពេលជាង ១០ ឆ្នាំផងដែរ។
វេបសាយ film-book.com បានឱ្យដឹងថា ភាពយន្តដែលផលិតដោយ Warner Bros, Television and FOX Entertainment នេះមាន ១០ ភាគ ដោយចាប់បញ្ចាំងនៅថ្ងៃទី ៣ ខែ មករា ឆ្នាំ២០២២៕
