.jpg)
ស្នាដៃសហស្ថាបនិកចលនា Generation C Cambodia និងរូបថតដោយលោក Raphael Montha Pech។ រូបថត សហការី
ភ្នំពេញ: ទោះជាស្ថានភាពកូវីដបន្តអូសបន្លាយ ប៉ុន្តែ អាដាណា សុវណ្ណរស្មី ម៉ម ឡឺ ហ្គ្រោស ជាប្រធាន និងសហស្ថាបនិកចលនា Generation C Cambodia តែងតែប្រើប្រាស់តួនាទីរបស់ខ្លួនជាសិល្បការិនី និងសកម្មជនក្នុងការចែកចាយសារ ដែលមានសារៈសំខាន់ដល់ពិភពលោកចាប់តាំងពីការយល់ពីគ្នា ចិត្តមេត្តា សិល្បៈនៃការចែករំលែក ការលើកតម្លៃស្ត្រី ជំងឺផ្លូវចិត្ត និងសារជាច្រើនទៀត។
ចុងឆ្នាំនេះដែរ មុនធ្វើដំណើរទៅអឺរ៉ុបនៅដើមឆ្នាំក្រោយ កញ្ញាបានបញ្ចប់ជាមួយនឹងពិព័រណ៍ «ConvivArt» ដែលមិនត្រឹមតែជាការតាំងពិព័រណ៍សិល្បៈប៉ុណ្ណោះទេ ប៉ុន្តែវាជាទស្សនវិជ្ជា របៀបនៃការរស់នៅជាមួយគ្នាដោយសន្តិភាព។
អាដាណា ប្រាប់ ភ្នំពេញ ប៉ុស្តិ៍ ថា៖ «សព្វថ្ងៃ ពិភពលោកយើងកំពុងឈានទៅរកសង្គមបែងចែក មិនស្មើភាពគ្នា។ ដំណោះស្រាយមួយ គួរតែដាំដុះរបៀបនៃការរស់នៅជាមួយគ្នាដោយសន្តិភាព។ វិបត្តិដែលកំពុងបន្តកើតឡើងគឺជាការដាស់តឿនមនុស្សជាតិឱ្យភ្ញាក់ខ្លួនចាប់ផ្តើមពីសុបិន និងកសាងអនាគតថ្មីប្រកបដោយក្រមសីលធម៌ និងភាពទទួលខុសត្រូវ»។
កញ្ញាបន្តថា៖ « Convivialism ជាទស្សនវិជ្ជាសម្រាប់មនុស្សគ្រប់រូប ជាសារអន្តរជាតិ ដែលអាចយល់បានពីគ្រប់ជាតិសាសន៍ និងវប្បធម៌។ វត្ថុបំណងនៃកម្មវិធីគឺលើកទឹកចិត្តយុវជនឱ្យក្លាយជាពលរដ្ឋរស់រានមានជីវិត និងសញ្ជឹងគិតដល់សាមគ្គីភាព»។
ពិព័រណ៍ចម្រុះ រៀបចំធ្វើឡើងនៅអគារ The Commune ដោយ អាដាណា Raphael Montha Pech អ្នកថតរូប បារាំង ខ្មែរ និង Future ក្រុមហ៊ុនច្នៃម៉ូដស្ថាបត្យកម្ម។ ពិព័រណ៍ក៏បានប្រព្រឹត្តទៅអនឡាញជាមួយសិល្បករអន្តរជាតិផ្សេងៗមកពី ៩ ប្រទេសរួមមាន ប្រេស៊ីល បារាំង អ៊ីតាលី ជប៉ុន លីទុយអានី កម្ពុជា កាណាដា អាមេរិក និងកូឡុំប៊ី មានទាំងអ្នករាំ អ្នកចម្រៀង វិចិត្រករ និងអ្នកតែងកំណាព្យ។
ការសម្ដែងសិល្បៈក្នុងថ្ងៃបើកសម្ពោធពិព័រណ៍ចម្រោះនៅអគារ The Commune។ រូបថត សហការី
ពិព័រណ៍មានការដាក់តាំង និងលក្ខណៈអនឡាញបែប 3D តាមតំណភ្ជាប់ https://3d.future-thoughts.com/aolt/ ចាប់ពីថ្ងៃទី ១១ ខែធ្នូ ឆ្នាំ ២០២១ រហូតដល់ ថ្ងៃទី ១៥ ខែមករា ឆ្នាំ ២០២២។
សិល្បការិនីខ្មែរបារាំងរូបនេះទទួលបានការបំផុសគំនិតពីចលនារបស់អឺរ៉ុប ដែលហៅថា Convivialist ដែលផ្ដោតទៅលើរបៀបនៃការរស់នៅជាមួយគ្នាដោយសន្តិភាពប្រកបដោយគុណតម្លៃ ៦ ដែលមនុស្សមាន និងចែករំលែករួមគ្នាគឺ ភាពធម្មជាតិ មនុស្សជាតិ ការរួបរួមជាសង្គម ភាពបុគ្គលស្របច្បាប់ ការប្រឆាំងដោយភាពច្នៃប្រឌិត និងភាពចាំបាច់នៃការគ្រប់គ្រងភាពឥតប្រយោជន៍ ។
អាដាណា បានតាំងស្នាដៃរបស់នាងចំនួន ៦ ផ្ទាំងទៅតាមគុណតម្លៃរបស់ convivialist ដើម្បីឱ្យទស្សនិកជនបានស្វែងយល់ពីគ្រប់ជ្រុង។
យុវតីរូបនេះបន្តថា៖ «ការងាររបស់ខ្ញុំ ១ គឺឈ្មោះថា Human Rouge ដែលបកស្រាយពីធម្មជាតិទូទៅ បង្កប់ន័យថា មនុស្សមិនមែនរស់នៅក្រៅធម្មជាតិទេ ហើយពួកគេគួរតែក្លាយជាម្ចាស់។ ដូចភាវៈមានជីវិតទាំងអស់ដែរ មនុស្សទាំងអស់ជាចំណែក ហើយពឹងពាក់អាស្រ័យលើធម្មជាតិ ដែលពួកគេត្រូវតែចូលរួមថែរក្សា មិនដូច្នោះទេ គឺពួកគេដែលនឹងរងគ្រោះ»។
ហេតុផលពីក្រោយ Human Rouge សំដៅទៅលើការផុតពូជដ៏ធំទី ៦ គឺជាការបាត់បង់ជីវចម្រុះព្រោះតែសកម្មភាពរបស់មនុស្ស ហើយមានតែមនុស្សទេ ដែលអាចកែប្រែបាន។
ចូលរួមពិព័រណ៍នេះលោក Raphael Montha Pech ដែលល្បីស្នាដៃថតរូបអប្សរា និងក្រមា បានតាំងរូបភាពជាស៊េរីពីអ្នកលក់កម្ពុជានៅតាមផ្លូវ។ រូបថតទាំងនេះបង្ហាញពីសង្គមរួម ដែលជាការរំឭកថា ទ្រព្យសម្បត្តិដ៏ធំបំផុតរបស់មនុស្សគឺជាទំនាក់ទំនង។
អាដាណា (ទី ២ ឆ្វេង) ក្នុងពិព័រណ៍ចម្រុះរៀបចំធ្វើឡើងនៅអគារ The Commune។ រូបថត សហការី
លោក Raphael ថា៖ «ស៊េរីរូបនេះ គឺចង់ឧទ្ទិសទៅអ្នកតាមផ្លូវទាំងអស់។ នៅពេលយើងសម្រេចចិត្តថតជាឯកសារដល់អ្នកលក់តាមចិញ្ចើមផ្លូវ គោលដៅយើង គឺផ្ដល់ពន្លឺដល់អ្នក ដែលមិនត្រូវបានគេមើលឃើញ»។
លោក ហារី ម៉ាន់ ជាប្រធាន និងស្ថាបនិក Future ប្រាប់ថា គាត់ជ្រើសរើសគម្រោងស្ថាបត្យកម្ម ៦ ដើម្បីតំណាងឱ្យគុណតម្លៃនៃ convivialism ដែរ។
លោកថា៖ «វាមានការពិបាកបន្តិចដែរ ក្នុងការជ្រើសយកវត្ថុ ១ ឱ្យត្រូវតាមគុណតម្លៃមួយៗ។ ដូចជា common sociality យើងត្រូវមើលទៅលើបរិស្ថាន ដែលស្ថាបត្យកម្មយើងត្រូវបានឌីហ្សាញបង្កើតជាសហគមន៍ទំនាក់ទំនង។ ដូច្នេះ យើងព្យាយាមរចនាការិយាល័យយើងឱ្យអាចភ្ជាប់ទំនាក់ទំនងជាមួយអ្នកប្រើប្រាស់»។
ក្នុងការចាប់ផ្ដើម អាដាណា ដំបូងចង់ឱ្យសិល្បករនីមួយៗធ្វើពិព័រណ៍តាមប្រទេសរៀងខ្លួនតែកំណត់យក ភ្នំពេញជាគោល ប៉ុន្តែបន្ទាប់ពីទាក់ទងសិល្បករទាំងនោះ កញ្ញាក៏ប្ដូរមកធ្វើលក្ខណៈអនឡាញវិញ។
កញ្ញាបន្តទៀតថា៖ «ដោយសារកូវីដ ទើបយើងមិនសូវបើកទូលាយសម្រាប់អ្នកចូលរួមច្រើនទេ ប៉ុន្តែយើងរីករាយបើទោះគ្នាតិច ប៉ុន្តែមើលទៅគេចាប់អារម្មណ៍សួរនាំយើងច្រើនពីពិព័រណ៍ ConvivArt នេះ ដែលនេះជាអ្វី ដែលសំខាន់បំផុតសម្រាប់ខ្ញុំ»។
ក្នុងដំណើរទៅអឺរ៉ុប និងអាមេរិកនាពេលខាងមុខនេះ គឺកញ្ញា ចង់ពង្រីកបណ្ដាញទំនាក់ទំនង សិល្បៈ និងចលនា Generation C ដោយរំពឹងថា ធ្វើឱ្យកម្ពុជាឱ្យកាន់តែលេចធ្លោ។
អាណាដា បានបង្ហើបក្ដីស្រមៃរបស់នាងថា៖ «ខ្ញុំគ្រោងតាំងពិព័រណ៍នៅតាមទីក្រុងធំៗនៅអឺរ៉ុប។ ខ្ញុំមិនត្រឹមតែមានមហិច្ឆតាចង់ក្លាយជាសិល្បការនីខ្មែរដ៏ល្បីម្នាក់ប៉ុណ្ណោះទេ ប៉ុន្តែខ្ញុំចង់អាចផ្ដល់ហិរញ្ញប្បទានស្វ័យប្រវត្តិដល់ចលនារបស់ខ្ញុំ ជាមួយនឹងការលក់សិល្បៈ។ ការតាំងពិព័រណ៍បន្ទាប់របស់ខ្ញុំនឹងធ្វើឡើងនៅទីក្រុងឡុងដ៍ និងទីក្រុងប៉ារីស»៕
