.jpg)
ស្នាដៃចំណងជើង Hermaphrodite។ ការបង្ហាញម៉ូដ និងពិព័រណ៍បែបថ្មីក្រោមប្រធានបទ លោកុប្បត្តិ ២០២១ នៅវិចិត្រសាល FT។ រូបថត សហការី
ភ្នំពេញ: តាមជញ្ជាំងវិចិត្រសាល FT រូបភាពដ៏ស្រស់ស្អាត ស្រូបយកក្រសែភ្នែកទស្សនិកជនឱ្យចូលទៅក្បែរគយគន់ ដែលស្នាដៃទាំងនេះមិនមែនជាគំនូរតែម្យ៉ាងទេ។ រូបភាពព្យួរលើជញ្ជាំងជារូបថតមានការផាត់ពណ៌ ឬគំនូរឌីជីថលតាក់តែងបន្ថែម ដែលឆ្លុះបញ្ចាំងឱ្យឃើញពីវប្បធម៌ និងសាសនាចម្រុះ។
ខណៈទស្សនិកជនកំពុងជក់ចិត្តនឹងរូបភាព សកម្មភាពនៅវិចិត្រសាលរំលេចសិល្បៈច្រើនទម្រង់ទាំងការសាក់ គូររូប និងការដើរម៉ូដ ដោយសិល្បករបានរួមគ្នាបង្កើតពីស្នាដៃរូបថត ទៅគំនូរ និងហ្វេស្សិន។
កម្មវិធីដើរម៉ូដ និងតាំងពិព័រណ៍បែបប្លែកថ្មីនេះធ្វើឡើងក្រោមប្រធានបទ «លោកុប្បត្តិ ២០២១» មានន័យថាកំណើតថ្មី (Genesis MMXXI) តាំងពីថ្ងៃទី ១១-១២ ខែ ធ្នូ ឆ្នាំ ២០២១ ហើយនឹងមានការដាក់តាំងបង្ហាញដល់ថ្ងៃទី ៦ ខែ កុម្ភៈ ឆ្នាំ ២០២២។
កម្មវិធីត្រូវបានផ្ដួចផ្ដើមគំនិតដោយ រ៉េនៀ អាប៊ែលឡូ ជាអ្នកច្នៃម៉ូដហ្វីលីពីន និងស្ថាបនិកហាង អាម៉ាដា (ARMADA) ទីតា ប៊ុត អ្នកថតរូប និងស្ថាបនិកទីតាអាត និង ហ្វុងគី វិចិត្រករ និងម្ចាស់វិចិត្រសាល FT។
រ៉េនៀ ប្រាប់ ភ្នំពេញ ប៉ុស្តិ៍ ថា៖ «ការប្រើប្រាស់សិល្បៈទាំង ៣ ពីការថតរូប ការគូរគំនូរ ដើម្បីភ្ជាប់ទៅការច្នៃម៉ូដនេះ ជាការបញ្ជាក់បង្ហាញពីការរួបរួមរបស់យើងចំពោះយេនឌ័រ និងរបៀបដែលយើងយល់ឃើញ និងបើកចិត្តទូលាយទទួលយកវា»។
រ៉េនៀ ថា គំនិតគិតដល់ពិព័រណ៍មួយនេះគឺ ដំបូងកើតចេញពីការផ្ដើមធ្វើសមាធិគិតពីដំណើរជីវិត និងការងាររបស់លោកក្នុងអំឡុងពេលកូវីដ។
សិល្បការិនី ទីតា ចូលរួមជាមួយសិល្បករហ្វីលីពីន និងខ្មែរបារាំង។ រូបថត សហការី
អំឡុងព្រឹត្តិការណ៍ ២០ កុម្ភៈ លោកបានចាប់ផ្ដើមគិតថា ម៉ូដហ្វេស្សិនរបស់លោក អាចនឹងប្រព្រឹត្តទៅមិនបានល្អទេ សម្រាប់រដូវផ្ការីក និងរដូវក្ដៅនេះ ដូច្នេះទើបលោកចង់បង្កើតកម្មវិធីការដើរម៉ូដបែបទម្រង់ថ្មី។
រ៉េនៀ បន្ថែមទៀតថា៖ «ពេលខ្ញុំកំពុងមើលហ្វេសប៊ុក ខ្ញុំប្រទះនឹងស្នាដៃការងាររបស់ ទីតា ដែលត្រូវជាមួយនឹង Concept សម្លៀកបំពាក់ខ្ញុំមែនទែន។ ខ្ញុំសម្រេចចិត្តទាក់ទងទៅគាត់ ពិភាក្សាពីគំនិតដែលខ្ញុំមាន ក៏ដូចជាអំពីប្រធានបទសហគមន៍ស្រលាញ់ភេទដូចគ្នា (LGBTQI+)។ ទីតា បានយល់ស្រប ហើយក៏ផ្ដល់យោបល់ក្នុងការទាក់ទងទៅ ហ្វុងគី រួចក៏មានសិល្បករផ្សេងៗដល់ទៅជិត ២០ នាក់ទៀត។ វាក្លាយជាគម្រោងដ៏ធំ ដែលខ្ញុំមិននឹកស្មានដល់»។
ក្នុងនោះមានគំនូរឌីជីថល ពីនរោត្តម ក្រាហិ្វកឌីហ្សាញ ដោយ Jean Baptiste Carraro គំនូរបែបក្រាហ្វីធី ដោយ សុខហេង និង ហ្វុងគី ចម្លាក់ដោយ រ៉ូម៉ា គូរដោយ រីសា សាក់ដោយ ថរ គំនូរអរូបី ដោយ ដុនវីរ៉ាវ គំនូរប្រពៃណីជាមួយប្រេងដោយ គីមសាន និងគំនូរអក្សរឆ្លាក់ដោយ យ៉ាលាវ។
ចំណោមរូបទាំងនោះ ស្នាដៃឈ្មោះថា Hermaphrodite ដែលសម្គាល់ មនុស្ស សត្វ ឬរុក្ខជាតិ មានសរីរាង្គភេទទាំងប្រុស និងស្រី ដោយលោក ហ្វុងគី បានប្រើក្បាច់ក្រាហ្វីទីបញ្ចូលគ្នាជាមួយស្នាដៃថតរូបរបស់ ទីតា ដោយមិនធ្វើឱ្យវាលុបពីលើគ្នា។
ទីតា ឱ្យដឹងដែរថា កញ្ញារីករាយណាស់ ដែលស្នាដៃរបស់កញ្ញាមានការទទួលស្គាល់ និងទុកចិត្តពីសិល្បករដែលមានគំនិតច្នៃប្រឌិតម្នាក់ទៀត។
សិល្បការិនីជំនាញថតរូបសិល្បៈរូបនេះបាននិយាយថា៖ «នេះគឺជាលើកទី១ ដែលខ្ញុំចូលរួមជាមួយហ្វេស្សិនដល់កម្រិតនេះ។ ការបញ្ចូលគ្នានៃសិល្បៈផ្សេងៗក្នុងការបង្ហាញម៉ូដសម្លៀកបំពាក់ ជាអ្វីដែលប្រទេសកម្ពុជា មិនមានជាយូរមកហើយ ហើយការនាំយកវាមកវិញ តាមកម្មវិធីនេះ ជាបទពិសោធដ៏ពិសេសមួយសម្រាប់ខ្ញុំ»។
ហ្វុងគី ក៏និយាយដូចគ្នាថា លោកធ្លាប់តែចូលរួមជាមួយប្រេ៊នដ៍ស្បែកជើង អាវយឺតបែបធម្មតាៗ មិនធ្លាប់ជាមួយអ្នកច្នៃម៉ូដដូច រ៉េនៀ នោះទេ។
សិល្បករខ្មែរ-បារាំងរូបនេះបន្ថែមថា៖ «យើងត្រូវមានការរៀបចំច្រើន។ យើងបានអញ្ជើញសិល្បករ ធ្វើការពន្យល់ពួកគេពីប្រធានបទ ហើយពួកគេក៏រីករាយក្នុងការចូលរួម ដោយមានទាំងសិល្បករជាតិ និងអន្តរជាតិ។ យើងបានផ្ដល់សេរីភាពពួកគាត់ក្នុងការបញ្ចេញស្នាដៃ ទៅតាមប្រធានបទ។ វាជាដំណើរដ៏ល្អប្រសើរ និងរីករាយ»។
បើទោះជាការរៀបចំ ក្នុងអំឡុងពេលកូវីដ តែ រ៉េនៀ ថា ពួកគេនៅតែមមាញឹកដោយការជួបជុំគ្នា តាមកម្មវិធី Zoom ធ្វើផែនការ តាមមុខងាររៀងខ្លួន ដូចជាលោកទទួលបន្ទុកការរចនា រីឯ ទីតា និង ហ្វុងគី ចាត់ចែងការរៀបចំប្លង់ និងភ្លើង។ ដូច្នេះនៅពេលដែលការរឹតបន្តឹងត្រូវបានបន្ធូរបន្ថយ ពួកគេបានចាប់ផ្តើមថតភ្លាមៗនៅ Studio KH។
សកម្មភាពសិល្បៈច្រើនទម្រង់មានទាំងការសាក់ គូររូប និងការដើរម៉ូដ។ រូបថត សហការី
កម្មវិធីធ្វើឡើងដោយផ្អែកលើទេវកថា ៣ ពី ក្រិក ហិណ្ឌូ និងហ្វីលីពីន ដោយសារ ហ្វុងគី និង ទីតា ជាខ្មែរ ហើយទាំងអស់គ្នាចង់ឆ្លុះបញ្ចាំងតម្លៃស្នូលនៃវប្បធម៌របស់ពួកគេ ដែលកើតចេញពីសាសនាហិណ្ឌូ។
ដោយឡែក រ៉េនៀ ជាជនជាតិ ហ្វីលីពីន ហើយវប្បធម៌ក្រិក ជាស្នូលបំផុសគំនិតក្នុងវិស័យហ្វេស្សិន និងកាយវិការទម្រង់រូបថត។
អ្នកច្នៃម៉ូដហ្វីលីពីនរូបនេះបន្ថែមថា៖ «ខ្ញុំគិតថា ពិព័រណ៍នេះពិតជាជំរុញការច្នៃប្រឌិតរបស់សិល្បករទៅកម្រិត ១ ទៀត ហើយបានបង្ហាញឱ្យឃើញពីភាពស្រស់ស្អាត ដែលយើងធ្វើរួមគ្នា តាមរយៈទេពកោសល្យយើងរៀងខ្លួន ដោយផ្ដោតទៅលើទិសដៅតែមួយ ដើម្បីជាកម្លាំងជំរុញចិត្ត និងបើកការសន្ទនា»។
លោក អាដាំ រ៉តវ៉ែល ជាអ្នករៀបចំកម្មវិធីម្នាក់ទៀតឱ្យដឹងដែរថា មួយចំណែកនៃការលក់ស្នាដៃសិល្បៈបាន និងបរិច្ចាគទៅសហគមន៍ឥន្ទធនូ-កម្ពុជា ដែលជាអង្គការក្រៅរដ្ឋាភិបាលគាំទ្រដល់សហគមន៍ស្រលាញ់ភេទដូចគ្នា LGBTQI+ ព្រោះគុណតម្លៃរបស់ពួកគេមានទិសដៅស្របជាមួយនឹងពិព័រណ៍ «លោកុប្បត្តិ ២០២១» នេះតែម្ដង៕
