.jpg)
គ្រួសារក្រីក្រនាំគ្នាវាយបំបែកបេតុងស្វែងរកដែកដើម្បីលក់អេតចាយសម្រាប់ផ្គត់ផ្គង់ជីវភាពរស់នៅប្រចាំថ្ងៃ។ រូបថត សហការី
ភ្នំពេញ: ជាមួយការបោះជំហានឈានចាប់គម្រោងនិរន្ដរភាពក្នុងការជួយពលរដ្ឋរស់នៅក្នុងតំបន់សំណង់មិនរៀបរយអាចឈររឹងដៃរឹងជើង បន្ថែមពីលើបេសកកម្មកាត់បន្ថយជនអសមត្ថភាពនៅក្នុងប្រទេសកម្ពុជា ដែលលើកកម្ពស់ជីវភាពរស់នៅតាមរយៈការបណ្ដុះបណ្ដាលវិជ្ជាជីវៈ និងការអប់រំដល់ស្ដ្រីមេម៉ាយ កុមារកំព្រា ជនក្រីក្រ និងជនភៀសខ្លួន អង្គការទ្រទ្រង់ជនអសមត្ថភាពកម្ពុជា (DCO) ស្វែងរកជម្រក និងដីកសិកម្មសមរម្យដោយការចំណាយប្រាក់ជួលដីឱ្យពួកគេរយៈពេល ២ ឆ្នាំដំបូង។
ក្រោយទទួលផលគម្រោងនិរន្តរភាព ពលរដ្ឋអសមត្ថភាពទាំងនេះ មានលទ្ធភាពបង់ថ្លៃជួលដីខ្លួនឯង ដោយគ្មានកិច្ចអន្តរាគមន៍ពីអង្គការ។ បច្ចុប្បន្ន ជីវភាពពួកគេបានប្រសើរដោយពួកគេអាចដាំដុះបន្លែ និងមានទីផ្សារសម្រាប់បោះដុំបន្លែផងដែរ។
លោក សោម សំអុល ជាប្រធានកម្មវិធីរបស់អង្គការ DCO បានប្រាប់ ភ្នំពេញ ប៉ុស្តិ៍ថា៖ «គម្រោងនេះបានណែនាំពួកគេទៅកាន់បណ្តាញទីផ្សារ និងជួយបង់ថ្លៃជួលដីរបស់ពួកគេសម្រាប់រយៈពេល ២ ឆ្នាំដំបូង។ យើងជឿថា នេះជាដំណោះស្រាយយូរអង្វែងដើម្បីជួយសម្រួលការលំបាករបស់អ្នករស់នៅអនាធិបតេយ្យទាំងនេះ»។
ត្រូវបានបង្កើតឡើងក្នុងឆ្នាំ ១៩៩៩ និងក្លាយជាអង្គការចុះបញ្ជីនៅឆ្នាំ ២០០៩ អង្គការ DCO ស្ថិតក្រោមការដឹកនាំរបស់សហស្ថាបនិកកម្ពុជា លោក ភោគ សំអឿន និងលោក លោក ដេវីឌ ជ.អាស្តុន (David G. Aston) ជាជនជាតិកាណាដា។
លោក សោម សំអុល បានបន្ដថា៖ «យើងមានបំណងចូលរួមចំណែកក្នុងការកសាងអភិវឌ្ឍកម្ពុជាទៅជាប្រទេសសេរី និងប្រជាធិបតេយ្យ កាត់បន្ថយជនអសមត្ថភាពក្នុងប្រទេស ដោយលើកកម្ពស់សេដ្ឋកិច្ចគ្រួសាររបស់ស្ត្រីមេម៉ាយ កុមារកំព្រា ជនក្រីក្រ និងជនភៀសខ្លួនតាមរយៈការបណ្តុះបណ្តាលវិជ្ជាជីវៈ និងការអប់រំផ្សេងៗទៀត»។
សមាជិកអង្គការចុះត្រួតពិនិត្យគម្រោងនិរន្ដរភាពកសិកម្ម។ រូបថត សហការី
លោកបានឱ្យដឹងថា អង្គការបានអនុវត្តគម្រោងរបស់ខ្លួនទៅតាមតថភាពជាក់ស្ដែងរបស់ប្រជាជនតាមភូមិ ស្រុក ជាមួយបណ្ដាខេត្តមួយចំនួនដូចជា ខេត្តពោធិ៍សាត់ បាត់ដំបង សៀមរាប កំពង់ធំ បន្ទាយមានជ័យ និងចាប់ផ្ដើមពង្រីកសកម្មភាពដល់ភ្នំពេញ ជួយតំបន់មិនរៀបរយ។
ថ្វីដ្បិតតែរីករាយជាមួយគម្រោងមុនៗ ដែលជួយឱ្យប្រជាជនទ្រទ្រង់ជីវភាពគ្រួសារយ៉ាងណាក៏ដោយ ក៏អង្គការមានបំណងផ្ដល់ក្ដីសង្ឃឹមថ្មី ដែលមិនបែកបាក់សមាជិកក្នុងគ្រួសារ និងប្រឈមហានិភ័យនានា។
ប្រធានកម្មវិធីរូបនេះថា៖ «គម្រោងជាច្រើនទៀតដូចគ្នានេះនឹងនាំឱ្យអ្នករស់នៅក្នុងតំបន់អនាធិបតេយ្យកម្ពុជាត្រឡប់ទៅរកក្តីសង្ឃឹមថ្មី ក៏ដូចជានាំមកនូវការជួបជុំគ្រួសារ និងកាត់បន្ថយហានិភ័យនៃការជួញដូរមនុស្ស»។
ប៉ុន្តែស្ថានភាពនៅកម្ពុជាមានការប្រែប្រួលខ្លាំងក្នុងឆ្នាំ ២០២០ ដោយសារជំងឺកូវីដ ១៩។ ចាប់តាំងពីពេលនោះមក អង្គការបានចាប់ផ្តើមការងារសប្បុរសធម៌របស់ខ្លួន ដោយការរៃអង្គាសថវិកា ដើម្បីជួយដល់អ្នករស់នៅក្នុងសំណង់មិនរៀបរយ។
អង្គការ DCO យកស្បៀង និងសម្ភារប្រើប្រាស់ចែកជូនពលរដ្ឋក្រីក្រ។ រូបថត សហការី
អង្គការធ្វើការយ៉ាងជិតស្និទ្ធជាមួយរាជរដ្ឋាភិបាល ម្ចាស់ជំនួយ បណ្តាញអង្គការក្រៅរដ្ឋាភិបាល វិស័យពាក់ព័ន្ធ និងសហគមន៍គោលដៅ ដើម្បីនាំមកនូវការផ្លាស់ប្តូរ និងឱកាសពិតប្រាកដដល់ជីវិតរបស់ពួកគេ។
ប្រធានកម្មវិធីបន្ដថា៖ «សម្រាប់គម្រោងនីមួយៗ បុគ្គលិក DCO បានធ្វើការស្ទង់មតិវាយតម្លៃ ដើម្បីទំនាក់ទំនងទៅគ្រួសារនីមួយៗ។ ជាក់ស្ដែង គម្រោងបច្ចុប្បន្ននៅបឹងទំពុន DCO បានអញ្ជើញមេគ្រួសារ ៨៧ គ្រួសារមកពិភាក្សាអំពីគម្រោង ដើម្បីស្វែងយល់ឱ្យកាន់តែស៊ីជម្រៅអំពីស្ថានភាព និងតម្រូវការរបស់ពួកគាត់»។
លោក សំអុល អាយុ ៤០ ឆ្នាំ បានបន្ថែមថា ប៉ុន្តែប៉ុន្មានឆ្នាំនេះ រាល់គម្រោងស្ថិតក្នុងការពិចារណា ម្ចាស់ជំនួយមួយចំនួនមិនទទួលគម្រោងក្នុងស្ថានភាពច្របូកច្របល់នេះ ខណៈម្ចាស់ជំនួយជាច្រើននាក់បានដកខ្លួន នាំឱ្យមូលនិធិត្រូវបានថយចុះ។
ដូច្នេះពេលនេះ DCO កំពុងស្វែងរកមូលនិធិ ដើម្បីជួយដល់គ្រួសាររស់នៅតំបន់អនាធិបតេយ្យបឹងទំពុន។ ដោយធម្មតាដើម្បីប្រកបរបរចិញ្ចឹមជីវិត ពួកគាត់ទៅនេសាទ ដាំត្រកួនលក់ រើសអេតចាយ ឬធ្វើការងារដែលមានប្រាក់កម្រៃទាប។
គ្រួសារទាំងនេះច្រើនរស់នៅតំបន់ ដែលគេចាត់ទុកថាខុសច្បាប់ ព្រោះមិនត្រូវបានទទួលស្គាល់ដោយអាជ្ញាធរមូលដ្ឋាន និងងាយរងការបណ្តេញ។
អង្គការ DCO បណ្ដុះបណ្ដាលពលរដ្ឋដាំដុះបន្លែ និងស្វែងរកទីផ្សារជូនពួកគេ។ រូបថត សហការី
លោក សំអុល ថា DCO អំពាវនាវរកការបរិច្ចាគ ក្នុងគោលបំណងជួយដល់គ្រួសារចំនួន ១៥០ ដែលកំពុងប្រឈមនឹងការបណ្តេញចេញ ដោយសារតែលំនៅឋាន និងកន្លែងធ្វើការរបស់ពួកគេត្រូវបានកាន់កាប់ដោយក្រុមហ៊ុនអភិវឌ្ឍន៍អចលនទ្រព្យ ហើយដីក្នុងទីទំនាបពួកគេត្រូវចាក់បំពេញ។
លោកលើកឡើងថា ប្រាក់បរិច្ចាគនឹងត្រូវបានប្រើលើកស្ទួយជីវភាពរស់នៅកាន់តែប្រសើរឡើង តាមរយៈការបណ្តុះបណ្តាលដាំដុះបន្លែប្រកបដោយនិរន្តរភាព។ អង្គការក៏ផ្តល់ឱ្យពួកគេនូវគ្រាប់ពូជ ឧបករណ៍កសិកម្ម ក៏ដូចជាស្វែងរកកន្លែងសមរម្យសម្រាប់ពួកគេក្នុងការតាំងលំនៅ។
DCO និងអង្គការក្រៅរដ្ឋាភិបាលមួយចំនួនទៀតត្រូវបានអនុញ្ញាតឱ្យចូលទៅកាន់តំបន់ក្រហម ដើម្បីជួយដល់គ្រួសារអនាធិបតេយ្យ ៦៧២ ដោយមានការផ្ដល់ស្បៀងអាហារពីក្រុមមនុស្សធម៌ក្នុងស្រុក អង្គការសហប្រជាជាតិក្នុងការការពារ និងលើកកម្ពស់សិទ្ធិមនុស្សនៅកម្ពុជា (OHCHR-Cambodia), Arcaid Charity in UK និង លោក គួច ម៉េងលី តាមរយៈមូលនិធិ ម៉េងលី ជេ. គួច។
លោក សំអុល បញ្ជាក់ថា៖ «អ្នកទទួលផលពីគម្រោងបច្ចុប្បន្ន ៣៧ នាក់ បានរួចផុតពីទុក្ខវេទនានៃវិបត្ដិកូវីដនេះ ដោយពួកគាត់អាចរស់នៅក្នុងក្រុមគ្រួសារតូចៗ ក្នុងបរិយាកាសបើកចំហ និងបន្តការប្រកបរបរចិញ្ចឹមជីវិតក្នុងអំឡុងពេលជំងឺរាតត្បាត»។
សម្រាប់អ្នកចង់ចូលរួមបរិច្ចាគ អាចធ្វើបានតាម ABA: Som Sam Ol, 000130491, ACLEDA: DCO-Kadoorie2, 0400-01-047112-1-2៕
