ភ្នំពេញ: ទិវាអានីមេ នឹងប្រមូលផ្ដុំស្នាដៃពីសិល្បករពីហាងនានា ការតាំងលក់ផលិតផលអានីមេ តូបលក់សៀវភៅគំនូរជីវចល កម្មវិធីកម្សាន្ត ការប្រកួតតែងខ្លួន cosplay ការលេងហ្គេមអេឡិចត្រូនិក ដែលប្រារព្ធឡើងនៅថ្ងៃទី ២២ ខែមករា ខាងមុខ ដែលរៀបចំឡើងដោយ Friends Futures Factory (F3)។
F3 គឺជាគម្រោង ១ ដែលបែកចេញពីអង្គការ Friends International និងជាកន្លែងផ្ដល់សេវាកម្មដល់សហគ្រិន អ្នកច្នៃប្រឌិតដែលចង់បង្ហាញសមិទ្ធផល ការសម្ដែង របកគំហើញថ្មីៗ ឬការបញ្ចេញមតិយោបល់ប្លែកៗតាមរយៈពិព័រណ៍ និងសិក្ខាសាលា។
ប៉ុន្មានឆ្នាំចុងក្រោយដោយឃើញការពេញនិយមតុក្កតាបែបអានីមេ ច្រើនក្នុងស្រទាប់យុវវ័យ F3 ឆ្លៀតឱកាសនេះរៀបចំកម្មវិធី ទិវាអានីមេឡើង។ ជាក់ស្ដែងគម្រោងមានតាំងពីឆ្នាំមុន ខែកុម្ភៈ តែត្រូវពន្យាររហូតទើបនឹងរៀបចំឡើងវិញក្នុងឆ្នាំថ្មីនេះ។
លោក ហុង បញ្ញា អ្នកសម្រប-សម្រួលនៅ F3 ប្រាប់ ភ្នំពេញ ប៉ុស្តិ៍ថា៖ «យើងសង្កេតឃើញពីការពេញនិយមរបស់យុវវ័យទៅលើ អានីមេនេះទាំងសាច់រឿង ការស្លៀកឈុត ហើយមានតូបលក់សៀវភៅ មាំងហ្កា ហាងកាហ្វេ ផ្ដោតលើអានីមេ កាន់តែកើនឡើង និងកម្មវិធីស្លៀកឈុតតាមតុក្កតាក៏ធ្វើច្រើននៅភ្នំពេញ»។
លោកបានបន្តថា៖ «ម្យ៉ាងដោយសារយុវជនខ្មែរ ដែលតែងទៅកន្លែងយើង ពេលដើរមើលក្នុងបរិវេណ ដែលមានលក់ទាំងរបស់ហូប ហាងកាហ្វេ តូបលក់វត្ថុអនុស្សាវរីយ៍របស់យើង គាត់ក៏បានសួរនាំពី អានីមេ និងស្នើឱ្យពួកយើងរៀបចំកម្មវិធី cosplay ដែលធ្វើឱ្យយើងមានគំនិតបំផុស ក្នុងការបង្កើតទិវាអានីមេឡើង»។
F3 នឹងសហការជាមួយ សហគមន៍ និងអាជីវកម្មក្នុងស្រុក ដែលធ្វើការងារទាក់ទងនឹង អានីមេ និងមាំងហ្កា រួមមាន មជ្ឈមណ្ឌលសហប្រតិបត្តិការកម្ពុជា-ជប៉ុន (CJCC) ហាង Anime D.Store លោក សំ ដារ៉ូ ជាសិល្បករគំនូរបង្កប់អត្ថន័យ និងអ្នកគូររូបជាសាច់រឿង និងច្រើនទៀត។
លី ពេជ្រវឌ្ឍនា អាយុ ២០ ឆ្នាំ សហម្ចាស់ហាង Anime D.Store ក៏បានឱ្យដឹងដែរថា នេះគឺជាការសហការលើកទី១ ហើយពួកគេរីករាយខ្លាំងណាស់ ដោយសារតែកាលពីលើកមុន ពួកគេធ្វើតែឯង ហើយពិបាករកកន្លែងធ្វើ។ ប៉ុន្តែ F3 មានទីតាំងផ្ទាល់ ដូច្នេះពួកគេអាចសហការជាមួយគ្នា ហើយអាចធ្វើអីបានច្រើនជាងមុន។
លោក សំ ដារ៉ូ ដែលគំនូរអានីមេរបស់លោកផ្ដោតលើរចនាប័ទ្មអង្គរប្រើក្បាច់ខ្មែរ លាយជប៉ុន និងបស្ចិមប្រទេសបានឱ្យដឹងថា លោករីករាយនឹងសហការក្នុងព្រឹត្តិការណ៍បែបនេះ ដែលផ្ដល់ឱកាសឱ្យលោកបានជួបសិល្បករ ដែលសុទ្ធតែមានចំណូលចិត្តដូចគ្នា អាចផ្លាស់ប្ដូរបទពិសោធ និងជ្រើសរើសអ្នកមានទេពកោសល្យចូលក្នុងសហគមន៍សិល្បៈ។
ពេជ្រវឌ្ឍនា ឱ្យដឹងដែរថា៖ «យើងនឹងមានដាវឈើសម្រាប់ cosplay បន្ដោងសោ រ៉ូបតុក្កតាជប៉ុន ស្ទិកឃ័រ និងមានលក់សម្ភារច្រើនទៀតសម្រាប់អ្នកគាំទ្រអានីមេ និងវប្បធម៌ជប៉ុន»។
លោក សំ ដារ៉ូ ដែលទើបតែចេញផ្សាយសៀវភៅរឿងគំនូរអានីមេរបស់លោក មានឈ្មោះថា «នរៈ» ប្រាប់ដែរថា៖ «ក្នុងទិវាអានីមេខាងមុខ ខ្ញុំនឹងដាក់តាំងសៀវភៅរឿងដំបូងរបស់ខ្ញុំ «Nakrak» ស្ទិកឃ័រតួអង្គពីក្នុងសៀវភៅ និងស្នាដៃផ្សេងទៀត ដែលខ្ញុំធ្វើបានពីមុនមក ហើយខ្ញុំក៏នឹងបញ្ចេញរូប ១ ដែលខ្ញុំហៅថា អប្សរា ២០២២ ដែលខ្ញុំតែងតែធ្វើការអាប់ដេតវាពី ១ ឆ្នាំ
ទៅ ១ ឆ្នាំ។ មួយទៀត ខ្ញុំមានគម្រោងបញ្ចេញរូបភាពខ្លីៗពីសៀវភៅរឿងទី២ តភាគពីរឿងទី១ របស់ខ្ញុំ។ ប៉ុន្តែមិនច្បាស់ទាំងស្រុងទេវានៅក្នុងដំណើរការ»។
កម្មវិធីរួមមានការតាំងលក់ផលិតផលអានីមេ ការប្រកួត Cosplay ជាមួយរង្វាន់ពិសេស ការតុបតែងមុខ ម៉ូដសក់ និងក្រចកជាអានីមេ ការកូដឌីសបែប Pop និង Rock របស់ ឌីជេ ជប៉ុន និងកូរ៉េ តូបលក់សៀវភៅគំនូរជីវចល ការដូរកាត ការដាក់បង្ហាញសិល្បៈបែបអានីមេ ការលេងហ្គេមអេឡិចត្រូនិក តូបលក់ត្បូងថ្ម តូបអាហារ និងអាហារសម្រន់បែប ជប៉ុន និងកូរ៉េ តែគជ់ ភេសជ្ជៈក្រឡុក និងការ៉េម។
បញ្ញា បានឱ្យដឹងថា គោលបំណងក្នុងការបង្កើតកម្មវិធីនេះឡើង គឺដោយសារពួកគេជាមជ្ឈមណ្ឌលសហគមន៍ ដូច្នេះ ទិសដៅគឺបង្កើតកម្មវិធី ដែលមានភាពរីករាយ និងច្នៃប្រឌិតដល់យុវជននៅក្នុងសហគមន៍។
បញ្ញា ថា៖ «កម្មវិធីធ្វើឡើងដើម្បីប្រមូលសហគមន៍អានីមេដែលមានស្រាប់ ដើម្បីចែករំលែកចំណង់ចំណូល-ចិត្តរបស់ពួកគាត់ទៅអ្នកដទៃទៀត»។
ពេជ្រវឌ្ឍនា បញ្ចប់ដោយថ្លែងថា៖ «យើងសង្ឃឹមមានអ្នកចូលរួមច្រើន ពួកគេអាចគិតថានេះជាកន្លែងមួយបង្កើតសម្រាប់ទំនាក់ទំនង និងស្គាល់អ្នកថ្មីៗថែមទៀត»។
សម្រាប់ព័ត៌មានបន្ថែមពិព័រណ៍អាចតាមដានបានតាមទំព័រហ្វេសប៊ុករបស់ Friends Futures Factory @friendsfuturesfactorykh៕