.jpg)
កុមារី សារឹម ស្រីម៉ុច តួសម្ដែងរបស់ភាពយន្តដឹកនាំថតដោយ អេនជើលីណា ជោលី។ រូបថត AFP
ភ្នំពេញ: ទោះមមាញឹកបីបាច់កូន ៦ នាក់ នៅក្រុងឡូសអេនជើលេស ក្រោយលែងលះអតីតស្វាមី ប្រ៊េដ ភីត ក្ដីក៏តារាហូលីវូដ អេនជើលីណា ជោលី នៅតែចាត់ចែងពេលវេលាធ្វើកិច្ចការជាមួយយុវជនទូទាំងពិភពលោក ដើម្បីជំរុញការអប់រំវិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា (STEM)។
តារាភាពយន្តពានអូស្ការវ័យ ៤៦ ឆ្នាំរូបនេះ បាននិងកំពុងប្រតិបត្តិការកម្មវិធី ម៉ាដុក-ជោលី ក្រោមការមើលខុសត្រូវដោយកូនប្រុសច្បងវ័យ ២០ ឆ្នាំរបស់នាង ម៉ាដុក-ជោលី-ភីត ដែលមានដើមកំណើតខ្មែរ។
ជោលី ថ្មីៗនេះបានបង្ហោះក្នុងបណ្ដាញអ៊ីនស្តាក្រាមដោយបរិយាយលម្អិតពីកិច្ចការដែលនឹងជំរុញឱ្យក្មេងស្រីអភិវឌ្ឍសមត្ថភាពដ៏អស្ចារ្យ។
ភ្ជាប់នឹងរូបថតយុវតីសិស្សវិទ្យាល័យសំឡូត ជោលី បានសរសេរថា៖ «ខ្ញុំបានសហការនិងអ្នកវិទ្យាសាស្ត្រអាមេរិក Gitanjali Rao ជាយុវតីវ័យ ១៥ ឆ្នាំ ជាអ្នកច្នៃបង្កើត និងដោះស្រាយបញ្ហាដ៏ឆ្នើម»។
តារាហូលីវូដស្រីរូបនេះបានរៀបរាប់ទៀតថា៖ «នាងគឺជាអ្នកជួយបំភ្លឺផ្លូវដល់ក្មេងស្រីដទៃទៀតក្នុងពិភពលោកដើម្បីទទួលបានការអប់រំវិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា។ ក្មេងស្រីភាគច្រើនពុំទទួលបានការអប់រំបែបនេះទេ ជាពិសេសវិស័យព័ត៌មាន និងបច្ចេកវិទ្យាទំនាក់ទំនង (ICT) ដែលជាវិស័យដ៏រីកដុះដាលការងារនាថ្ងៃអនាគត»។
រូបភាពយុវតីសិស្សវិទ្យាល័យសំឡូត ក្នុងជំនួបសិក្សាអនឡាញ។ រូបថត Instagram/Angelina Jolie
មូលនិធិ ម៉ាដុក-ជោលី-ភីត បានធ្វើកិច្ចការផ្ដោតសំខាន់ក្នុងការកាត់បន្ថយភាពក្រីក្រនៅទីជនបទ ការពារបរិស្ថាន និងអភិរក្សសត្វព្រៃនៅក្នុងតំបន់ពាយព្យប្រទេសកម្ពុជា។
ដោយផ្សារភ្ជាប់យុវតីកម្ពុជានឹងអ្នកវិទ្យាសាស្ត្រវ័យក្មេងឆ្នើមអាមេរិករូបនេះ ជោលី បន្តថា៖ «២ ឆ្នាំចុងក្រោយនេះ កូវីដបានបំផ្លាញឱកាសសិក្សាជាច្រើនរបស់ក្មេងៗ ប៉ុន្តែសិស្សដូចជាយុវតីកម្ពុជាទាំងនេះ កំពុងជម្នះតស៊ូបន្ត និងបញ្ចប់ការសិក្សារបស់ពួកគេ»។
នាងបានកោតសរសើរផងដែរថា៖ «ខ្ញុំពិតជាចង់ឃើញក្មេងស្រីទាំងនេះប្រាស្រ័យរកគ្នាដោយពុំមានឧបសគ្គភាសា ឬវប្បធម៌ ហើយខ្ញុំចង់ឃើញយុវតីទាំងនេះលើកទឹកចិត្ត ជ្រោមជ្រែង និងបង្រៀនគ្នាទៅវិញទៅមក»៕
ជោលី និងកូនៗក្នុងកម្មវិធីសម្ពោធភាពយន្តក្រុងឡុងដ៍។ រូបថត AFP
