The Phnom Penh Post Search

Search form




Logo of Phnom Penh Post newspaper Phnom Penh Post - ​ផលិតផល​ម្រុំ និង​ទៀបបារាំង​ខ្មែរ​យីហោ​ដំរី​នៅ​ឧដុង្គ​ ហោះហើរ​ទៅ​បំពេញតម្រូវការ​អតិថិជន​ជុំវិញ​ពិភពលោក​

​ផលិតផល​ម្រុំ និង​ទៀបបារាំង​ខ្មែរ​យីហោ​ដំរី​នៅ​ឧដុង្គ​ ហោះហើរ​ទៅ​បំពេញតម្រូវការ​អតិថិជន​ជុំវិញ​ពិភពលោក​

Content image - Phnom Penh Post
តែ​ម្រុំ នំ​ម្រុំ​ឃុកគី ម្រុំ​សូកូឡា កាហ្វេម្រុំ​​ និង​តែទៀបបារាំង​។ រូបថត សហ​ការី

​ផលិតផល​ម្រុំ និង​ទៀបបារាំង​ខ្មែរ​យីហោ​ដំរី​នៅ​ឧដុង្គ​ ហោះហើរ​ទៅ​បំពេញតម្រូវការ​អតិថិជន​ជុំវិញ​ពិភពលោក​

​ភ្នំពេញ: ផ្ដើមចេញពី​ឧត្ដមគតិ​ស្រឡាញ់​ផលិតផល​ជាតិ យុវជន​ខ្មែរ​បាន​កែច្នៃ​ម្រុំ​ដ៏​ពេញនិយម​ជា តែ​ម្រុំ ​នំ​ម្រុំ​ឃុ​ក​គី ម្រុំ​សូកូឡា និង​កាហ្វេ​ម្រុំ បំពេញតម្រូវការ​អ្នក​ចូល​ចិ​ត្ដ​បរិភោគ​ម្រុំ ដែល​ជឿ​ពី​គុណប្រយោជន៍​រុក្ខជាតិ​ស្ទួយ​សុខភាព និង​បន្ដ​អភិវឌ្ឍ​ផលិត​ផល​ទៀបបារាំងនាំចេញ​ប្រមាណ ១០០ ​ប្រទេស​ជុំវិញ​ពិភពលោក​។

​លោក ជាង បូរ៉ា ស្ថាបនិក​ក្រុមហ៊ុន រ៉ា គីម​ឡុង បាន​ប្រាប់ ភ្នំពេញ ​ប៉ុស្ដិ៍ថា​៖ «​សព្វថ្ងៃ​តែ​ផ្លែទៀប​បារាំង មាន​គេ​គាំទ្រ​ច្រើន ហើយ​បាន​លក់​ចេញ​ក្រៅ​តាមរយៈ​ការ​កុម្ម៉ង់​ទៅជូន​បងប្អូន​នៅក្រៅ​ប្រទេស​ច្រើន​។ វា​អាចមាន​ចន្លោះ​ពី ៧០ ទៅ ១០០ ​ប្រទេស និង​មាន​ដៃគូ​សហការ​ជាមួយ​ជប៉ុន អាមេរិក ចិន និង​បារាំង ដែល​កុម្ម៉ង់​ម្ដង​ពី ២០០ ទៅ ៥០០ ​សម្ពាយ ដើម្បី​យកទៅលក់​នៅ​ស្រុក​ក្រៅ​តាម​តំបន់ដែល​ខ្មែរ​នៅ​»​។

​លោក​បាន​អះអាងថា​៖ «​វា​បាន​ជួយ​មហារីក​ច្រើន​ប្រភេទ​។ នៅពេល​ញ៉ាំ​តែ​នេះ វា​ធ្វើឱ្យ​ត្រជាក់ បាយ​បាន សម្រាន្ត​លក់​ស្រួល ទប់ស្កាត់ និង​បំផ្លាញ​មេរោគ​មហារីក ក៏ដូចជា​រក្សា​កោសិកា​ល្អ ជួយ​ឱ្យ​ឈាម​ដំណើរ​ការល្អ ជួយ​តម្រងនោម ជួយ​កាត់បន្ថយ​ភាព​តានតឹង និង​ជួយ​ឱ្យ​ខួរក្បាល​ស្រឡះ​ថែមទៀត​»​។​

​យ៉ាងណាមិញ ទម្រាំ​មាន​អតិថិជន​ជឿ​​ជាក់ និង​ទិញ​ផ្ញើ​បងប្អូន ក៏ដូចជា​នាំទៅ​លក់​បន្ដ​នៅតាម​បណ្ដា​ប្រទេស​ជាច្រើន ម្ចាស់​ផលិតផល​ក្នុងស្រុក​រូបនេះ​បាន​ខិតខំ​សិក្សា​ស្រាវជ្រាវ បំណង​ចង់ឃើញ​ផលិតផល​ខ្មែរ​នៅលើ​ឆាក​​អន្ដរជាតិ​ប្រកបដោយ​គុណភាព​។​

​អតីត​អ្នក​បម្រើការ​ក្នុង​វិស័យ​វិទ្យា​សាស្ដ្រ​កុំព្យូទ័រ​រយៈពេល ១០​ ឆ្នាំ ​ដែល​ទទួល​ការបណ្ដុះបណ្ដាល​ពី​ប្រទេសជិតខាង​បាន​បោះជំហាន​ឈានចូល​ឧស្សាហកម្ម​ផលិត​ផលិតផល​អាហារ​សុខភាព​ដូចជា នំ កាហ្វេ និង​តែ​ធម្មជាតិ​ជាច្រើន​ប្រភេទ ដោយ​បង្កើត​ក្រុមហ៊ុន រ៉ា គីម​ឡុង ក្នុង​ឆ្នាំ​ ២០១៤ ជាមួយ​ឈ្មោះ​យីហោ «​សញ្ញា​ដំរី​»​។

​លោក បូរ៉ា អាយុ ៤១​ ឆ្នាំ បានឱ្យដឹងថា ស្លាក​សញ្ញា​ដំរី ចង់​បញ្ជាក់ប្រាប់​ពិភពលោក​ថា ខ្មែរ​មាន​ទំនាក់​​ទំនង​យ៉ាង​ស្និទ្ធ​ជាមួយ​ដំរី​តាំងពី​សម័យអង្គរ ដែល​ប្រកៀក​ស្មា​ប្រយុទ្ធ​លើ​សមរភូមិ​។

Content image - Phnom Penh Post
លោក ជាង បូរ៉ា ស្ថាបនិក​​ក្រុមហ៊ុន រ៉ា គីមឡុង កែច្នៃ​តែ​ម្រុំ នំ​ម្រុំ​ឃុកគី ម្រុំ​សូកូឡា កាហ្វេម្រុំ​​ និង​តែទៀបបារាំង​។ រូបថត សហ​ការី

​ដោយ​ទទួល​ការបណ្ដុះបណ្ដាល​ជំនាញ​ផ្នែក​វិទ្យាសាស្ដ្រ​កុំព្យូទ័រ​នៅ​ប្រទេស​វៀតណាម លោក​ចាប់ផ្ដើម​គិតគូរ​លើ​ការផលិត​នូវ​ផលិតផល​​ជាតិ ដោយសារ​ភ្ញាក់​នឹង​សម្ដី​មិ​ត្ដ​ភក្ដិ​ជា​ជនជាតិ​វៀតណាម​។

​លោក​បាន​រំឭកថា​៖ «​នៅ​ម៉ោង​សម្រាក​មួយ ដែល​ខ្ញុំ និង​មិត្តភក្តិ​ជជែក​គ្នា​លេង យុវជន​វៀតណាម​ម្នាក់​បាន​ចោទ​ជា​សំណួរ​មក​ខ្ញុំ​ថា ប្រទេស​អ្នកមាន​ដី​ល្អ អាច​ដាំ​ដុះ​ដំណាំ​ផ្លែឈើ ចិញ្ចឹម​ត្រី និង​សត្វ​បាន​ច្រើន​។ ប៉ុន្តែ​ហេតុអ្វី​មិន​ធ្វើ បែរជា​នាំចូល​បន្លែ ត្រី​​សាច់​ពី​វៀតណាម​?»​។

​អ្នកស្រុក​ស្អាង​រូបនេះ​បន្តថា​៖ «​គេ​និយាយ​ដាក់​យើង​ដោយ​ចម្ងល់​ថា មកពី​ប្រទេស​យើង​ប្រជាជនមាន ហើយ​ប្រទេស​គេ​នៅ​ក្រ​ឬ​យ៉ាងណា ទើប​គេ​មិនទាន់​អាច​បោះបង់ចោល​នូវ​វិស័យ​កសិកម្ម និង​ផលិត​កម្មបាន​? ខ្ញុំ​ហាក់​មិន​សប្បាយចិត្ត ព្រោះ​ប្រជាជន​គេ​សួរ​ពី​ប្រទេស​យើង​ហាក់ដូច​គេ​សួរ​ផ្ទះ​យើង​អ៊ឹ​ចឹ​ង​។ វា​ធ្វើឱ្យ​ខ្ញុំ​ផ្លាស់ប្ដូរ​គំនិត​ពេល​មក​ស្រុក​ខ្មែរ​វិញ និង​បន្ត​ស្រាវ​ជ្រាវ​រឿង​ហ្នឹង​»​។

​ជា​កូន​អ្នកស្រែ​ចម្ការ​ម្នាក់ លោក បូរ៉ា ឱ្យដឹងទៀតថា លោក​ចង់​ចូលទៅ​ជួយ​ក្នុង​វិស័យ​ផលិតកម្ម​តាមរយៈ​ការដាំដុះ និង​កែច្នៃ​ជា​ផលិតផល​​សម្រេច ​ដើម្បី​ផ្គត់ផ្គង់​ក្នុងស្រុក​។​

​ដោយ​មើលឃើញ​ពី​ទំហំ​នៃ​ការនាំ​​ចូល​ខ្ពស់​រហូតដល់​ចន្លោះ​ពី ៧ ទៅ ១៥​ កុងតឺន័រ បើ​ធៀប​នឹង​ការនាំចេញ​តែ ១​ កុងតឺន័រ ក្នុង ​១ ​សប្ដាហ៍ លោក បូរ៉ា ក៏​សម្រេច​ចិ​ត្ដ​បោះបង់​វិទ្យាសាស្ដ្រ​កុំព្យូទ័រ និង​ចាប់យក​ផលិតកម្ម​វិញ​។

Content image - Phnom Penh Post
តែ​ផ្លែ​ទៀប​បារាំង​​លក់​ចេញប្រមាណ​ ១០០​ ប្រទេស និង​មាន​ដៃគូ​​សហការ​​ជាមួយ​ជប៉ុន អាមេរិក ចិន និង​បារាំង​​។ រូបថត សហ​ការី

​លោក បូរ៉ា បាន​រៀនសូត្រ​ផលិត​តែ​លក្ខណៈ​គ្រួសារ​ពី​គ្រួសារ​វៀតណាម ដែល​ដំណើរ​ការផលិត​ធ្វើ​ដោយ​ដៃ​ភាគច្រើន​។ លោក​គិតថា ការផលិត​តែ​ដោយ​ដៃ ពិតជា​ចំណាយពេល​យូរ បូរ៉ា បានធ្វើ​ដំណើរ​ទៅ​ប្រទេស​ចិន​ សិក្សា​អំពី​គ្រឿង​ម៉ាស៊ីន និង​ចូលរួម​តាំងពិព័រណ៍​ទាក់ទង​នឹង​វត្ថុ​ធាតុ​ផ្សំ​ចំណីអាហារ​។

​លោក​និយាយថា​៖ «​យើង​ទទួល​​បានការ​សិក្សា ការកែច្នៃ​ប្រឌិត​ឱ្យ​កាន់​​តែ​ល្អ និង​ផ្សំ​ជាមួយ​គ្រឿង​ម៉ាស៊ីន ដើម្បីឱ្យ​វា​អាច​ផលិត​បាន លឿន និង​មាន​អនាម័យ​។ ខ្ញុំ​ក៏​ទិញ​គ្រឿង​​ម៉ាស៊ីន​ខ្លះ​ចូលមក ឱ្យ​វា​បានល្អ​ជាង​មុន​»​។

​ផលិតផល​សញ្ញា​ដំរី ទទួលបាន​សញ្ញា​បន​ប​ត្រ​ហា​ឡា​ល់ (Halal) ដែល​គោរព​តាម​បទដ្ឋាន​សាសនា​អ៊ិ​ស្លាម ចេញពី​ក្រសួង​សិប្បកម្ម និង​ក្រសួងសុខាភិបាល​បាន​បង្កើត​ការងារ​ដល់​ពលរដ្ឋ​ជាច្រើន មុន​ជំងឺ​​រាតត្បាត​សកល​ចូលមក​។

​លោក​លើកឡើងថា​៖ «​ពី​ដើម​មក​ខ្ញុំ​ចងក្រង​ជា​សហគមន៍​តូច​ ១​ នៅ​ខេត្ត​កំពង់ស្ពឺ និង​ខេត្ដ​កណ្ដាល​ទាក់ទង​នឹង​ម្រុំ ដូចជា​លើ​ផ្ទៃដី ៣-១០ ​ហិកតា​។ ខ្ញុំ​រៀបចំ​សហគមន៍​ដាំ​ដុះ​តាម​កន្លែង ដែលមាន​ទីតាំង​ភូមិសាស្ត្រ​ល្អ ដូចជា​ទៀបបារាំង គឺ​នៅ​ខេត្តកោះកុង​»​។​

​យ៉ាងណាមិញ ការសិក្សា​ស្រាវជ្រាវ​ក្នុងការ​បង្កើត​ជម្រើស​ផលិត​បន្ថែម ត្រូវការ​ពេលវេលា​ច្រើន ខណៈ​ការ​​ដាំ​ដុះ​ពឹង​អាស្រ័យ​លើ​ធម្មជាតិ​ក៏មាន​ការប៉ះពាល់​ខ្លាំង​ទៅលើ​ទិន្នផល​ក្នុង​ខ្សែចង្វាក់​ផលិត​ផងដែរ​។

​លោក បូរ៉ា បាន​និយាយថា ធ្វើការ​ជាមួយ​ប្រជាជនមាន​ផល​លំបាក​ក្នុងការ​ទាញ​ពួកគាត់​ឱ្យ​ក្លាយជា​កសិករ​ដែលមាន​វិជ្ជាជីវៈ​ត្រឹមត្រូវ​។ ចំណែក​កសិករ​ជំនាញ​ខ្លះ ធ្វើបាន​ល្អ​ហើយ បែរជា​មិន​គាប់​ទីផ្សារ ដែល​អាច​នាំឱ្យ​មានការ​បាក់​ទឹកចិត្ត​។

Content image - Phnom Penh Post

​លោក​បានលើកឡើង​ទៀតថា ប្រជាជន​គិតពី​ការចាយវាយ និង​ការ​​ហូបចុក​ជាមុន ដូចជា​គាំទ្រ​ប្រើ​ផលិតផល​ផ្ដើម​ពី​ក្នុង​ចង្ក្រាន​បាយ ខ្មែរ​ធ្វើបាន​កាពិ ប្រហុក ទឹកត្រី ស្ករ​ហើយ​អ្វីដែល​ខ្មែរ​មិនទាន់​អាច​ច្នៃ​ផលិត​បាន​ចាំ​ទិញ​ពី​គេ​។

​លោក បូរ៉ា បន្ថែមថា​៖ «​ជួយ​បាន​ប៉ុណ្ណឹង​ច្រើនណាស់​ហើយ ដោយ​មិនបាច់​ណាត់ជួប​គ្នា អង្គុយ​ហូប​កាហ្វេ ប្រេ​៊​ន​ដ៍ Starbuck ចូល​ហាង ស៊ូ​ស៊ី ហើយ​ជជែក​គ្នា​ថា​ចង់​ជួយ​ខ្មែរ​ទេ​។ ប៉ុន្តែ​ទង្វើ​ចេញមក​ គឺ​កំពុងតែ​គាំទ្រ​របស់​បរទេស​បាត់​ហើយ​។ គាត់​អាចជួយ​ទិញ ជួយ​លក់ និង​និយាយ​ត​គ្នា​ពី​ផលិតផល​​ខ្មែរ​ខ្លួនឯង ដែលជា​ជ្រុង​មួយ​បង្ហាញ​ពី​សកម្មភាព​ចង់ឱ្យ​សេដ្ឋកិច្ច​ខ្មែរ​រីកចម្រើន​»​។

​សិប្បកម្ម «​សញ្ញា​ដំរី​» សព្វថ្ងៃ​មាន​មូលដ្ឋាន​នៅ​ឧដុង្គ ហើយ​សម្រាប់​ព័ត៌មាន​បន្ថែម​សូម​ចូលទៅ​កាន់​ទំព័រ Facebook @elephantbrands៕

អត្ថបទគួរចាប់អារម្មណ៍