ក្រុងរីកា: ដោយសារតែវាកម្រ និមិត្ដរូបតំណាងជាតិឡេតូនីដ៏ចម្លែកមួយ គោសម្បុរផ្ទៃមេឃ ឬទឹកសមុទ្រចាស់ សម្បុរនេះទំនងជាអាចទាក់ក្រសែភ្នែកខ្លាំងនៅទីឋានជនបទនៃប្រទេសឡេតូនី ក្នុងចំណោមហ្វូងគោសម្បុរត្នោត ខ្មៅ ឬសទូទៅ។
លោក Arnis Bergmanis នាយកឧទ្យានសត្វ Ciruli ក្នុងភូមិ Kalvene ដែលជាទីបង្កាត់ពូជសត្វគោបាននិយាយថា៖ «គោខៀវពិតជាវិសេស និងស្អាតអស្ចារ្យ។ ខ្ញុំពិតជារីករាយ ដែលយើងអាចជួយពួកវាឱ្យល្បី»។
ក្នុងឆ្នាំ ២០០០ មានគោខៀវតែ ១៨ ក្បាលប៉ុណ្ណោះនៅឡេតូនី តែពេលនេះ ពួកវាបានកើនដល់ប្រមាណ ១ ៥០០ ក្បាល តាមរយៈការបង្កាត់ពូជ និងប្រភេទកូនកាត់។
ម្ចាស់ផ្ទះស្នាក់នៅទីជនបទចាត់ទុកគោខៀវជាគោលដៅទេសចរណ៍មួយ ខណៈម្ចាស់គោបានបញ្ចូលគោខៀវក្នុងហ្វូងសម្រាប់បង្កាត់ពូជបន្ថែម។
លោក Bergmanis បានបន្ដថា៖ «បើកូនគោអម្បូរណាមួយបានបាត់បង់មេរបស់វា ឬត្រូវបានបំបែកចេញពីមេ គោខៀវនឹងយកកូនគោនោះមកថែទាំជាកូនរបស់ខ្លួន»។
មានតំណាលរឿងថា សម្បុររបស់ពួកវាបានមកពីទឹកសមុទ្រ ទោះបីជាតាមពិតពួកវាកើតមកមានពណ៌ត្នោតខ្ចី។ មិនយូរប៉ុន្មាន រោមរបស់ពួកវាប្រែទៅជាពណ៌ខៀវ និងកាន់តែប្រែជាចាស់ៗទៅរយៈពេលជាច្រើនឆ្នាំ។
ក្នុងឆ្នាំ ២០០៦ កសិករ អ្នកវិទ្យាសាស្ដ្រ និងអ្នកស្រឡាញ់ បានបង្កើតសមាគមគោខៀវ ដើម្បីតាមដានអម្បូរកម្រនេះ ហើយស្របពេលនេះ រដ្ឋាភិបាលក៏បានផ្ដល់ប្រាក់ពិសេសសម្រាប់ម្ចាស់គោខៀវនេះផងដែរ។
ការសម្លាប់យកសាច់ ត្រូវបានលើកលែងពពួកគោសម្បុរខៀវ ដែលពួកវាមិនសូវផ្ដល់ទិន្នផលទឹកដោះដូចគោធម្មតានោះទេ ជាមួយបរិមាណ ៥ ពាន់លីត្រ ក្នុង ១ ក្បាល ក្នុង ១ ឆ្នាំ បើធៀបនឹងគោ Holstein ធម្មតា ៨ ពាន់លីត្រ តែទឹកដោះរបស់វាផ្ដល់គុណភាពខ្ពស់ និងជីវជាតិច្រើនជាង។
យោងតាម Daiga Simkevica ប្រធានសមាគមគោខៀវបានឱ្យដឹងថា ពួកវាក៏មានសមត្ថភាពស៊ូនឹងបម្រែបម្រួលអាកាសធាតុទៀតផង។
អ្នកស្រីបានប្រាប់ AFP ថា៖ «គោខៀវដ៏រឹងមាំ ម្ចាស់ការ និងខ្លាំងក្លា រស់នៅខាងក្រៅក្រោលគ្រប់រដូវកាល ទោះស្ថិតក្នុងសភាពព្រឹលត្រជាក់នារដូវរងា ដែលពូជគោដទៃមិនអាចទ្រាំទ្របាន។ នៅថ្ងៃអនាគត យើងរំពឹងថា នឹងអាចវិភាគហ្សែ៊នឱ្យបានពេញលេញ បំណងបង្កាត់ពូជសុទ្ធឱ្យបាន ១០០%»៕ AFP/HR