ភ្នំពេញ: នៅមុខវិទ្យាស្ថានបារាំងចាប់ពីម៉ោង ២ រសៀល មនុស្សម្នាចោមរោមបុរសចំណាស់ម្នាក់ និងម៉ូតូម៉ាកគុបលោក បង្កើតជាចម្ងល់ដល់អ្នកដំណើរឆ្លងកាត់។ ពេលទៅជិត ទើបដឹងថា បុរសជនជាតិបារាំងរូបនេះកំពុងមមាញឹកជាមួយ ការចៀននំផេនខេកម្យ៉ាងរបស់បារាំង ដែលវាជាចំណីសាមញ្ញ តែប្រកែកមិនបានថាវាគួរឱ្យចង់ភ្លក្សប៉ុនណា។
សម្រាប់អ្នកដំណើរឧស្សាហ៍ជិះតាមផ្លូវ ១៨៤ ទិដ្ឋភាពនេះហាកស៊ាំភ្នែកទៅហើយ ព្រោះបើតាមលោក ហ្វីលីព ដូនេស្គី (Philippe Dounaevsky) ប្រាប់មក ភ្នំពេញ ប៉ុស្តិ៍ លោកថា វិទ្យាស្ថានបារាំងជាទីតាំងបច្ចុប្បន្ន ដែលលោកសំចតម៉ូតូលក់យូរជាងគេអស់រយៈពេលជាង ៨ ឆ្នាំ បើទោះលោកធ្លាប់លក់នៅទីតាំងផ្សេងៗដូចជាដំបូងនៅផ្សាររាត្រី សាលាបារាំងដេកាត សាលាបាក់ទូក ចតុមុខ វត្តភ្នំ សន្ធរម៉ុក ទួលទំពូង និងជ័យថាវីជាដើម។
លោក ហ្វីលីព បានឱ្យដឹងថា៖ «ខ្ញុំរស់នៅកម្ពុជារយៈពេល ១១ ឆ្នាំមកហើយ តាំងពីខែកក្កដា ឆ្នាំ ២០១១ ដើម្បីចាប់ផ្ដើមជីវិតផ្ទាល់ខ្លួន និងបង្កើតមុខរបរ។ មិត្តស្រីថៃរបស់ខ្ញុំក៏ផ្លាស់មកនៅជាមួយគ្នាក្នុងឆ្នាំ ២០១២។ ខ្ញុំស្រឡាញ់ពេញចិត្តរស់នៅទីនេះ និងមានជីវិតប្រសើរជាងនៅបណ្ដាប្រទេសលោកខាងលិច»។
ក្នុងជម្រើសរស់នៅកម្ពុជា លោកក៏បានប្រើចំណេះធ្វើនំរៀនពីម្ដាយដើម្បីចិញ្ចឹមជីវិត។
លោករំឭកប្រាប់ថា៖ «ខ្ញុំបានរៀនជំនាញនេះពីម៉ាក់ខ្ញុំ ដែលជាអ្នកធ្វើផេនខេកលក់ជាង ៤០ ឆ្នាំ តែក្រោយមកខ្ញុំក៏បំបែកចេញជារូបមន្តខ្លួនឯង។ ១១ ឆ្នាំ ដែលមករស់នៅទីនេះ ក៏ជារយៈពេល ដែលខ្ញុំប្រកបរបរលក់ផេនខេកនេះដូចគ្នា»។
ផ្ដើមពី ៥០ បន្ទះ ពេលនេះលោកលក់បានជាង ១០០ បន្ទះ ទៅតាមថ្ងៃ និងរដូវកាល។ តែជនជាតិបារាំងធ្លាប់ធ្វើការក្នុងវិស័យផលិតបរិក្ខារអគ្គិសនីជាង ៣០ ឆ្នាំរូបនេះថា ចំពោះថ្ងៃធម្មតា យ៉ាងហោចណាស់ក៏អាចលក់បាន ៧០ បន្ទះដែរ។
សព្វថ្ងៃនំផេនខេក របស់លោក មាន ៧ រសជាតិ ដូចជាមានបៀកពីលើដោយ សូកូឡាសណ្ដែកដី សូកូឡាខ្មៅ សូកូឡាទឹកដោះគោ ដំណាប់ស្ត្រប៊ើរី គ្រីមប៊័រសណ្តែកដី ទឹកដោះគោខាប់ និងស្ករ ហើយអតិថិជនក៏អាចបន្ថែមចំណិតចេកលើនំផងដែរ។ រសជាតិមានការពេញនិយមជាងគេ គឺសូកូឡាខ្មៅ និងសូកូឡាទឹកដោះគោ បន្ទាប់មកសូកូឡាសណ្ដែកដី ដំណាប់ស្ត្រប៊ើរី និងចុងក្រោយ គឺក្រីមប៊័រសណ្ដែកដី និងទឹកដោះគោខាប់។
រីឯផេនខេករបស់អ្នកលក់ វ័យ ៦៣ ឆ្នាំ រូបនេះធ្វើឡើងពី ម្សៅ ស៊ុត ទឹកដោះគោ និងស្ករ ដោយអាចបន្ថែមវ៉ានីឡា ដើម្បីឱ្យរសជាតិកាន់តែសម្បូបែប។
បន្ទាប់ពីដឹងរូបមន្ត មើលទៅទំនងធម្មតា ប៉ុន្តែភាពសាមញ្ញមិនអាចបរិយាយពីរសជាតិវានោះទេ។ ជាក់ស្ដែងនំផេនខេកដែលមានបន្ទះស្ដើងៗ ដែលលោកធ្វើហើយយកមកកម្តៅក្នុងខ្ទះ មុននឹងលាបរសជាតិពីលើនេះ ពេលដាក់ចូលក្នុងមាត់វាប្រែជាទន់ និងមានរសជាតិឈ្ងុយឆ្ងាញ់។ បន្ទាប់ពីបានភ្លក្សទើបដឹងថា មិនចម្លែកទេ ដែលអតិថិជនខ្លះសុខចិត្តរង់ចាំពី ២០ ទៅ ៣០ នាទី។
លោកបានអះអាងដែរថា៖ «៩៩% នៃអតិថិជនរបស់ខ្ញុំជាខ្មែរ ដែលភាគច្រើនជាសិស្សសាលា និស្សិត ក៏ដូចជាអ្នកដំណើរជិះកាត់ផងដែរ។ ភ្ញៀវខ្ញុំភាគច្រើនជាអតិថិជនប្រចាំ ដែលបន្ទាប់ពីបានញ៉ាំ ៩៩% នឹងត្រឡប់មកវិញ។ ម្យ៉ាងតម្លៃរបស់វាក៏សមរម្យ ត្រឹម ៣-៤ ពាន់រៀលប៉ុណ្ណោះ»។
សិស្សានុសិស្សដែលឈរចាំនៅទីនោះបានប្រាប់ ភ្នំពេញ ប៉ុស្តិ៍ ទាំងញញឹមបណ្ដើរ និងញ៉ាំបណ្ដើរថា ពួកគេក៏មិនដឹងថានំផេនខេករបស់លោក ហ្វីលីព មានអ្វីពិសេសដូចគ្នា គ្រាន់តែពួកគេបានញ៉ាំហើយតែងតែត្រឡប់មកទិញញ៉ាំទៀត។ អ្នកខ្លះញ៉ាំនំផេនខេកនេះ តាំងពីពួកគេនៅតូចរៀនថ្នាក់បឋមរហូតមកដល់វិទ្យាល័យ។
ចំណុចដែលគួរឱ្យសម្គាល់ គឺអ្នកលក់ផេនខេកមកពីទីក្រុងប៉ារីសរូបនេះមានការខ្ចប់ដាក់ថង់ ឬប្រអប់យ៉ាងមានអនាម័យ និងតែងតែគោរពតាមលេខរៀងអតិថិជនជានិច្ច ធ្វើឱ្យភ្ញៀវមិនខកចិត្តនឹងការឈររង់ចាំ។
ពេលត្រូវបានសួរថា លោកធ្លាប់មានបំណងបើកជាហាងតូចសាមញ្ញ ១ ទេ លោកថា មិនធ្លាប់គិតបែបនេះឡើយ។
លោកនិយាយថា៖ «ខ្ញុំនៅតែយល់ថា ការលក់នៅតាមផ្លូវបែបនេះ ខ្ញុំបានទំនាក់ទំនងជិតស្និទ្ធជាមួយអតិថិជនរបស់ខ្ញុំជាង។ ពួកគេងាយស្រួលរកខ្ញុំ។ វាក៏ផ្ដល់ភាពងាយស្រួលក្នុងការដាក់លក់ និងរើចេញ។ ម្យ៉ាងពេលនេះ ហាងផេនខេកជាច្រើនក៏ត្រូវបានបិទ»។
លោកក៏រំឭកពីជនជាតិខ្មែរដែលស្វាគមន៍ និងគាំទ្រលោកជាង ១ ទសវត្សរ៍នេះ។
លោក ហ្វីលីព ថា៖ «អរគុណគ្រប់គ្នាដែលរាប់អានខ្ញុំ យកចិត្តទុកដាក់ ផ្ដល់ស្នាមញញឹម និងមានទឹកចិត្តល្អដល់ខ្ញុំ។ វាជារឿងដ៏រីករាយដែលបានមកនៅ និងធ្វើការនៅកម្ពុជា ហើយក៏សូមទោសគ្រប់គ្នា ដែលពេលខ្លះខ្ញុំមានអារម្មណ៍ប្រែប្រួលច្រើន»។
នំផេនខេកបារាំងមានឈ្មោះ ហ្វេសប៊ុក @French pancake in Phnom Penh៕