.jpg)
កញ្ញា ជិន សូនីតា អ្នកធ្វើយុទ្ធនាការនៃការប្រែប្រួលអាកាសធាតុ និងតារាចម្រៀងរ៉េបកញ្ញា សាំង សុខសេរី។ រូបថត សហការី
ភ្នំពេញ: ជាមួយចង្វាក់ភ្លេងកន្ដ្រាក់អារម្មណ៍បែបហ៊ីបហប់តារាចម្រៀងស្រីវ័យក្មេងចាប់ផ្ដើមបន្លឺពាក្យពេចន៍ «អាកាសធាតុកំពុងខុសធម្មតាយើងសង្កេតឃើញថា...» ដូចនឹងឈ្មោះបទចម្រៀង «អាកាសធាតុ» វាបានរៀបរាប់អំពីក្ដីកង្វល់នៃផលប៉ះពាល់មកលើបរិស្ថាន និងដំណោះស្រាយដែលមនុស្សគ្រប់រូបអាចអនុវត្ដបាន។
បទចម្រៀងសម្រាប់សហគមន៍ និងគាំទ្រដោយអង្គការយូនីសេហ្វត្រូវបានផលិតឡើងដោយសហការរវាងតារារ៉េប ដែលគិតគូរពីបញ្ហាសង្គម សាំង សុខសេរី និងកញ្ញា ជិន សូនីតា អាយុ ២១ ឆ្នាំ ជាអ្នកធ្វើយុទ្ធនាការស្ដីពីការប្រែប្រួលអាកាសធាតុរួមជាមួយអង្គការ Tiny Toones។
បទ «អាកាសធាតុ» ត្រូវបានចាក់ផ្សាយនៅតាមស្ថានីយវិទ្យុ និងបណ្ដាញសង្គមនៅទូទាំងកម្ពុជា ចាប់ពីថ្ងៃសុក្រសប្ដាហ៍មុន បំណងទាក់ទាញការយកចិត្ដទុកដាក់បន្ថែមចំពោះវិបត្ដិអាកាសធាតុជាសកល និងកៀរគរប្រជាជនចូលរួមសកម្មភាពការពារបរិស្ថាន។
តំណាងអង្គការយូនីសេហ្វប្រចាំកម្ពុជាលោកស្រី ហ្វ័រូហ្គហ្វយូហ្សិថ បានថ្លែងថា៖ «ការចេញផ្សាយបទចម្រៀងដ៏គួរឱ្យរំភើបចិត្ត ជាមួយនឹងសារដ៏មានអានុភាព គឺជាសក្ខីភាពបង្ហាញពីតួនាទី
ដ៏សំខាន់នៃយុវជនដែលកំពុងធ្វើ សកម្មភាពយ៉ាងសកម្មប្រឆាំងនឹងការប្រែប្រួលអាកាសធាតុ»។
លោកស្រីបន្ដថា៖ «គ្មានអ្វីត្រូវឆ្ងល់ទេដែលថា កុមារ និងយុវជនជាអ្នកកំពុងប្រឈមមុខនឹងវិបត្តិអាកាសធាតុ។ ពួកគេនឹងត្រូវទទួលមរតកភពផែនដីនេះ ដូច្នេះសារសំឡេងពួកគេពិតជាសំខាន់ខ្លាំងណាស់។ យូនីសេហ្វបានប្តេជ្ញាចិត្តគាំទ្រសំទ្បេងរបស់យុវជន ត្រូវបានគេស្តាប់ឮ និងចាត់វិធានការលើការប្រែប្រួលអាកាសធាតុ ស្របពេលយើងកំពុងធ្វើការជាមួយរាជរដ្ឋាភិបាលកម្ពុជា និងដៃគូនានា ដើម្បីឆ្លើយតបទៅនឹងវិបត្តិនេះនៅថ្នាក់ជាតិ»។
យោងតាមសន្ទស្សន៍ហានិភ័យអាកាសធាតុលើកុមាររបស់យូនីសេហ្វបានបង្ហាញថា កម្ពុជាស្ថិតក្នុងចំណោមប្រទេស ១ ភាគ ៣ ដែលកុមារប្រឈមហានិភ័យខ្ពស់ទៅនឹងការប្រែប្រួលអាកាសធាតុ។
របាយការណ៍នេះបានចេញផ្សាយនៅឆ្នាំ ២០២១ កម្ពុជាមានចំណាត់ថ្នាក់ទី៤៦ ជាប្រទេសដែលងាយរងគ្រោះពីហានិភ័យជាងគេ។ ក្នុងរយៈពេលប៉ុន្មានឆ្នាំចុងក្រោយនេះ រាជរដ្ឋាភិបាលកម្ពុជាបានកំណត់អាទិភាពខ្ពស់លើការដោះស្រាយបញ្ហាប្រឈមទាំងនេះ ដោយបានប្តេជ្ញាចិត្តចំពោះគោលដៅនៃអនុសញ្ញាក្របខ័ណ្ឌអង្គការសហប្រជាជាតិស្តីពីការប្រែប្រួលអាកាសធាតុ (UNFCCC)។
តារាចម្រៀងរ៉េបដែលគិតគូរពីបញ្ហាសង្គម និងបរិស្ថាន កញ្ញា សាំង សុខសេរី។ រូបថត សហការី
កញ្ញា សូនីតា បានឱ្យដឹងថា បទចម្រៀង និងវីដេអូចម្រៀងគឺជាលទ្ធផលនៃយុទ្ធនាការ The Cli-Mates ដែលកញ្ញាបានបង្កើតឡើងដោយមានការជួយជ្រោមជ្រែងពីតារាចម្រៀងរ៉េប សុខសេរី ជាគ្រូណែនាំក្នុងគម្រោងជំនាន់ថ្មី។
កញ្ញា សូនីតា បាននិយាយថា៖ «ខ្ញុំបានដាក់ពាក្យស្នើសុំក្នុងគម្រោងជំនាន់ថ្មីរបស់ យូនីសេហ្វ ពីព្រោះខ្ញុំយល់ឃើញថា វាជាកម្មវិធីដ៏ល្អមួយដើម្បីជួយឱ្យខ្ញុំអាចអភិវឌ្ឍគំនិតរបស់ខ្លួនលើសកម្មភាពទាក់ទងនឹងអាកាសធាតុ និងអាចបង្កើតលទ្ធផលវិជ្ជមានបាន។ ខ្ញុំពិតជារំភើបខ្លាំងណាស់ចំពោះការចេញផ្សាយនេះ ព្រោះក្រុមការងារខ្ញុំបានខិតខំប្រឹងប្រែងយ៉ាងខ្លាំងលើការរៀបចំបទចម្រៀង និងវីដេអូនេះឡើង ដោយទទួលបានការគាំទ្រដ៏អស្ចារ្យពីយូនីសេហ្វ»។
កញ្ញា សូនីតា បានបន្ដទៀតថា៖ «យើងទន្ទឹងរង់ចាំស្ដាប់ចំណាប់អារម្មណ៍របស់ប្រិយមិត្ត ហើយសង្ឃឹមថា បន្ទាប់ពីបានស្តាប់នូវបទចម្រៀងនេះ មនុស្សកាន់តែច្រើននឹងចូលរួមអនុវត្តសកម្មភាពទាក់ទងនឹងអាកាសធាតុ»។
«អាកាសធាតុ» ត្រូវបានដាក់ឱ្យស្ដាប់នៅលើសេវាតន្ដ្រី Pleng របស់ Smart រួមជាមួយការផ្សាយនៅតាមស្ថានីយវិទ្យុទូទាំងប្រទេស រួមមាន រាជធានីភ្នំពេញ ខេត្ដព្រះវិហារ សៀមរាប បាត់ដំបង និងពោធិ៍សាត់ ដែលរំពឹងថា នឹងមានប្រិយមិត្ដអ្នកស្ដាប់ប្រមាណ ២៥ ម៉ឺននាក់ អាយុចាប់ពី ១៥ ទៅ ២៤ ឆ្នាំ៕
