.jpg)
អំឡុងពេលបិទទីតាំង ឥណ្ឌាផ្ដល់វគ្គយោគៈតាមអនឡាញឥតគិតថ្លៃ។ រូបថត AFP
ក្រុងញូវដែលី: ក្រុងញូវដែលីបានបង្គាប់ឱ្យបិទទីតាំងមិនចាំបាច់ រួមទាំងភោជនីយដ្ឋាន និងបារ៍ តែបានផ្ដល់ថ្នាក់បង្រៀនយោគៈតាមអនឡាញដោយឥតគិតថ្លៃសម្រាប់អ្នកនៅផ្ទះដ៏ឯកា ខណៈករណីឆ្លងកូវីដបានកើនឡើងក្នុងទីក្រុងឥណ្ឌា ១ នេះ ក៏ដូចជានៅទូទាំងប្រទេស។
ដោយសារតែការឆ្លងរីករាលដាលបានកើនឡើង ៦ ដង កាលពីសប្ដាហ៍កន្លងទៅ រដ្ឋាភិបាលឥណ្ឌា បានប្រើវិធានការធ្លាប់ដាក់កាលពីឆ្នាំមុន ពេលមនុស្សរាប់ពាន់នាក់បានស្លាប់ដោយសារវីរុសរៀងរាល់ថ្ងៃ ហើយប្រព័ន្ធសុខាភិបាលបានឈរនៅមាត់ជ្រោះមរណៈទៅហើយ។
ខណៈមិនប្រកាន់វិធានការបិទខ្ទប់ពេញលេញ អាជ្ញាធរបានបង្កើនការរឹតបន្ដឹងជាបន្ដបន្ទាប់នៅទូទាំងប្រទេស ហើយសមត្ថភាពទទួលភ្ញៀវនៅទីតាំងឯកជន និងភោជនីយដ្ឋាននានាក្នុងទីក្រុងក៏ត្រូវបានដាក់កំហិតត្រឹម ៥០ ភាគរយដែរ។
ប៉ុន្ដែអ្នកនៅក្នុងផ្ទះអាចរៀនយោគៈអនឡាញឥតគិតថ្លៃ ដោយមន្ដ្រីជាន់ខ្ពស់ក្រុងដែលី លោក Arvind Kejriwal បាននិយាយថា វាអាចជួយអ្នកជំងឺពង្រឹងប្រព័ន្ធស៊ាំង ក៏ដូចជាស្ទួយសុខភាពផ្លូវ និងធ្វើឱ្យអារម្មណ៍ស្មារតីស្ងប់សុខផងដែរ។
ឥណ្ឌាបានកត់ត្រាចំនួនអ្នកឆ្លងវីរុសថ្មីៗជិត ១៧ ម៉ឺននាក់ កាលពីថ្ងៃចន្ទ ដែលស្ទើរតែស្មើពាក់កណ្ដាលនៃកំណត់ត្រាប្រចាំថ្ងៃកាលពីខែមេសា និងឧសភាកន្លងមក។ មរណភាពនៅមានចំនួនតិចតួចនៅឡើយ តែកើនឡើងជាបន្ដបន្ទាប់។
បច្ចុប្បន្ន ឥណ្ឌាបានកត់ត្រាអ្នកចាក់វ៉ាក់សាំងជាង ១,៥ ពាន់លានដូស ហើយថ្មីៗនេះបានបើកកម្មវិធីចាក់ឱ្យក្មេងជំទង់ថែមទៀត។ ប្រទេសមានប្រជាជនច្រើនបំផុតលំដាប់ទី២ ក្នុងលោកនេះ ក៏បានចាប់ផ្ដើមចាក់ដូសជំរុញឱ្យក្រុមមនុស្សងាយរងគ្រោះផងដែរ៕ AFP/HR
