.jpg)
រូបតំណាង៖ កំលោះក្រមុំចិនផ្ដើមស្នេហ៍គ្រាបិទខ្ទប់រហូតបានភ្ជាប់ពាក្យ។ រូបថត AFP
ក្រុងប៉េកាំង: កំលោះក្រមុំចិន ១ គូ ជាប់គាំងក្នុងកម្មវិធីណាត់ជួបស្នេហ៍គ្មានដែនបញ្ចប់ ដែលអរគុណដល់ការបិទខ្ទប់ ទីបំផុតពួកគេបានរកឃើញស្នេហ៍ពិត ព្រមទាំងបានដឹកដៃគ្នាចូលរោងការថែមទៀត។
នេះជាលើកទី២ ក្នុងខែមករានេះ ដែលបណ្ដាញផ្សព្វផ្សាយរដ្ឋចិន បានចុះផ្សាយរបាយការណ៍អំពីគូណាត់ជួបគ្នា ហើយត្រូវជាប់គាំងក្នុងការបិទខ្ទប់ភ្លាមៗ តែ ១ គូនេះទទួលបានផ្លែផ្កាអាពាហ៍ពិពាហ៍យ៉ាងរីករាយពីការជាប់ការបិទខ្ទប់។
កញ្ញា ហ្សាវ ស៊ាវគីង អាយុ ២៨ ឆ្នាំ មកពីខេត្ដសានស៊ីភាគខាងជើងប្រទេសចិន គិតថា កម្មវិធីណាត់ជួបស្នេហ៍របស់ខ្លួនកាលពីពាក់កណ្ដាលខែធ្នូ ជាមួយយុវជនម្នាក់រស់នៅក្នុងទីក្រុងផ្សេងគ្នា គ្រាន់តែជាឱកាសជួបគ្នា ១ ថ្ងៃ ដោយខ្លួនក៏អាចបានស្គាល់ក្រុមគ្រួសារខាងប្រុសច្បាស់។
កំលោះក្រមុំចិនក្នុងទីក្រុងតូចៗ និងសហគមន៍ជនបទនានាតែងតែពឹងអាស្រ័យលើក្រុមគ្រួសារ និងមិត្ដភក្ដិក្នុងការណែនាំផ្គូផ្គងគូស្រករ និងអាចណាត់ជួបក្រុមគ្រួសារនៅថ្ងៃណាត់ជួបស្នេហ៍ដំបូងតែម្ដង។
កញ្ញា ហ្សាវ ស៊ាវគីង ដែលទើបបានជួបបុរសនោះជាលើកទី២ បានប្រាប់បណ្ដាញផ្សព្វផ្សាយក្នុងស្រុក Jimu News កាលពីថ្ងៃចន្ទថា៖ «ខ្ញុំមិនដែលគិតចង់ស្នាក់នៅ ១ យប់នោះទេ ពីព្រោះវាមិនសមឡើយ»។
ប៉ុន្ដែអាជ្ញាធរក្នុងទីក្រុងស៊ានយ៉ាង ជាទីដែលកញ្ញាណាត់ជួបគូស្នេហ៍ ស្រាប់តែប្រកាសបិទខ្ទប់ភ្លាមៗដោយសារការកើនឡើងនៃអត្រាឆ្លងវីរុស ដែលធ្វើឱ្យកញ្ញាខកខានពុំអាចត្រឡប់ទៅផ្ទះវិញ។
ឪពុកម្ដាយខាងប្រុសទទូចឱ្យពួកគេភ្ជាប់ពាក្យក្រោយបានរួមរស់ជាមួយគ្នា ១ សប្ដាហ៍ តែកញ្ញា ហ្សាវ បាននិយាយថា កញ្ញាមានអារម្មណ៍ថា វាពិតជាប្រញាប់ពេកហើយ។
កញ្ញា ហ្សាវ បានបន្ដថា កញ្ញាមិនសូវចាប់អារម្មណ៍ខាងប្រុសទេ ពេលឃើញរូបថតខាងប្រុសឈ្មោះ ហ្សាវ ហ្វៃ តែក្រោយមកពេលដែលបានជួបគ្នាផ្ទាល់ កញ្ញាបានគិតថា បុរសនោះមានរូបរាងសង្ហាជាងក្នុងរូបថត។
ថ្វីដ្បិតតែការចាប់ផ្ដើមមិនសូវល្អ តែពួកគេទាំង២នាក់បានបន្ដអភិវឌ្ឍមនោសញ្ចេតនារវាងគ្នា ហើយពេលនេះ ពួកគេក៏សម្រេចចិត្ដភ្ជាប់ពាក្យ។
ខុសពីគូស្នេហ៍ជាប់គាំងក្នុងផ្ទះ ១ ទៀត ដែលពុំអាចបណ្ដុះពន្លកស្នេហ៍បាន កញ្ញា ហ្សាវ ដែលជាអ្នកលក់ផ្លែប៉មតាមអនឡាញបានប្រាប់ Jimu News ថា៖ «យើងពិតជាចុះសម្រុងនឹងគ្នាណាស់»៕ AFP/HR
