.jpg)
កញ្ញា ដេននី ក្វាន់ សម្រេចបង្ហាញមុខមាត់ពិត បុរសជាម្ចាស់បេះដូងថ្មី។ តារាសម្តែងស្រីសិចស៊ី ដែលមានស្រុកកំណើតនៅខេត្តព្រះវិហារ កញ្ញា ដេននី ក្វាន់។ រូបថត ហ្វេសប៊ុក
ភ្នំពេញៈ ក្រោយពីព្យាយាមលាក់មុខម្ចាស់បេះដូងថ្មី ដែលជាឪពុករបស់កូនក្នុងផ្ទៃមិនទាន់សម្រាលអស់ជាច្រើនខែ ក្នុងឆ្នាំចាស់នោះ ស្រាប់តែនៅដើមឆ្នាំថ្មីនេះ តារាស្រីសិចស៊ី កញ្ញា ដេននី ក្វាន់ សម្រេចបង្ហាញមុខមាត់ពិតបុរសមានរាងខ្ពស់ស្រឡះ ដែលនាងតែងតែហៅថា «ប៉ាៗ» នោះ មានវ័យសែប្លាយ។
មួយរយៈចុងក្រោយនេះ គេសង្កេតឃើញថា ឧស្សាហ៍លេចចេញរូបភាពផ្អែមល្ហែមរវាង កញ្ញា ដេននី ក្វាន់ ជាមួយមនុស្សប្រុសថ្មីកំបាំងមុខ ដោយស្រីស្រស់ ទ្រព្យសម្បត្តិស្តុកដូចជាសេដ្ឋិនី ប្រើពាក្យហៅថ្មីថា «ប៉ាៗ» ជាភាសាពេញនិយម សម្រាប់គូស្នេហ៍សម័យថ្មី តែងហៅគ្នាដូចជាប្តីប្រពន្ធរៀបការរួចអ៊ីចឹងដែរ ដើម្បីបង្កើនភាពសិ្នទ្ធស្នាលគ្នាក្នុងសម្ព័ន្ធស្នេហ៍។
តារាសម្តែងស្រី ដែលមានស្រុកកំណើតនៅស្រុកជាំក្សាន្ត ខេត្តព្រះវិហារ មានទ្រព្យសម្បត្តិស្តុកដូចជាសេដ្ឋិនីទាំងវ័យក្មេង ព្រោះមានរបររកស៊ីក្រៅសិល្បៈ ដោយបើកសាឡន និងហាងលក់គ្រឿងសង្ហារិម មានដើមទុនខ្ទង់ ១០-២០ ម៉ឺនដុល្លារ កញ្ញា ដេននី ក្វាន់ បង្ហាញរូបកៀកកើយពេលញុាំអាហារជាមួយគ្នាថា៖ «ថ្ងៃនេះ ឆ្លៀតពេលមកញាំបាយថ្ងៃត្រង់ជាមួយប៉ាៗ ព្រោះមួយរយៈនេះរវល់រៀងៗខ្លួន ទោះរវល់យ៉ាងណាក៏នៅឆ្លៀតពេលសម្រាប់គ្នា»។
ក្រោយមកក៏មានពាក្យពេចន៍រំលេចចេញជាការសន្និដ្ឋានតាមភិនភាគ និងរូបរាងខាងក្រៅមាឌធំ សម្បុរស្រអែម លើបុរសកំបាំងមុខ ដែល ដេននី ក្វាន់ ហៅថា «ប៉ាៗ» នោះ។ ដោយក្រុមមហាជនអ្នកគាំទ្រក៏បានបន្លឺថា៖ «ប៉ាសម្លាញ់ចិត្តអូនចាំបាច់លាក់មុខប្ដីធ្វើអីចែ? បានគ្នាវិញត្រូវគ្នាវិញទៅ! មើលក មើលក្បាល ដូចជាពូប្ដីមុន គឺបង មករា ហ្នឹង! ឃើញតែមាឌ ក៏ដឹងហើយ ពូនឹងដូចជាធ្លាប់ស្គាល់»។
តែ កញ្ញា ដេននី ក្វាន់ តារាស្រីសិចស៊ី ដែលមិនត្រឹមតែស្ងាត់ពីការងារសិល្បៈនោះទេ ថែមទាំងលេចឮដំណឹងថា បានបែកម្ចាស់ស្នេហ៍ជាថៅកែលក់ឡាន លោក ចាន់ មករា និងប្រកាសដំណឹងថា អតីតជាគូស្នេហ៍នាងរូបនោះ គឺជាជនឆបាកទៀតផង កាលពីដើមខែមករា ឆ្នាំ ២០២២ នេះ។
ជារឿយៗ តាមរយៈរូបថតច្រើនសន្លឹក ដែលអមដោយសារនានាតាមបណ្តាញសង្គមហ្វេសប៊ុក អ្នកគាំទ្រតែងទទួលបាននូវដំណឹងទាំងសប្បាយ និងមិនសប្បាយចិត្តពី ដេននី ក្វាន់ ជាពិសេសនោះ គឺរឿងរ៉ាវផ្ទាល់ខ្លួនស្តីពីសម្ព័ន្ធស្នេហ៍តែម្តង។ ជាក់ស្តែងដូចជា នាពេលថ្មីៗ កញ្ញា ដេននី ក្វាន់ បានសម្រេចចិត្តទម្លាយមុខមាត់ពិតបុរសកំបាំងមុខ កាលពីប៉ុន្មានខែមុនថា៖ «រវល់ពេកភ្លេច Post អនុស្សាវរីយ៍ថ្ងៃសម្ពោធហាងពេជ្របងស្រី» ដោយមានរំលេចរូបបុរសជាគូស្នេហ៍ថ្មី វ័យសែប្លាយ ដែលកញ្ញាតែងបង្ហោះរូបបាំងមុខ និងហៅថា «ប៉ាៗ» នោះ។
តែព័ត៌មានលម្អិតច្បាស់ការថា បុរសគូស្នេហ៍ថ្មីទើបបង្ហាញមុខពិតនោះ ភ្នំពេញ ប៉ុស្តិ៍ មិនអាចទំនាក់ទំនងសួរបញ្ជាក់កញ្ញា ដេននី ក្វាន់ តាមទូរស័ព្ទធ្លាប់ទំនាក់ទំនងពីមុនបានឡើយ៕
