.jpg)
ផលិតផលក្នុងស្រុកត្រូវបានធ្វើតេស្ដគុណភាពមុនដាក់តាំងបង្ហាញ។ រូបថត សហការី
ភ្នំពេញ: ក្រោយធ្វើដំណើរទៅកាន់ទឹកដីអង្គរកាលពីដើមខែមករានេះ ពិព័រណ៍ផលិតផលខ្មែរនឹងមកដល់រាជធានីភ្នំពេញនាចុងខែមករា និងបន្ដជិតចុងខែកុម្ភៈខាងមុខនេះ ជាមួយនឹងការតាំងបង្ហាញផលិតផលក្នុងស្រុក ប្រកបដោយស្ដង់ដា។
ជាមួយនឹងក្ដីរំពឹងថា ពិព័រណ៍ក្នុងរាជធានីភ្នំពេញនេះ នឹងមានវត្ដមានអ្នកគាំទ្រផលិតផលជាតិរាប់ពាន់នាក់ ដែលពួកគេអាចទិញផលិតផលតុបតែងផ្ទះ និងផលិតផលម៉ូដ និងគ្រឿងតុបតែង ក៏ដូចជា ផលិតផលសុខុមាលភាព និងផលិតផលម្ហូបអាហារ ដែលគ្រោងរៀបចំចាប់ពីថ្ងៃទី ២៩ ខែមករា ដល់ថ្ងៃទី ២០ ខែកុម្ភៈ នៅ ២ ទីតាំង ឯផ្សារទំនើបជីបម៉ុង។
កញ្ញា ច័ន្ទ សីមា ប្រធានគម្រោងនៃក្រុមហ៊ុន Beyond Retail Business Cambodia ដែលទទួលខុសត្រូវលើការរៀបចំពិព័រណ៍នេះបានថ្លែងថា៖ «យើងស្ងើចសរសើរជាខ្លាំងចំពោះចំណាប់អារម្មណ៍ និងការគាំទ្រផលិតផលខ្មែរ និងក្រុមហ៊ុនផលិតខ្មែរនៅសៀមរាប»។
កញ្ញាបានបន្ថែមថា៖ «អ្នកដែលចូលមកមើលស្តង់ និងហាងទំនិញមានការចាប់អារម្មណ៍ខ្លាំង ហើយក៏ភ្ញាក់ផ្អើលផងដែរ ដោយសារផលិតផលខ្មែរដែលបានតាំងបង្ហាញមានគុណភាពខ្ពស់។ ប្រជាជនកម្ពុជាភាគច្រើនស្ងើចសរសើរចំពោះផលិតផលស្តង់ដាខ្ពស់បែបនេះ ដែលក្រុមហ៊ុនផលិតខ្មែរអាចផលិតបាន»។
ស្ថិតក្នុងចំណោមផលិតផលក្នុងស្រុក ដែលត្រូវបានតាំងបង្ហាញក្នុងពិព័រណ៍ផលិតផលខ្មែរ Jivet Thmey បាននាំយកគ្រឿងអលង្ការផលិតពីសម្បកគ្រាប់កាំភ្លើង និងប្រាក់។
លោក ឡុង ឡេង សហស្ថាបនិកគ្រឿងអលង្ការ Jivet Thmey ដែលមានទីតាំងក្រុងសៀមរាប និងបានចូលរួមពិព័រណ៍នៅអង្គរប៉ាវីស បាននិយាយថា ទាំងភ្ញៀវជាតិ និងអន្ដរជាតិចាប់អារម្មណ៍នឹងផលិតផលខ្មែរទាំងអស់ ហើយគ្រឿងអលង្ការរបស់លោកក៏លក់ដាច់ជាមួយតម្លៃក្រោម ២២ ដុល្លារជាទូទៅ។
លោក ឡេង អាយុ ៣៦ ឆ្នាំ ក៏ជាអ្នកឌីហ្សាញដែលអះអាងថា ផលិតផលរបស់លោកមានការរចនាខុសប្លែកពីផលិតផលក្នុងស្រុកដទៃ បានប្រាប់ ភ្នំពេញ ប៉ុស្ដិ៍ថា៖ «សង្ឃឹមថា ការតាំងពិព័រណ៍នៅភ្នំពេញខាងមុខ កាន់តែទាក់ទាញពលរដ្ឋខ្មែរបន្ថែមទៀត»។
ទិដ្ឋភាពពិធីតាំងពិព័រណ៍ផលិតផលខ្មែរ នៅអង្គរប៉ាវីស កាលពីដើមខែមករាកន្លងទៅ។ រូបថត សហការី
ជាស្ថាបនិកផលិតផលតម្បាញក្រមា និងភួយអំបោះតម្លៃ ២៥ ដុល្លារ កញ្ញា ឈុន កូនីង ក៏មើលពីការគាំទ្រពីសំណាក់បងប្អូនខ្មែរ ជាពិសេស អំឡុងពេលធ្វើដំណើរនៅចុងសប្ដាហ៍របស់ពួកគេ។
គួរបញ្ជាក់ថា ពិព័រណ៍នៅរាជធានី-ភ្នំពេញលើកទី១ នឹងធ្វើឡើងនៅថ្ងៃទី ២៩ និង ៣០ ខែមករា នៅផ្សារទំនើប ជីប ម៉ុង ណូរ៉ូ ម៉ល ដែលនឹងមានការតាំងបង្ហាញផលិតផលតុបតែងផ្ទះ និងផលិតផលម៉ូដ និងគ្រឿងតុបតែងហើយផលិតផលសុខុមាលភាព និងផលិតផលម្ហូបអាហារនឹងតាំងបង្ហាញនៅថ្ងៃទី ៥ និងទី ៦ ខែកុម្ភៈ។
ពិព័រណ៍ផ្សេងៗទៀតគ្រោងនឹងធ្វើឡើងនៅផ្សារទំនើប ជីបម៉ុង សែនសុខម៉ល នៅថ្ងៃទី ១២ និង ១៣ ខែកុម្ភៈ ដែលនឹងមានការតាំងបង្ហាញផលិតផលសុខុមាលភាព និងផលិតផលម្ហូបអាហារ ហើយផលិតផលតុបតែងផ្ទះ និងផលិតផលម៉ូដ និងគ្រឿងតុបតែងនឹងត្រូវបានតាំងបង្ហាញនៅថ្ងៃទី ១៩ និងទី ២០ ខែកុម្ភៈ។
កញ្ញា ច័ន្ទ សីមា បានបន្ថែមថា៖ «ដោយផ្អែកលើសម្ទុះនៃការចូលរួមដែលយើងបានមើលឃើញនៅក្នុងពិព័រណ៍ក្នុងខេត្តសៀមរាប យើងរំពឹងថា អ្នកទស្សនា និងអ្នកប្រើប្រាស់នៅភ្នំពេញនឹងកោតសរសើរផលិតផល និងក្រុមហ៊ុនផលិតខ្មែរដូចគ្នាដែរ»។
យោងតាមក្រុមអ្នករៀបចំព្រឹត្ដិការណ៍ពិព័រណ៍ផលិតផលខ្មែរនេះ ក្រុមហ៊ុនផលិតកម្ពុជាដែលមានបំណងចង់ចូលរួមក្នុងការតាំងបង្ហាញផលិតផលនេះ ត្រូវបំពេញលក្ខណៈវិនិច្ឆ័យមួយចំនួន រួមទាំងការធ្វើតេស្ដទាក់ទងនឹងប្រភពដើម និងគុណភាពផលិតផល។
សម្រាប់ព័ត៌មានលម្អិតចំពោះការដាក់ពាក្យសុំតាំងបង្ហាញ និងលក់ផលិតផល សូមចូលទៅកាន់តំណភ្ជាប់មួយនេះ https://forms.gle/v-89G3maFY1E6yn7Z8៕
