.jpg)
មនុស្សជាច្រើនចូលចិត្តឆ្កែប៊ុលដកបារាំងតូចៗដែលងាយលើកបី។ រូបថត AFP
ក្រុងវ៉ាស៊ីនតោន: ចោរ ២ នាក់ ដែលបានភ្ជង់កាំភ្លើងគំរាមប្លន់នារីឈ្មោះ Marieke Bayens អាយុ ២៧ ឆ្នាំ នៅលើផ្លូវ ១ នៃរដ្ឋកាលីហ្វ័រនីញ៉ាដោយមិនបានយកកាបូបរបស់នាងឡើយ។ ពួកគេចង់បានតែឆ្កែប៊ុលដកបារាំងតូច ១ ក្បាលឈ្មោះ Merlyn។
ពីក្រុងញូវយ៉កដល់ ឡូសអេនជឺលេស និងចាប់ពីក្រុងម៉ៃអាមី រហូតដល់ឈីកាហ្គោ ករណីចោរលួចឆ្កែមានការកើនឡើងខ្លាំង។ ជាសត្វអម្បូរតូច និងស្និទ្ធស្នាល និងងាយស្រួលលើកបី ឆ្កែប៊ុលដកបារាំង មានប្រជាប្រិយភាពខ្លាំង ដែលលក់ក្នុងតម្លៃរាប់ពាន់ដុល្លារលើទីផ្សារងងឹត។
ជនរងគ្រោះឈ្មោះល្បីល្បាញបំផុត ដែលរងនូវអំពើប្លន់សត្វចិញ្ចឹម គឺតារាចម្រៀងប៉ុប ឡេឌី ហ្គាហ្គា។ បុរសប្រដាប់អាវុធ ១ ក្រុម កាលពីឆ្នាំមុនបានលួចសត្វចិញ្ចឹមឆ្កែប៊ុលដក Koji និង Gustav ថែមទាំងបានបើកការបាញ់ប្រហារលើបុគ្គលិកម្នាក់ ដែលបណ្ដើរឆ្កែឱ្យរងរបួស។
កំពូលតារាចម្រៀង បានផ្ដល់ប្រាក់ ៥០ ម៉ឺនដុល្លារ ជាប្រាក់រង្វាន់ចំពោះការប្រគល់ និងអាចរកសត្វចិញ្ចឹមនោះមកវិញ។ ប៉ូលិសបានចាប់ខ្លួនមនុស្ស ៥ នាក់ចំពោះករណីនេះ។
ហេតុអ្វីបានជាឆ្កែប៊ុលដកបារាំងក្លាយជាគោលដៅរបស់ចោរទៅវិញ?
ការបង្ហោះរូបសត្វចិញ្ចឹមដ៏គួរឱ្យស្រឡាញ់ប្រឈមនឹងហានិភ័យចោរលួច។ រូបថត AFP
មាន ២ ករណី គឺតម្លៃលក់បន្ដខ្ពស់ចន្លោះពី ៣ ៥០០ ទៅ ៥ ០០០ ដុល្លារ ឬលើសពីនេះ។ នេះបើយោងតាមប្រេនឌី ហាន់ធ័រ មុនដេន អនុប្រធានក្លិបឃេនណែលអាមេរិក។
អ្នកស្រី បានប្រាប់ AFP ថា៖ «វាមិនមែនជាពូជសត្វធំៗ និងប្រើពេលយូរក្នុងការចិញ្ចឹមឱ្យធំ។ កំណើនប្រជាប្រិយភាពរបស់ពួកវានាំឱ្យមានចោរកម្មកើនឡើង តែការប្រើហិង្សាពិត
ជារឿងថ្មីគួរឱ្យប្រកាសអាសន្ន»។
ក្រុមអ្នកជំនាញបានផ្ដល់ដំបូន្មានដល់ម្ចាស់ ដោយគួរតែបំពាក់បន្ទះឈីបលើខ្លួនឆ្កែ ដើម្បីតាមដាន ចងខ្សែវាពេលចេញក្រៅ បិទទ្វារផ្ទះ ទុកដាក់ឯកសារអត្ដញ្ញាណឆ្កែឱ្យសមរម្យ ប្រើប្រឡៅកមាន GPS និងប្រយ័ត្នអ្នកប្លែកមុខមកគោះទ្វារ។
ដំបូន្មានសំខាន់បំផុតនោះ គឺម្ចាស់មិនគួរបង្ហោះរូបភាព ឬវីដេអូសត្វចិញ្ចឹមដ៏គួរឱ្យស្រឡាញ់ ដែលទាក់ភ្នែកចោរលួចប្លន់នោះទេ៕ AFP/HR
អ្នកដំណើរបណ្ដើរសត្វចិញ្ចឹមជាពូជឆ្កែប៊ុលដកបារាំង ដែលពេញនិយម និងជាមុខសញ្ញាលួចប្លន់របស់ចោរ។ រូបថត AFP
