ខេត្ដកណ្ដាល: ស្ថិតក្នុងវេលាដ៏សំខាន់នៃការស្រោចស្រង់ជីវិតកុមារដែលទាមទារការសម្រាករយៈពេលយូរ អ្នកជំងឺមហារីកវ័យក្មេងដែលទទួលការព្យាបាលនៅមជ្ឈមណ្ឌលព្យាបាលកុមារ បេះដូងជប៉ុនមិនត្រូវបានបំភ្លេចឱកាសសប្បាយរីករាយ និងការអប់រំរបស់ពួកគេឡើយ។
កុមារខ្លះនៅមានកម្លាំងពលំ ខ្លះហាក់មានសភាពទ្រុឌទ្រោម និងខ្លះទៀតខំដើរមកទាំងសេរ៉ូម និងឧបករណ៍ជំនួយតាមខ្លួនចូលក្នុងបន្ទប់ មានអេក្រង់ស្លាយបើករង់ចាំជាស្រេច។
ការទស្សនាសត្វនៅសួនសត្វដីល្បីនៅជាយរាជធានីនេះត្រូវបានរៀបចំឡើងក្នុងបំណងផ្ដល់ការកម្សាន្ដដល់កុមារមហារីកអំឡុងពេលពួកគេត្រូវសម្រាកព្យាបាលរយៈពេលយូរ។
កញ្ញា Sasaki Miyuko ជាបុគ្គលិកហាត់ការនៅមន្ទីរពេទ្យបេះដូងជប៉ុនដែលផ្ដួចផ្ដើមគម្រោងនេះបានប្រាប់ ភ្នំពេញ ប៉ុស្ដិ៍ថា៖ «កុមារកើតមហារីកភាគច្រើនត្រូវសម្រាកព្យាបាលនៅពេទ្យយ៉ាងតិច ៦ ខែ ទៅ ១ ឆ្នាំ។ ពួកគេមិនអាចចេញក្រៅអំឡុងពេលនេះទេ ព្រោះប្រព័ន្ធស៊ាំងជំងឺពួកគេចុះខ្សោយដោយការប្រើប្រាស់សារធាតុគីមី»។
កញ្ញាបន្ដថា៖ «ពួកគេត្រូវទទួលការព្យាបាលគ្រប់ពេលពេលវេលា ពិសេសពេលនេះក្នុងដំណាក់កាលកូវីដរាតត្បាតថែមទៀត។ កម្មវិធីពីចម្ងាយគឺជាជម្រើសដ៏ល្អសម្រាប់ពួកគេក្នុងការទស្សនាសួនសត្វតាមអនឡាញ»។
កញ្ញា Miyuko និស្សិតវេជ្ជសាស្ដ្រឆ្នាំទី៤ នៃសាកលវិទ្យាល័យក្រុងយូកូហាម៉ា ផ្នែកគិលានុបដ្ឋាយិកាបានបន្ដថា៖ «ដូច្នេះ ខ្ញុំចង់ឱ្យកុមារកើតមហារីកទទួលបាននូវការសប្បាយនៅមន្ទីរពេទ្យ និងចំណាយពេលវេលា ១ រយៈខ្លីបំភ្លេចការឈឺចាប់ដ៏យូរ អង្វែងរបស់ពួកគេ»។
ដើម្បីប្រើថិរវេលាសមល្មម ដែលផ្ដល់អត្ថប្រយោជន៍ដល់កុមារមហារីក ក្រុមការងារទាំងមន្ទីរពេទ្យបេះដូងជប៉ុន និងសួនសត្វភ្នំពេញសាហ្វារីបាន បានសម្រេចបញ្ចូលរវាងការផ្សាយវីដេអូផ្ទាល់ និងការថតវីដេអូទុកដើម្បីបង្កើតកម្មវិធីរួមមួយ។
មុនដំណើរកម្សាន្ដមកដល់ កញ្ញាបានចែកសំបុត្រ និងរំឭកប្រាប់ក្មេងៗថា៖ «យើងនឹងធ្វើដំណើរទៅកាន់សួនសត្វនៅថ្ងៃទី ២ ខែមករា»។ កុមារបាននាំគ្នាសួរថា «តើយើងនឹងចេញទៅខាងក្រៅ?» «តើសត្វនឹងមកលេងយើងដល់មន្ទីរពេទ្យ?»។
ក្នុងរយៈពេល ១ ម៉ោងកន្លះកុមារទាំង ២២ នាក់ បានធ្វើដំណើរជាមួយក្រុមការងារសួនសត្វភ្នំពេញសាហ្វារីជាច្រើនកន្លែង ដោយមានសកម្មភាពសប្បាយជាហូរហែ ដូចជាការសួរសំណួរពាក់ព័ន្ធនឹងសត្វការដាក់ចំណីឱ្យសត្វកវែង និងបទពិសោធថ្មីមួយទៀតដែលធ្វើឱ្យកុមារទាំងនោះមានអារម្មណ៍ថា ពួកគេពិតជាបានជិះដំរីក្នុងវីដេអូដែលពួកគេបានឃើញ។
ពេលពួកគេបញ្ចុកចំណីដល់សត្វ កវែងនៅលើអេក្រង់ស្លាយ កុមារដែលចង់ដាក់ចំណីបានបន្ដកន្ទុយគ្នាក្នុងការបង្កើតបទពិសោធស្និទ្ធស្នាលនឹងសត្វ ដោយក្ដីរីករាយយ៉ាងខ្លាំង។
នៅចំពោះមុខការសម្ដែងរបស់ក្រុមស្វា កុមារនាំគ្នាទះដៃ និងផ្ទុះសំណើចក្អាកក្អាយ។ ពេលវីដេអូជិះដំរីត្រូវបានចាក់បញ្ចាំង ពួកគេមានការភ្ញាក់ផ្អើលនឹងការឃើញខ្នងដំរីដ៏ខ្ពស់។
កញ្ញា Miyuko បានបញ្ជាក់ថា៖ «ក្រោយបញ្ចប់ដំណើរកម្សាន្ដទៅកាន់សួនសត្វនេះ កុមារស្រែកសួរថា តើពេលណាមានកម្មវិធីនេះទៀត?»។
កញ្ញា សុខ សុទ្ធឡែន ហៅ ខេត ជាប្រធានផ្នែកលក់ និងទីផ្សារនៅសួនសត្វ ភ្នំពេញ សាហ្វារី បានប្រាប់ ភ្នំពេញ ប៉ុស្ដិ៍ថា៖ «នេះជាដំណើរកម្សាន្ដតាម ZOOM ជាលើកដំបូង ដែលខាងភ្នំពេញសាហ្វារី បានផ្ដល់ជូនមន្ទីរពេទ្យបេះដូងជប៉ុន ពីព្រោះពួកគាត់ [កុមារមហារីក] ពិតជាឈឺចាប់ និងតស៊ូពុះពារជាមួយជំងឺដោយទទួលការព្យាបាលរយៈពេលវែង។ ដូច្នេះទើបក្រុមការងារខាងមន្ទីរពេទ្យមកពិភាក្សាជាមួយក្រុមការងារភ្នំពេញសាហ្វារី ដើម្បីបង្កើតដំណើរកម្សាន្ដនេះឡើង»។
កញ្ញា ខេត ទទួលស្គាល់ថា ដំណើរកម្សាន្ដមកកាន់សួនសត្វផ្ទាល់ពិតជាមានសំខាន់ក្នុងការផ្ដល់ចំណេះដឹង និងបទពិសោធនៃញាណដឹងកុមារ តែវាស្រ័យលើសុខភាពពួកគេផ្ទាល់។
កញ្ញានិយាយថា៖ «ការមកទស្សនាផ្ទាល់ អាចអនុញ្ញាតឱ្យក្មេងៗយល់ដឹងកាន់តែច្បាស់អំពីប្រភេទសត្វ និងចរិតលក្ខណៈរបស់ពួកវា តាមរយៈការកំណត់ត្រាដែលបានដាក់បង្ហាញនៅតាមទីកន្លែងនីមួយៗ»។
ដោយកិច្ចសហការល្អនឹងការបន្ដបើកភ្លើងខៀវពីភ្នំពេញសាហ្វារី មន្ទីរពេទ្យបេះដូងជប៉ុន នឹងរៀបចំកម្មវិធីកម្សាន្ដបែបនេះបន្ដទៀតនាឱកាសក្រោយ។
កញ្ញា Miyuko និយាយថា៖ «នៅភ្នំពេញសាហ្វារី មានកម្មវិធីសម្ដែងសត្វចំនួន ៥។ ដូច្នេះ ចំពោះកម្មវិធីលើកក្រោយ ខ្ញុំគិតដល់ការបង្ហាញវីដេអូសម្ដែងទាំងនោះ។ អរគុណខ្លាំងណាស់ចំពោះបុគ្គលិកនៅសួនសត្វដែលសហការបានយ៉ាងល្អ»។
មន្ទីរពេទ្យបេះដូងជប៉ុន ព្យាបាលកុមារជាង ៨០ នាក់រៀងរាល់ឆ្នាំ។ ពួកគេជាច្រើនទទួលការព្យាបាលជាសះស្បើយ និងចាកចេញពីមន្ទីរពេទ្យ។ ពួកគេបានមកដល់មន្ទីរពេទ្យនេះ ក្នុងស្ថានភាពធ្ងន់ធ្ងររួចស្រេចទៅហើយដែលពិបាកក្នុងការព្យាបាលណាស់។ កុមារខ្លះត្រូវបានបញ្ជូនទៅមន្ទីរថែទាំពិសេស និងអាចស្លាប់ទាំងវ័យក្មេង។
កញ្ញាបន្តថា៖ «ដូច្នេះ រៀងរាល់ថ្ងៃការចំណាយពេលក្នុងមន្ទីរពេទ្យពិតជាសំខាន់។ យើងផ្ដល់តម្លៃចំពោះព្រឹត្ដិការណ៍បែបនេះខ្លាំងណាស់ និងរមែងរៀបចំកម្មវិធីដូចជា គ្រិស្ដស្មាស់ និងខួបកំណើតក្នុងមន្ទីរពេទ្យផ្ទាល់»។
សម្រាប់ការទស្សនាសកម្មភាពកុមារធ្វើដំណើរទស្សនាសួនសត្វតាមអនឡាញ និងផ្ដល់ការឧបត្ថម្ភដល់មន្ទីរពេទ្យបេះដូងជប៉ុន សូមចូលទៅកាន់ Facebook របស់អង្គការ @japanheart.hospital៕