ភ្នំពេញ: ក្នុងពិធីសម្ពោធពិព័រណ៍ «សេរីភាពនៃថ្ងៃស្អែក» របស់សិល្បករ ប៉ែន រ៉ូប៊ីត និងការបើកដំណើរការឡើងវិញនៃវិចិត្រសាល «សិល្បៈត្រជាក់ភ្នែក» រូបភាពគំនូរពណ៌ប្រេង ២៤ ផ្ទាំងបង្កប់ទស្សនៈពីអំណាចយោធា និងភាពជារដ្ឋាភិបាល ត្រូវបានដាក់តាំងចាប់ពីថ្ងៃទី ១០ ខែមករា រហូតដល់ថ្ងៃទី ១០ ខែកុម្ភ: ដោយបើកទ្វារពីថ្ងៃអង្គារ ដល់ ថ្ងៃសៅរ៍ ចាប់ពីម៉ោង ១០ ព្រឹក រហូតដល់ ៧ ល្ងាច។
ពិព័រណ៍នេះ គឺជាកិច្ចសហការរវាង វិចិត្រសាល សិល្បៈត្រជាក់ភ្នែក (STP) និងវិចិត្រសាល Richard Koh Fine Art (RKFA)។ វាគឺជាផ្នែកមួយនៃយុទ្ធនាការ និងកម្មវិធីរបស់ STP សម្រាប់ការបើកដំណើរការឡើងវិញ បន្ទាប់ពីបានបិទនៅថ្ងៃទី ២០ ខែ កុម្ភៈ ឆ្នាំ ២០២១ ដោយសារការរីករាលដាលនៃជំងឺកូវីដ ១៩ ក្នុងសហគមន៍នៅកម្ពុជា។
សិល្បករ ប៉ែន រ៉ូប៊ីត វ័យ ៣១ ឆ្នាំប្រាប់ ភ្នំពេញ ប៉ុស្តិ៍ថា៖ «នេះជាការបើកបង្ហាញស្នាដៃតាំងពិព័រណ៍របស់ខ្ញុំលើកដំបូង តាំងពីកូវីដ។ វាជិត ២ ឆ្នាំហើយ។ ដូច្នេះ ខ្ញុំរីករាយណាស់ ដែលបានធ្វើវាឡើងម្ដងទៀត នៅ STP ដោយមានការជ្រោមជ្រែងពី យាន រស្មី ហើយក៏ចង់អរគុណដល់ វិចិត្រសាល RKFA ដែលជួយផ្សព្វផ្សាយការងាររបស់ខ្ញុំពីវិចិត្រសាលគាត់នៅម៉ាឡេស៊ី សិង្ហបុរី និងបាំងកកតាមរយៈប្រព័ន្ធផ្សព្វផ្សាយសង្គមផ្លូវការរបស់ពួកគាត់ ដូចជា Facebook, Twitter និង Instagram»។
លោក ន័រ ហារីត ជំនួយការនៅវិចិត្រសាល RKFA គូឡាឡាំពួ បានឱ្យដឹងពីដំណើរដើមទងឱ្យមានកិច្ចសហការនេះដំបូងថា លោក រីឆាត កូរ ជាស្ថាបនិកបានស្គាល់ រ៉ូប៊ីត តាមរយៈ សិល្បករគំនូរ ស៊ិន ម៉ានី។
នាយករៀបចំកម្មវិធី យិន រស្មី ដែលជាមិត្តល្អជាមួយវិចិត្រករ បានពិភាក្សាជាមួយ រ៉ូប៊ីត និងទទួលបានការអនុញ្ញាតពី វិចិត្រសាល RKFA ដើម្បីដំណើរការកម្មវិធីសហការនេះ។
សិល្បករ យាន រស្មី បានបន្ថែមថា៖ «សេរីភាពនៃថ្ងៃស្អែក គឺជាការងារសហការមួយ ដែលយើងបានអភិវឌ្ឍជាមួយគ្នាក្នុងការផ្សព្វផ្សាយសិល្បៈខ្មែរ នៅក្នុងស្រុក ក៏ដូចជាអន្តរជាតិ។ ទោះយើងមិនទាន់មានអ្វីជារូបរាងជាក់ស្ដែង តែខ្ញុំ និង រីឆាត បានពិភាក្សាគ្នាពីលទ្ធភាពនៃការងារយើងទៅថ្ងៃមុខ។ ខ្ញុំពិតជាមានកិត្តិយស ដែល RKFA បានសហការជាមួយ ក៏ដូចជារីករាយដែល រ៉ូប៊ីត ជ្រើសយកយើងក្នុងការតាំងស្នាដៃថ្មីបំផុតរបស់គាត់»។
រស្មី ឱ្យដឹងដែរថា កន្លងមកបើទោះ វិចិត្រសាលមិនបានធ្វើកម្មវិធីផ្សេងៗ តែទីតាំងក៏ត្រូវបានផ្ដល់ឱ្យសិល្បករប្រើប្រាស់ក្នុងមុខងារផ្សេងៗផងដែរ។
ការរៀបចំបើកដំណើរការឡើងវិញនៃវិចិត្រសាលត្រូវបានគ្រោងតាំងពី ខែវិច្ឆិកា ឆ្នាំ ២០២១ ប៉ុន្តែបញ្ហាដំបូល ជ្រាបទឹកនៅខែភ្លៀង និងកត្តាដទៃទៀតនាំឱ្យមានការបន្តអូសបន្លាយរហូតមកទល់ពេលនេះ។
ក្រឡេកមកមើលគំនិតបំផុសនៃស្នាដៃសិល្បៈរបស់ រ៉ូប៊ីត លោកថា កម្រងស្នាដៃនេះ មានកំណើតចេញពីចំណាប់អារម្មណ៍របស់លោក ទាក់ទិនទៅនឹង អំណាច យោធា ភាពជារដ្ឋាភិបាល និងប្រធានវិស័យភាពព្រមទាំងសហព័ន្ធរវាងគំនិតទាំងនេះ។
សិល្បករ មកពីខេត្តបាត់ដំបង រូបនេះថា៖ «គំនូរ ២៤ ផ្ទាំង មានដំណើរចេញពីរូបចំនួន ២ ផ្ទាំង ស្បែកជើងទាហានពណ៌ខ្មៅ និងគំនូរអជីវចល ដែលជាថូផ្កាពណ៌ខៀវជាមួយផ្កាភ្ញី។ រូបទាំង ២ ដើរតួជា ឬតំណាងឱ្យទាំងភាពខ្លាំង និងភាពផុយស្រួយ ស្ថិរភាព និងសេចក្ដីស្ងប់»។
លោកបន្តថា៖ «ចំពោះខ្ញុំផ្ទាល់ រំឭកទៅដល់អ្វី ដែលខ្ញុំអាចហៅបានថា វត្តមាននៃអវត្តមានរបស់សេចក្ដីស្លាប់ ដែលពណ៌បានក្លាយទៅជាវត្ថុ បង្កើតឱ្យមានរូបរាង ឬជាហេតុផលសម្រាប់សម្រស់ និងវត្តមាននៃសេចក្ដីស្លាប់ ដែលមិនអាចមើលឃើញនេះ»។
រូប ១ ដែលលោកថាពេញចិត្តជាងគេគឺ «ថ្ងៃដ៏ស្រស់ស្អាត» (The beautiful day) តួអង្គជាមនុស្សតែមានមុខជាក្បាលខ្មោច ហើយវាស្ថិតក្នុងពណ៌ផ្សេងៗគ្នា ពណ៌ខៀវ ពណ៌ប៉ារ៉ា មានផ្កាឈូករ័ត្ន និងផ្ទៃមេឃ។
លោក រ៉ូប៊ីត បានឱ្យដឹងថា៖ «ដោយសារខ្ញុំយល់ឃើញថា តួអង្គខ្មោចនិយាយពីសេចក្ដីស្លាប់ ប៉ុន្តែសេចក្ដីស្លាប់មិនមែនជារឿង ដែលសោកសៅ ឬឈឺចាប់រហូតទេ ពេលខ្លះវាក៏អាចជារឿងដែលស្រស់ស្អាត»។
សិល្បករដែលច្រើនបង្ហាញនូវអតីតកាល បច្ចុប្បន្ន និងអនាគត នៃត្របាញ់ភាពរបស់សង្គម នយោបាយកម្ពុជារូបនេះ បានឱ្យដឹងដែរថា ស្នាដៃ «សេរីភាពនៃថ្ងៃស្អែក» បានគ្របដណ្ដប់ពេញទៅដោយពណ៌ចែងចាំង មានក្រហម ខៀវ និងលឿង គឺវាបង្ហាញពីលទ្ធភាព និងការស្រមើស្រមៃគ្មានទីបញ្ចប់។
បន្ទាប់ពីអស់រយៈពេលជាច្រើនខែឆ្នាំនៃការលេងជាមួយខ្សែ ឬបន្ទាត់ និងបច្ចេកទេសនៃការចាក់ ឬរោយពណ៌ ស្នាដៃ នេះគឺជាការងារលើកទី២ ដែលលោកគូររូបបែបតួអង្គ។ លោកថា ចំណាប់អារម្មណ៍របស់លោកអាចជាការបកទៅរកគំនូរដូច ឬពិភពពិតជាជាងគំនូរអរូបី។
សិល្បករ យាន រស្មី ក៏បានឱ្យដឹងដែរថា វិចិត្រសាល សិល្បៈត្រជាក់ភ្នែក នឹងមានកម្មវិធីជាហូរហែទៀតជាផ្នែកនៃការផ្សព្វផ្សាយបើកសម្ពោធឡើងវិញនៃវិចិត្រសាល។
លោកបានឱ្យដឹងថា៖ «ខែកុម្ភៈខាងមុខនេះ ដោយសហការជាមួយអគារពាណិជ្ជកម្ម រ៉ូសវូត STP Cambodia នឹងរៀបចំការតាំងពិព័រណ៍ថ្មី ១ ទៀតដោយ ប៉ែន រ៉ូប៊ីត ហើយនៅថ្ងៃទី ១២ ខែកុម្ភៈ យើងនឹងមានព្រឹត្តិការណ៍ជាបន្តបន្ទាប់ដោយសហការជាមួយសិល្បករ ចាន់ ដានី និងកម្មវិធីផ្សេងទៀតដូចជាដំណើរកម្សាន្ត ការពិភាក្សាជាមួយសិល្បករ និងផ្សេងៗទៀតនៅ STP Cambodia។ កាលវិភាគរបស់យើងក្នុងឆ្នាំនេះត្រូវបានកក់ទុកជាមួយនឹងការតាំងពិព័រណ៍រហូតដល់ខែធ្នូ ឆ្នាំ ២០២២»។
ព័ត៌មានបន្ថែមមាននៅហ្វេសប៊ុក សិល្បៈត្រជាក់ភ្នែក www.facebook.com/STPCambodia៕