.jpg)
ស៊ូហ្សាណា និងប៉ាម៉ាក់ នាថ្ងៃទទួលសញ្ញាបត្របញ្ចប់ការសិក្សាបរិញ្ញាបត្រពីសាលា Raffles។ តារាចម្រៀង និងសម្តែងរលកក្រោយនៅទ្រនំហង្សមាសកញ្ញា រ៉េត ស៊ូហ្សាណា។ រូប ហ្វេសប៊ុក
ភ្នំពេញៈ ទោះបីទទួលបានជោគជ័យខ្លាំងលើវិថីសិល្បៈយ៉ាងណាក្តី ក៏តារាចម្រៀង និងសម្តែងស្រី ដែលជារលកក្រោយ វ័យក្មេង មានរូបសម្ផស្សស្រស់ស្អាត នៅផលិតកម្មហង្សមាស កញ្ញា រ៉េត ស៊ូហ្សាណា នៅមិនភ្លេចឆ្លៀតរៀនសូត្រនោះឡើយ ដោយថ្មីៗនេះ កញ្ញាទើបតែប្រកាសឱ្យដឹងពីសមិទ្ធផលនៃការបញ្ចប់ការសិក្សាថ្នាក់បរិញ្ញាបត្រនៅមហាវិទ្យាល័យឈ្មោះថា Raffles។
នេះបើតាមការបង្ហើបពីតារាចម្រៀងស្រីកំពុងតែឡើងកូដ អតីតជាបេក្ខនារីប្រឡងកម្មវិធី The Voice Cambodia នារដូវកាលទី២ ឆ្នាំ ២០១៦ រ៉េត ស៊ូហ្សាណា ឱ្យដឹងថា៖ «រៀនផង ធ្វើការផង ក្នុងពេលតែមួយ មិនមែនជារឿងងាយស្រួលទេ តែពេលនេះ ខ្ញុំអាចធ្វើបានហើយ បន្ទាប់ពីការខិតខំប្រឹងប្រែងអស់រយៈពេល ៤ ឆ្នាំ។ ខ្ញុំបានបញ្ចប់ការសិក្សា នៅមហាវិទ្យាល័យ Raffles លើមុខជំនាញគ្រប់គ្រងពាណិជ្ជកម្ម នៅឆ្នាំ ២០២២ នេះ»។
កញ្ញា រ៉េត ស៊ូហ្សាណា តារាចម្រៀងស្រីស្រស់វ័យក្មេង សម្ផស្សកាន់តែស្អាត កាក់កបនឹងទីផ្សារឡើងច្រៀងឆាកតន្ត្រីតាមខេត្តជាប់យ៉ាងរដឹក មមាញឹកកើបលុយដុំ នឹងអាជីពថតស្ប៉តពាណិជ្ជកម្ម និងជាតារាទូតសុច្ឆន្ទៈនៃផលិតផលនានាជាច្រើន ឱ្យដឹងបន្តថា៖ «នៅពីក្រោយភាពជោគជ័យមួយនេះ គឺមានអ្នកមានគុណទាំង ២ ដែលតែងតែផ្តល់ជាកម្លាំងចិត្ត និងភាពកក់ក្តៅ កូនអាចសម្រេចបានហើយ ថ្ងៃដែលអ្នកមានគុណចង់ឃើញកូនអាចពាក់អាវនេះហើយណា! ខ្ញុំអាចធ្វើបានអ្នកទាំងអស់គ្នា ក៏អាចធ្វើបាន ហើយអរគុណ បងប្អូនទាំងអស់គ្នា សម្រាប់ពាក្យជូនពរ។ អរគុណបងប្អូនទាំងអស់គ្នា ខ្ញុំធ្វើបានហើយណា អ៊ីចឹងអ្នកទាំងអស់គ្នា ក៏អាចធ្វើបានដែរ»។
គួរបញ្ជាក់ផងដែរថា ទោះបីទើបចូលប្រឡូកក្នុងសិល្បៈរយៈពេលប្រមាណ ៦ ឆ្នាំមែនក្តី តែតារាចម្រៀងស្រីរលកក្រោយ រ៉េត ស៊ូហ្សណា ស្រូបបានប្រជាប្រិយភាព ពីមហាជនឆាប់រហ័ស និងកំពុងតែកាក់កបរកលុយបានយ៉ាងច្រើន និងក្តោបបានយ៉ាងណែននូវតំណែងទូតសុច្ឆន្ទៈនៃផលិតផលនានាដូចជាក្រុមហ៊ុនទូរស័ព្ទ Cellcard ក្រុមហ៊ុនទូរស័ព្ទ OPPO ក្រុមហ៊ុន Charles & Keith និងផលិតផលផ្សេងទៀត ក្រៅពីអាជីពតារាចម្រៀង និងសម្តែងកុននោះ។
អ្វីដែលបានធ្វើមហាជនលាន់មាត់កោតសរសើរមិនដាច់ពីមាត់ និងភ្ញាក់ផ្អើលនោះដើមឆ្នាំ ២០២១ តារាស្រី រ៉េត ស៊ូហ្សាណា ស្រាប់តែបង្ហាញផ្ទះវីឡា សាងសង់ជិតរួច ២ ជង់។
អតីតជាសិស្សរៀននៅសាលាអន្តរជាតិសិង្ហបុរី បង្ហោះសារតាមអ៊ីនស្តាក្រាមជារូបផ្ទះ ២ ជង់ កម្ពស់ ២ ជាន់ ថា៖ «ម៉ាក់ប៉ាប្រាប់ថា កូនខំឱ្យហើយទៅទាន់នៅក្មេងក្រែងចាស់ទៅសំណាង! ការខិតខំតាំងពីអាយុ ១៦ ឆ្នាំ រហូតពេលនេះបានចេញជារូបរាងបណ្ដើរៗហើយ! See you soon in 2021 baby!»៕
