.jpg)
កុនខ្មែរ «ដើម្បីកូន» ត្រូវបានសកលវិទ្យាល័យ National Chengchi University នៅតៃវ៉ាន់ ស្នើសុំចាក់បញ្ចាំងឱ្យនិស្សិតខ្លួនទស្សនា។ រូបថត ហ្វេសប៊ុក
ភ្នំពេញៈ នាពេលថ្មីៗនេះ បុរសដែលជាចាងហ្វាង ជាតួសម្តែង អ្នកនិពន្ធ និងផលិតករភាពយន្តលោក ហ៊ុយ យ៉ាឡេង បង្ហើបពីដំណឹងដ៏រីករាយមួយ ចំពោះវណ្ណកម្មភាពយន្តខ្លួនគឺរឿង «ដើម្បីកូន» ត្រូវបានសាកលវិទ្យាល័យមួយនៅចិន កោះតៃវ៉ាន់ ស្នើសុំសិទ្ធិយកទៅចាក់បញ្ចាំងឱ្យនិស្សិតទស្សនានៅចន្លោះ ខែមីនា-មេសា ឆ្នាំ ២០២២ ខាងមុខនេះ។
នេះបើតាមសារបង្ហើបនូវក្តីសោមនស្សខ្លួនតាមបណ្តាញហ្វេសប៊ុកថា៖ «ដំណឹងដ៏សែនរីករាយរៀបនឹងបើកសាលា ក៏មានសាលាអន្តរជាតិផ្តល់តម្លៃដល់ភាពយន្តរបស់ខ្ញុំស្នើសុំភាពយន្ត រឿង ដើម្បីកូន ចាក់ជូនសិស្សដើម្បីសិក្សាស្វែងយល់ពីភាពយន្តជីវិតមួយនេះ។ អរគុណទៅដល់សាលា National Chengchi University (NCCU)នៅតៃវ៉ាន់។ ជួបគ្នាឆាប់ៗនេះ!»។
លោក ហ៊ុយ យ៉ាឡេង មហាជនបានស្គាល់ថា គឺជាបុរសស៊ូខ្លាំងនឹងការងារវិស័យភាពយន្តដោយសារលោកតែងតែយកខ្លួនទៅប្រឡូកក្នុងកុននីមួយៗ សឹងគ្រប់រឿង ឬអាចហៅថា «អ្នកនិពន្ធរឿងខ្លួនឯង សម្តែងខ្លួនឯង» ដោយវណ្ណកម្មខ្សែភាពយន្តបែបជីវិតរបស់លោក បានដើរតួជាអ្នកនិពន្ធ ផលិតករ ចាងហ្វាង និងតួសម្តែងនោះ រួមមានរឿងថ្មី នៅមិនទាន់ចាក់បញ្ចាំងនៅឡើយគឺរឿង «គ្រោះជីវិតកូវីដ ១៩» រឿង «ដើម្បីកូន» កំពុងចាក់បញ្ចាំងតាមរោងមហោស្រពភាពយន្តទាំងក្នុងស្រុកខ្មែរ និងបរទេស ខណៈរឿងបញ្ចាំងរួចមានរឿង «វិកលចរិត» រឿង «ធ្នប់» រឿង «ទារុណកម្មខ្មោច» រឿង «អាកុកអាច្រវ៉ា» និងរឿង «អាព្រឿងងាប់ហើយ»។
លោក ហ៊ុយ យ៉ាឡេង ក៏បានបញ្ជាក់ប្រាប់ ភ្នំពេញ ប៉ុស្តិ៍ តាមទូរស័ព្ទ ចំពោះកុនរបស់លោករឿង «ដើម្បីកូន» ដែលត្រូវបានសាកលវិទ្យាល័យ- NCCU នៅកោះតៃវ៉ាន់ ស្នើសុំចាក់បញ្ចាំងជូននិស្សិតខ្លួនទស្សនានោះដូច្នេះថា៖ «ដោយសារនៅខាងកោះតៃវ៉ាន់ គេមានការគោរពនូវច្បាប់កម្មសិទ្ធិបញ្ញាដូចជានៅប្រទេសជប៉ុនដែរ ទើបកុនរបស់ខ្ញុំ [រឿងដើម្បីកូន] ត្រូវបានខាងសាកលវិទ្យាល័យខាងលើ គេទំនាក់ទំនងមកខ្ញុំតាមអ៊ីមែល ដើម្បីស្នើសុំយកកុននេះ ទៅចាក់ឱ្យនិស្សិតគេមើលដូចជាគេបញ្ជាក់ថា អាចនឹងចាក់បញ្ចាំង នៅចន្លោះខែមីនា និងខែមេសា ឆ្នាំ ២០២២ ខាងមុខនេះ»។
បុរសដែលនិយមទុកសក់វែង ដែលដើរតួនាទីជាតារាសម្តែងផង ជាផលិតករផង និងជាថៅកែកុនផង រូបនេះបានបន្តថា៖ «ចំពោះមូលហេតុអ្វី ដែលកុនខ្ញុំ ត្រូវបានគេជ្រើសយកទៅចាក់បញ្ចាំងឱ្យនិស្សិតគេមើលនោះ ក៏មិនមានការបញ្ជាក់ពីខាងគេដែរ តែអាចវាដោយសារគេឃើញមាននៅតាមមហោស្រពភាពយន្តបរទេស ដូចជានៅទីក្រុងហុងកុង ដែលខ្ញុំក៏បានយកទៅចាក់បញ្ចាំងនៅទីនោះដែរ ឬអាចមកពីគេបានឃើញនៅតាមរយៈបណ្តាញសង្គមយូធូប (YouTube) ក៏ថាបាន។
យ៉ាងណា សម្រាប់ខ្ញុំពិតជាសប្បាយចិត្តខ្លាំង ដែលកុនខ្មែររបស់យើងទទួលបានការចាប់អារម្មណ៍ ពីខាងបរទេសដូចជាកោះតៃវ៉ាន់បែបនេះ ព្រោះវាជាលើកដំបូងហើយ សម្រាប់តៃវ៉ាន់នោះ»៕
