ក្រុងកាំប៉ាឡា: សមាគមពាណិជ្ជកម្ម ១ នៅភាគខាងជើងអ៊ូហ្គង់ដា បានហាមឃាត់ស្ដ្រីពីការអង្គុយជួរខាងមុខនៃរថយន្ដធុនធំ ក្រោយពីមានការសម្រេចថា សំពត់ខ្លី និងការបញ្ចេញសាច់ភ្លៅអាចរំខានការផ្ចង់អារម្មណ៍របស់អ្នកបើកបរ និងអាចបង្កជាគ្រោះថ្នាក់ចរាចរណ៍ថែមទៀត។
សេចក្ដីបង្គាប់នេះបានអនុវត្ដនៅទីក្រុងលីរ៉ា ដោយហាមឃាត់ដល់អ្នកបើកបរទាំងអស់ពីការអនុញ្ញាតឱ្យស្ដ្រី «រួមទាំងភរិយា» អង្គុយកៅអីមុខជាមួយអ្នកបើកបររថយន្ដធុនធំ។ សមាគមដែលតំណាងឱ្យក្រុមអ្នកជំនួញ និងអាជីវករក្នុងស្រុកបានឱ្យដឹងថា សេចក្ដីសម្រេចដែលហាមប្រាមអ្នកដំណើរជាស្ដ្រីនេះ ត្រូវបានធ្វើឡើងក្នុងហេតុផលសុវត្ថិភាព។
ផាទ្រីក អូពីយ៉ូ អូបូតេ ប្រធានក្រុមអាជីវករផ្សារចល័តក្នុងលីរ៉ាបានប្រាប់ AFP ថា៖ «អ្នកខ្លះស្លៀកខ្លី ដែលបង្ហាញសាច់ភ្លៅ និងធ្វើឱ្យអ្នកបើកបរបែកអារម្មណ៍ ហើយអ្នកបើកបរទៀតសោតក៏អាចបង្កគ្រោះថ្នាក់ចរាចរណ៍ ហើយមនុស្សលើរថយន្ដត្រូវស្លាប់។ បម្រាមនេះចូលជាធរមានភ្លាមៗ ហើយអ្នកបើកបរ និងអ្នកដំណើរទាំងអស់ត្រូវតែអនុវត្ដ»។
លោក អូបូតេ បាននិយាយថា ការសម្រេចត្រូវបានធ្វើឡើងក្រោយមានការត្រួតពិនិត្យលើធាតុបង្កគ្រោះថ្នាក់ចរាចរណ៍ក្នុងតំបន់ទាក់ទងនឹងអ្នកបើកបររថយន្ដធុនធំ។
លោកបានបន្ដថា៖ «យើងបានរកឃើញថា មិនមែនការបើកបរល្បឿនលឿន ការល្មើសរបស់អ្នកបើកបរ ដោយសារស្ដ្រីខ្លះអង្គុយនៅជួរមុខ ខណៈពួកគេស្លៀកខ្លី ខ្លះនាំអ្នកបើកបរចូលបារ៍ និងផឹកគ្រឿងស្រវឹង ដែលបង្កជាគ្រោះថ្នាក់»។
បម្រាមត្រូវបានធ្វើឡើង បន្ទាប់ពីគ្រោះថ្នាក់ចរាចរណ៍ក្រឡាប់រថយន្តធុនធំ ១ កាលពីថ្ងៃទី ១០ ខែមករា ដែលអ្នកជំនួញ ៩ នាក់បានស្លាប់ និង ២០ នាក់ទៀតរងរបួស៕ AFP/HR