សៀមរាប: ក្នុងដំណើរស្វែងយល់ពីវប្បធម៌នៅទីក្រុងប្រវត្តិសាស្ត្រសៀមរាបអង្គរ ម្ហូបអាហាររបស់ប្រជាជនប្រចាំតំបន់អរិយធម៌ដ៏ថ្កុំថ្កើងនេះបង្កប់ដោយរឿងរ៉ាវជាច្រើនដែលត្រូវបានជនជាតិស្កុតឡែន លោក ស្ទីវិន ហាក្រោល និងដៃគូអាមេរិក លីនណា ហ្គោលប៊ើក ពិពណ៌នាអមដោយរសជាតិអាហារក្នុង «ដំណើរកម្សាន្តភ្លក្សម្ហូបនៅសៀមរាប»។
បង្កើតឡើងក្នុងឆ្នាំ ២០១៤ និងគាំទ្រដោយភ្ញៀវទេសចរចាប់អារម្មណ៍នឹងវប្បធម៌អាហារខ្មែរ ស្ថាបនិកវ័យ ៤២ ឆ្នាំ លោក ស្ទីវិន បាននិយាយថា៖ «ម្ហូបខ្មែរ ជាមុខម្ហូបដែលត្រូវបានគេមើលរំលងជាច្រើន ក្នុងចំណោមមុខម្ហូបនៅអាស៊ី។ យ៉ាងណាមិញ មីឆា គ្រឿងសមុទ្រស្រស់ៗ ចំណីផ្អែមដ៏ទាក់ទាញ ម្ហូបតាមចិញ្ចើមផ្លូវ និងម្ហូបពីបុរាណ បានបង្ហាញពីប្រវត្តិសាស្ត្រ និងវប្បធម៌ដ៏សម្បូរបែបក្នុងប្រទេសដ៏ស្រស់ស្អាតនេះ»។
ថ្វីដ្បិតថាពីមុនមក មានក្រុមហ៊ុននៅសៀមរាបជាច្រើន ដែលផ្ដល់សេវាកម្មដំណើរកម្សាន្តបែបប្រហាក់ប្រហែលគ្នាដល់ទេសចរ ប៉ុន្តែ «ដំណើរកម្សាន្តភ្លក្សម្ហូបនៅសៀមរាប» ផ្ដល់បទពិសោធបែបសាមញ្ញ និងផ្ដោតទៅលើការរៀនពីវប្បធម៌នៅតាមតំបន់តាមរបៀបអ្នកស្រុកចម្អិនម្ហូប ជាជាងផ្ដល់បទពិសោធស៊ីវិល័យ។
អ្វីដែលនាំឱ្យលោក ស្ទីវិន បង្កើតដំណើរកម្សាន្តភ្លក្សម្ហូបនេះឡើង ត្រូវបានរំឭកប្រាប់ថា៖ «ខ្ញុំបានធ្វើជាចុងភៅអស់ ១០ ឆ្នាំ ហើយបានធ្វើការនៅភោជនីយដ្ឋានលំដាប់ផ្កាយ ២ Michelin ក្នុងប្រទេសស្កុតឡែន មុនពេលដែលខ្ញុំផ្លាស់មកកម្ពុជា។ លីណា មានគំនិតបង្កើតដំណើរទេសចរណ៍មួយ ដែលយើងណែនាំភ្ញៀវទេសចរមកកម្ពុជាអំពីមុខម្ហូបខ្មែរ»។
ដំណើរភ្លក្សម្ហូបពេលព្រឹក និងល្ងាចសម្រាប់ក្រុមតូចៗនេះត្រូវបានលោក ស្ទីវិន ឱ្យដឹងថា៖ «យើងនឹងណែនាំទេសចរឱ្យស្គាល់មុខម្ហូបពិសេសលើទីផ្សារខ្មែរដ៏ពេញនិយម និងអាហារសម្រន់តាមដងផ្លូវ រួមទាំងផ្លែឈើតាមតំបន់មួយចំនួនរបស់កម្ពុជា»។
ដំណើរកម្សាន្តពេលព្រឹក ចាប់ផ្ដើមពីម៉ោង ៨ ព្រឹក និងបញ្ចប់ចន្លោះម៉ោង ១ រសៀល។ មគ្គុទេសក៍នឹងនាំទេសចរទៅផ្សារមានពណ៌ចម្រុះមួយក្នុងខេត្តសៀមរាប បន្ទាប់មកដើរកាត់វាលស្រែ និងប្រាសាទនានា ទៅកាន់ភូមិ ១ ក្នុងស្រមោលប្រាសាទអង្គរ ដែលជាទីទទួលទានអាហារពេលព្រឹក។ បន្ទាប់មកភ្ញៀវនឹងទៅមើលអ្នកធ្វើនំបញ្ចុក និងកសិករមុនពេលត្រឡប់មកវិញ។
ដំណើរកម្សាន្តពេលល្ងាចចាប់ផ្តើមនៅម៉ោង ៥ ល្ងាច រហូតដល់ម៉ោង ៩ យប់។ ភ្ញៀវនឹងធ្វើដំណើរជុំវិញខេត្តសៀមរាបភ្លក្សម្ហូបខ្មែរដ៏ឈ្ងុយឆ្ងាញ់ នៅតាមទីតាំងផ្សេងៗគ្នា ចាប់ពីភោជនីយដ្ឋានលក្ខណៈគ្រួសារ និងភោជនីយដ្ឋានពិសេសក្នុងក្រុង រហូតដល់អាហារតាមផ្លូវនៅផ្សាររាត្រីដ៏មមាញឹកនៅជាយក្រុង។
ភ្ញៀវទេសចរនឹងបានភ្លក្សសាច់អាំងខ្មែរ កង្កែបបោបអាំងមានគ្រឿងខាងក្នុងដ៏ឈ្ងុយ និងក្រេបស្រាបៀរកម្ពុជា ២-៣ ដប ទៅតាមចំណូលចិត្ត។
ក្នុងដំណើរកម្សាន្តនេះ ភ្ញៀវទេសចរចំណាយ ៧៥ ដុល្លារ ដែលបូករួមទាំងម្ហូប ភេសជ្ជៈ និងថ្លៃធ្វើដំណើរ។
លោកបានបន្តថា៖ «អ្នកទេសចរភាគច្រើនដឹងតិចតួចណាស់អំពីម្ហូបខ្មែរ ឬមិនហ៊ានសាកប្រហុក។ យើងចង់ចែករំលែកការស្រឡាញ់ចូលចិត្តម្ហូបខ្មែររបស់យើងជាមួយពួកគេ។ វាពិតជាម្ហូបដែលសមនឹងទទួលការចាប់អារម្មណ៍ច្រើនពីពិភពលោក»។
ស្ទីវិន ឱ្យដឹងដែរថា គោលដៅរបស់ដំណើរកម្សាន្តនេះ គឺចង់ណែនាំភ្ញៀវឱ្យស្គាល់ម្ហូបខ្មែរ ទាំងគ្រឿងផ្សំ មុខម្ហូប និងអ្នកដែលធ្វើវា។ ប្រសិនបើ ភ្ញៀវណាមួយមានតម្រូវការជាក់លាក់ ឬប្រតិកម្មអាហារ ពួកគេអាចសម្របទៅតាមនោះ។ ពួកគេតែងតែស្វែងរកតូបអាហារថ្មីៗ និងភោជនីយដ្ឋាន បម្រើអាហារប្លែកថ្មីសម្រាប់ភ្ញៀវ។
ថ្វីដ្បិតអាហារ គឺចំណុចគោល ១ នៃដំណើរកម្សាន្តនេះ ភ្ញៀវទេសចរក៏មានឱកាសជួបស្វែងយល់ពីប្រជាជនខ្មែរនៅខាងក្រៅរង្វង់ទេសចរណ៍ និងរៀនបន្ថែមអំពីជីវិតប្រចាំថ្ងៃរបស់អ្នកភូមិក្នុងបរិយាកាសស្និទ្ធស្នាលរាក់ទាក់។
ក្រៅពីភ្ញៀវបរទេស លោកក៏បានឱ្យដឹងទៀតថា៖ «ពួកយើងក៏ធ្លាប់បានស្វាគមន៍ភ្ញៀវទេសចរខ្មែរជាច្រើននាក់ដែលធំធាត់នៅអាមេរិក កាណាដា និងអូស្ត្រាលី ក្នុងដំណើរទេសចរណ៍នេះ ហើយពួកគេតែងតែចាប់អារម្មណ៍យ៉ាងខ្លាំងក្នុងការស្វែងយល់បន្ថែមអំពីរបៀបដែលម្ហូបម្ហាខ្មែរត្រូវបានរៀបចំនៅក្នុងប្រទេសកម្ពុជា»។
មុនវិបត្តិកូវីដ លោក ស្ទីវិន ថា ដំណើរកម្សាន្តភ្លក្សអាហារនេះមានប្រជាប្រិយភាពចំណាត់ថ្នាក់កំពូលនៅខេត្តសៀមរាប ជាពិសេសក្នុងចំណោមអ្នកទេសចរ ដែលចង់ស្នាក់នៅ ២-៣ ថ្ងៃបន្ថែម ស្វែងយល់អំពីអាហារ និងវប្បធម៌នៃតំបន់ទេសចរណ៍ប្រវត្តិសាស្ត្រនេះ។
ជាអកុសល មែកធាង ១ ទៀតរបស់ពួកគេគឺ «ដំណើរទេសចរណ៍ភ្លក្សម្ហូបនៅភ្នំពេញ» ត្រូវបានបិទចាប់តាំងពីការចាប់ផ្តើមនៃជំងឺរាតត្បាត។
យ៉ាងណាមិញ លោកថា៖ «ដំណើរកម្សាន្តភ្លក្សម្ហូបនៅសៀមរាប» នៅតែដំណើរការ ប៉ុន្តែបច្ចុប្បន្នមានសកម្មភាពតែពេលព្រឹក។ សម្រាប់ពេលល្ងាច លោកសង្ឃឹមថា នឹងអាចចាប់ផ្ដើមវិញក្នុងពេលឆាប់ៗ។
លោក ស្ទីវិន កត់សម្គាល់ថា៖ «ថ្មីៗនេះយើងទើបតែទទួលបានភ្ញៀវទេសចរ។ យើងសង្ឃឹមថា នេះជាសញ្ញាដ៏ល្អមួយ ដែលភ្ញៀវទេសចរនឹងត្រឡប់មកកម្សាន្តកម្ពុជាវិញហើយ យើងក៏ទទួលដំណើរកម្សាន្តសម្រាប់ ២ នាក់។ បើសិនអ្នកមកតែម្នាក់ឯង យើងនឹងរៀបចំឱ្យមានម្នាក់ទៀត។ សម្រាប់អ្នកមានចំណាប់អារម្មណ៍ អាចចូលមើលគេហទំព័ររបស់យើងសម្រាប់ការរក្សាសុវត្តិភាពពីកូវីដ និងទទួលបានព័ត៌មានថ្មីៗ»។
ព័ត៌មានបន្ថែមដំណើរកម្សាន្តភ្លក្សម្ហូបនៅសៀមរាប មាននៅគេហទំព័រ @siemreapfoodtours៕