តារាសម្ដែងស្រីល្បីក្បាច់គុនល្បុក្កតោ កញ្ញា ពេជ្រ ចរណៃ ផ្សព្វផ្សាយពីធ្នូបុរាណខ្មែរ។ តារាសម្ដែងស្រីល្បីក្បាច់គុនល្បុក្កតោ កញ្ញា ពេជ្រ ចរណៃ ផ្សព្វផ្សាយពីធ្នូបុរាណខ្មែរ។ រូបថត ហ្វេសប៊ុក
ភ្នំពេញ: ជាតារាសម្ដែងរូបស្រស់កញ្ញា ពេជ្រ ចរណៃ ដែលល្បីខាងក្បាច់គុនល្បុក្កតោបុរាណខ្មែរ ពេលនេះបានសកម្មនឹងការចែករំលែកចំណេះដឹង និងប្រវត្តិសាវតារពីសម្ភារកីឡាបុរាណខ្មែរដទៃទៀតជូនមហាជនបានស្វែងយល់ ក៏ដូចជាស្វាគមន៍ការកុម្ម៉ង់ជាវវត្ថុទាំងនោះ ដើម្បីចូលរួមលើកស្ទួយមរតកដូនតាខ្មែរ។
ភ្ជាប់នឹងរូបថតគ្រងសម្លៀកបំពាក់បុរាណឈរយ៉ាងអង់អាចកាន់ធ្នូ តារាសម្ដែងបត់បែនបានគ្រប់ទម្រង់រូបនេះបានបរិយាយថា៖ «ខ្ញុំមកនេះគឺដើម្បីលើកស្ទួយផ្សព្វផ្សាយពីធ្នូបុរាណខ្មែរ ដែលជាស្នាដៃដូនតាខ្មែរ ដែលមានឆ្លាក់នៅលើសិលាចារឹក មានម៉ូដក្បាច់ កម្លាំង និងឋានៈ ខុសៗពីគ្នា! ហើយបានត្រូវកូនខ្មែរនៅជំនាន់នេះសិក្សាស្រាវជ្រាវ និងផលិតឱ្យចេញជារូបរាងត្រូវទៅតាមក្បួនខ្នាត ក្នុងគោលបំណងបង្ហាញទៅកាន់ពិភពលោកឱ្យស្គាល់ពីសម្បត្តិវប្បធម៌របស់ខ្មែរ និងរំឭកដល់ព្រលឹងដូនតាផង»។
នាងក៏បានបន្តរៀបរាប់ពីលក្ខណសម្បត្តិរបស់ធ្នូដោយក្នុងនោះមាន ធ្នូនាគព្រះកេស ៣ បែបក្រោយ រចនាប័ទ្មអង្គរវត្តប្រវែង ១,២០ ម៉ែត្រ ឋានៈមេទ័ព (ក្បួនដង្ហែកងទ័ពជ័យនៃព្រះបាទសូរ្យវរ្ម័នទី២)។ ស្រាវជ្រាវ និងផលិតដោយ ទិល ចាន់លីន ធ្នូនេះមានតម្លៃ ១ ឈុត ២៥០ ដុល្លារ (ធ្នូ ១ ព្រួញ ៣ និង បំពង់ដាក់ព្រួញ ១)។
នាងក៏បានបន្តរៀបរាប់ពីធ្នូបុរាណខ្មែរ ១ បែបទៀតរចនាប័ទ្មអង្គរវត្ត ចុងស្រួចសងខាង ប្រវែង ១,៣៥ ម៉ែត្រ ស្ថិតក្នុងឋានៈធ្នូ ទាហានព្រួញ (ក្បួនដង្ហែកងទ័ពជ័យនៃព្រះបាទសូរ្យវរ្ម័នទី២)។ ធ្នូនេះមានតម្លៃ ១ ឈុត៩០ ដុល្លារ (ធ្នូ ១ ព្រួញ ៣ និង បំពង់ដាក់ព្រួញ១) និងសម្រាប់មនុស្សស្រី និងប្រុស។
ក្រៅពីរៀបរាប់ប្រវត្តិសាស្ត្រ អមដោយការអំពាវនាវលក់ធ្នូបុរាណខ្មែរ កញ្ញា ពេជ្រ ចរណៃ ក៏បានបង្ហោះនូវរូបភាព អាវតេជះ ខោគុនខ្មែរ ក្រមាចង ខ្សែចងរឹតដៃ និងក្បាល ហៅថាសង្វារ ដោយប្រកាសថា ការទទួលកុម្ម៉ង់វត្ថុពីបុរាណនេះ គឺជាការរួមចំណែកផ្សព្វផ្សាយមរតកខ្មែរ។
តារាសម្ដែងស្រីល្បីក្បាច់គុនល្បុក្កតោរូបនេះបានបន្តទៀតថា៖ «អាវក្រោះ ឬអាវតេជះ សម្រាប់ការពារ ពេលចូលធ្វើសឹកសង្គ្រាម តតាំងជាមួយសត្រូវដ៏មានប្រសិទ្ធភាពក្នុងសម័យបុរាណ រហូតដល់សម័យនេះទោះបីវិទ្យាសាស្ត្រជឿនលឿន ក៏ការនិយមប្រើប្រាស់មន្តវិជ្ជាការទាំងនេះនៅតែមានប្រសិទ្ធភាពដែរ»។
តារាស្រីវ័យ ២៥ ឆ្នាំរូបនេះបានបន្តថា៖ «នាងខ្ញុំសូម ចូលរួមជាចំណែកមួយក្នុងការថែរក្សា និងផ្សព្វផ្សាយពីអាវតេជះទៅកាន់ពិភពលោកឱ្យគេស្គាល់ពីកម្ពុជាកាន់តែច្បាស់ថា កម្ពុជាពិតជាប្រទេសដែលមានសម្បត្តិវប្បធម៌ជាច្រើនល្អឯក និងចំណាស់ជាងគេ»។
កញ្ញា ពេជ្រ ចរណៃ បានទទូចថា នាងសុំត្រឹមតែមានការចូលរួមថែរក្សា ផ្សព្វផ្សាយនូវវប្បធម៌ អរិយធម៌ និងមរតកដូនតាខ្មែរបន្សល់ទុកមក៕
