.jpg)
បន្តោងសោព្យព្ជានៈបង្កប់ស្រទាប់ផ្កា និងបន្តោងខ្សែកមូលថ្លា មានផ្កាចម្រុះពណ៌គួរឱ្យទាក់ទាញ។ រូបថត សហការី
ភ្នំពេញ: កញ្ចុំបុប្ផា ស្រទាប់ផ្កាពណ៌ចម្រុះ ក្រហម លឿង ផ្កាឈូក ដែលត្រូវបានអប់ជាប់នៅក្នុងផ្ទៃរលោងថ្លាដូចកញ្ចក់កែវ ត្រូវបានរចនាជាបន្តោងខ្សែករាងមូល បន្តោងសោទម្រង់ព្យព្ជានៈអង់គ្លេស និងក្រាសសិតសក់ ដ៏គួរឱ្យស្រឡាញ់ តម្រូវចិត្តអ្នកស្នេហាផ្កាធម្មជាតិ មិនចេះរុះរោយ។
អ្នកស្រី អាហ្វីណា ជាស្ថាបនិកហាងអនឡាញ Floral Craft (@floralcraft.kh) ដែលបើកកាលពី ខែតុលា ឆ្នាំ ២០២១ បានប្រាប់ ភ្នំពេញ ប៉ុស្តិ៍ ពីគំនិតនាំឱ្យអ្នកស្រីបើកអាជីវកម្មនេះ តាមរយៈមិត្តភក្តិលក់ផលិតផលធ្វើពីដៃនៅម៉ាឡេស៊ី។
អាហ្វីណា អាយុ ២៤ ឆ្នាំ ប្រាប់ថា៖ «ខ្ញុំចូលចិត្តរបស់បែបនេះតាំងពីខ្ញុំនៅរៀននៅម៉ាឡេស៊ី។ សិស្សនៅម៉ាឡេស៊ីគេចូលចិត្តរបៀបឃ្យូតៗអ៊ីចឹង។ ដល់ពេលយើងមកខ្មែរ យើងខានជួបរបស់អ៊ីចឹង។ រហូតថ្ងៃមួយ ខ្ញុំឃើញមិត្តភក្តិខ្ញុំនៅម៉ាឡេស៊ី បង្ហោះអំពីការលក់របស់គាត់ ដែលអាចលក់បាន ១០០ បន្តោងសោ ក្នុង ១ ថ្ងៃ។ ខ្ញុំក៏មានចម្ងល់ចង់ដឹងថាគាត់លក់បន្តោងសោអ្វី។ ពេលចូលមើលផេច ខ្ញុំក៏ចាប់អារម្មណ៍ស្រឡាញ់អ្វីដែលគាត់ធ្វើ»។
ស្ត្រីដែលរស់នៅម៉ាឡេស៊ីតាំងពីនៅជាទារកជិតបាន ១ ខួប នឹងទើបផ្លាស់មកនៅកម្ពុជាបាន ៦ ឆ្នាំរូបនេះឱ្យដឹងថា ចំណេះជំនាញនេះ អ្នកស្រីបានរៀនពីមិត្តភក្តិគាត់ទាំងស្រុង ហើយសម្ភារគ្រប់យ៉ាងក៏នាំចូលពីប្រទេសម៉ាឡេស៊ី ទាំងអស់ដែរ។
បន្តោងខ្សែកមានជម្រើសពណ៌ និងផ្កាច្រើនប្រភេទតាមចំណូលចិត្ត។ រូបថត សហការី
អ្នកម្ដាយកូន ២ នាក់រូបនេះបានរំឭកប្រាប់ថា៖ «នៅពេលដែលទាក់ទងសួរមិត្តភក្តិខ្ញុំ គាត់ថាធ្វើខ្លួនឯង និងបើចង់ចេះ គាត់នឹងបង្រៀន។ ប៉ុន្តែ ពេលគាត់បង្រៀនគឺតាមទូរស័ព្ទ ដែលវាពិបាកបន្តិចដែរ ដោយសារយើងមិនបានធ្វើនឹងដៃ។ មិត្តភក្តិខ្ញុំក៏ផ្ញើអីវ៉ាន់តាមម្ដាយខ្ញុំដែលមកខ្មែរ។ ពេលខ្ញុំសាកធ្វើឃើញថាអាចធ្វើទៅបាន ក៏ចាប់ផ្ដើមតាំងពីពេលនោះមក»។
ដំណើរនៃការផលិតសម្ភារស្រស់ស្អាត ទាក់ភ្នែកនេះត្រូវបានអ្នកស្រីរៀបរាប់ប្រាប់ត្រួសៗថា គឺវាមានជាពុម្ពទាំងក្រាសសិតសក់ បន្តោងសោ មានអក្សរ ABC ឬក៏បន្តោងខ្សែក ដោយគេធ្វើតាមរូបមន្តក្នុងការលាយបែបជ័រ ចាក់ចូលទៅក្នុងពុម្ព ហើយបានដាក់ពណ៌ ដាក់ផ្កា ដែលគេយកហាលឱ្យក្រៀមនោះ។ តាមការកុម្ម៉ង់របស់អតិថិជន ការផលិតចាក់ពុម្ពរួចត្រូវទុកប្រហែលជា ១២ ម៉ោង នោះវានឹងប្រែក្លាយទៅជាជ័ររឹងថ្លាដូចគ្រីស្តាល់ រួចទើបអ្នកស្រីរៀបដាក់ខ្សែ ដាក់កញ្ចក់ដឹកជញ្ជូនឱ្យអតិថិជន។
អ្នកស្រី អាហ្វីណា បានឱ្យដឹងទៀតថា ភាគច្រើនពេលធ្វើរួច អ្នកស្រីនឹងខ្ចប់ផ្ញើទៅអតិថិជនភ្លាមៗ ព្រោះម៉ូយច្រើនមិនបានថតឱ្យភ្ញៀវមើលមុនទេ។ ទាល់តែរបស់ដល់ផ្ទះទើបអតិថិជនបានមើលថាស្អាត ឬមិនស្អាត ព្រោះរបស់ដែលអ្នកស្រីផលិតគឺសម្រាប់តែការកុម្ម៉ង់ទុកជាមុន មិនមានជាគំរូស្តុកឱ្យមើលនោះទេ។
យ៉ាងណាមិញ អ្នកស្រីថា តាំងពីដំណើរការមក មិនដែលទទួលមតិយោបល់អវិជ្ជមានណាមួយពីភ្ញៀវទេ ដែលនេះអាចរាប់ថា ជាជំហានដំបូងនៃប្រជាប្រិយភាពស្នាដៃសិប្បកម្ម។
អ្នកស្រី អាហ្វីណា បានលើកឡើងថា៖ «កន្លងមកយើងមិនធ្លាប់មានអ្នកប្រាប់ថា មិនស្អាតទេ។ អ្នកដែលកុម្ម៉ង់រួចតែងតែសរសើរថាស្អាត ហើយប្រាប់ថា គេពេញចិត្តណាស់។ អ្នកខ្លះគេទិញហើយទិញទៀត ៤-៥ ដង។ ដំបូងគេទិញជាខ្សែក ២-៣ ខ្សែ ក្រោយមក ក៏កុម្ម៉ង់ជាបន្តោងសោ ៣-៤ ទៀត។ ឃើញបែបនេះ ខ្ញុំសប្បាយចិត្តណាស់ ក៏ចង់ចេញម៉ូដថ្មីៗបន្ថែមទៀត ដូចជាក្របសៀវភៅ ក្រវិល និងនាឡិកាជាដើម»។
អាហ្វីណា បានឱ្យដឹងថា អតិថិជនអ្នកស្រីភាគច្រើនជាជនជាតិខ្មែរ ប៉ុន្តែក៏ធ្លាប់ទទួលបានភ្ញៀវជនជាតិឥណ្ឌា និងបារាំងផងដែរ ដោយភាគច្រើនគឺស្ថិតក្នុងវ័យចន្លោះពី ១៥-៣៥ ឆ្នាំ។
នៅហាងមានទទួលកុម្ម៉ង់ខ្សែក បន្តោងសោ និងក្រាសសិតសក់ ដែលមានតម្លៃពី ៤-៨ ដុល្លារ។ រាល់ការកុម្ម៉ង់ អតិថិជនត្រូវរង់ចាំយ៉ាងហោចណាស់ចំនួន ៣ ថ្ងៃ។
ក្រាសសិតសក់ជ័រថ្លាដែលមានបង្កប់ផ្កា និងស្លឹករុក្ខជាតិក្រៀម។ រូបថត សហការី
អ្នកស្រីបានបញ្ជាក់់ថា៖ «មែនទែនទៅបើយើងធ្វើ ២-៣ ថ្ងៃ គឺបាន ១ តែដោយសារយើងមានគេកុម្ម៉ង់ច្រើន អាចធ្វើមិនទាន់ ទើបយើងត្រូវប្រាប់ភ្ញៀវថា ៣ថ្ងៃជាង តែវាអាចលឿន ឬយឺតជាងហ្នឹងបន្តិច»។
បច្ចុប្បន្ន អាហ្វីណា ថាអីវ៉ាន់ដែលយកមកជិតអស់ស្ដុកទាំងពុម្ព ទាំងផ្កា ជាពិសេសពណ៌ផ្កាមួយចំនួន ដែលគេពេញនិយមខ្លាំងដូចជា ក្រហម ផ្កាឈូក ពណ៌លឿង។ ដូច្នេះ អ្នកស្រីកំពុងឱ្យមិត្តភក្តិផ្ញើមកឱ្យច្រើនបន្ថែមនៅជើងបន្ទាប់ ក្រោយពីឃើញអាជីវកម្មដំណើរការបានល្អគួរសម។
អ្នកស្រីថា ឥឡូវអ្នកស្រីមានពុម្ពតែ ៤-៥ ទេ ហើយក្នុង ១ ថ្ងៃជួនកាលអាចធ្វើបានចំនួន ១០ របស់។ តាមគម្រោងគឺអ្នកស្រីចង់បានពុម្ពច្រើន ដើម្បីកាត់បន្ថយការរង់ចាំពីអតិថិជន ក៏ដូចជាបង្កើតជម្រើសឱ្យច្រើនថែមទៀត។
គម្រោងថ្ងៃអនាគត អាហ្វីណា បានលើកថា៖ «បើនិយាយរឿងការងារយើងគ្មានបញ្ហាអីទេ តែយើងក៏មិនទាន់មានគម្រោងអ្វីជាក់លាក់។ យើងនៅថ្មីដែរ មិនអាចថាចង់បើកជាហាង ក៏បើកភ្លាមទេ»។
អ្នកស្រីបន្តថា៖ «គោលដៅយើងបច្ចុប្បន្នមានតែផ្ដោតលើការបំពេញតម្រូវការអតិថិជនប្រកបដោយគុណភាព។ ខ្ញុំធ្លាប់មានថ្ងៃដែលមិនបានគេងពេញ ១ ថ្ងៃ ដោយសារត្រូវប្រញាប់បង្ហើយការងារឱ្យគេព្រោះបានទទួលការកុម្ម៉ង់ច្រើន តែខ្ញុំចូលចិត្ត ព្រោះខ្ញុំស្រឡាញ់ការងារច្នៃប្រឌិតនេះ»៕
