.jpg)
អ្នកចូលរួមទាំងចាស់ទាំងក្មេងចម្រុះជាតិសាសន៍ទស្សនាការសម្ដែងសិល្បៈក្នុងថ្ងៃសម្ពោធ។ រូបថត IKIGAI Arts Center 2022
ភ្នំពេញ: អ្នកចូលរួមទាំងចាស់ទាំងក្មេង ចម្រុះជាតិសាសន៍ ជុំជិតបុរសត្លុក ២-៣ នាក់ ដែលមានទាំងអ្នកចំទើតលើជើងឈើវែង និងអ្នកកំប្លុកកំប្លែងផ្ទុះសំណើចដល់ក្មេងៗជាមួយល្បែងថ្ពិនភ្នែក បានផ្ដល់នូវបរិយាកាសរស់រវើកក្នុងពិធីសម្ពោធមជ្ឈមណ្ឌលសិល្បៈ អ៊ីឃីហ្កៃ (IKIGAI) ក្រោមប្រធានបទ «ការផ្លាស់ប្ដូរទិដ្ឋភាពសង្គម ក៏ដូចជា ការផ្លាស់ប្ដូរវិស័យសិល្បៈទាំងមូល»។
នេះគ្រាន់តែជាកម្មវិធី ១ ចំណោមកម្មវិធី ២៤ ដែលប្រមូលផ្ដុំដោយសិល្បករចំនួន ១៦ រូប នៅមជ្ឈមណ្ឌលសិល្បៈថ្មីនេះ ដែលស្ថិតលើបណ្ដោយផ្លូវ ២៤០ កាលពីម៉ោង ៣ រសៀល ថ្ងៃទី ៥ ខែ កុម្ភៈ ឆ្នាំ ២០២២។
ក្នុងសកម្មភាពទាំង ២៤ រួមមាន សកម្មភាពគូររូបដោយផ្ទាល់ តន្ត្រីសម្រាប់កុមារ សកម្មភាពបង្កើតសិល្បៈសូនរូប គំនូរបាញ់ ស៉្ប្រៃយ៍លើជញ្ជាំង ការតាំងបង្ហាញសិល្បៈនៃផ្កា ការសម្ដែងសៀក និងកម្មវិធីគួរឱ្យចាប់អារម្មណ៍ជាច្រើនទៀត។ សកម្មភាពមួយចំនួនធំមិនត្រូវបានគិតថ្លៃ ឬមានតម្លៃត្រឹមតែ ២ ដុល្លារ។
អ្នកនាង ឃ្លែ ថេតឌី អ្នកគ្រប់គ្រងនៅ អ៊ីឃីហ្កៃ បកស្រាយពីអត្ថន័យឈ្មោះរបស់មជ្ឈមណ្ឌលមក ភ្នំពេញ ប៉ុស្តិ៍ថា៖ «អ៊ីឃីហ្កៃ ជាគំនិតបុរាណជប៉ុន ដែលមានន័យថា ហេតុផលនៃការភ្ញាក់ពីដំណេករបស់អ្នក អ្វីដែលនាំឱ្យអ្នករីករាយ និងសុភមង្គលក្នុងជីវិតប្រចាំថ្ងៃរបស់អ្នក។ អ៊ីឃីហ្កៃ ជាដំណើរផ្ទាល់ខ្លួនរបស់បុគ្គលក្នុងការស្វែងរកតុល្យភាព និងភាពចុះសម្រុងក្នុងជីវិត រវាងអ្វីដែលយើងពូកែ យើងពេញចិត្ត អ្វីដែលពិភពលោកត្រូវការ និងអ្វីដែលយើងអាចធ្វើបាន»។
ជាមួយសកម្មភាពសិល្បៈកម្សាន្តដ៏សម្បូរបែប ទីធ្លាក្នុងថ្ងៃបើកសម្ពោធបានប្រែក្លាយជាកន្លែងផ្ដល់អារម្មណ៍ស្និទ្ធស្នាល ទំនាក់ទំនង មិត្តភាព និងការបំផុសគំនិតទាំងសម្រាប់សិល្បករ និងអ្នកស្រឡាញ់សិល្បៈទាំងអស់។
កម្មវិធី២៤ បានប្រមូលផ្ដុំសិល្បករ ១៦ រូប ក្នុងថ្ងៃសម្ពោធអ៊ីឃីហ្កៃ។ រូបថត IKIGAI Arts Center 2022
ក្នុងចំណោមអ្នកចូលរួមរីករាយយ៉ាងច្រើនកកកុញ កុមារត្រូវបានផ្ដល់ការយកចិត្តទុកដាក់ជាមួយសកម្មភាពជំរុញទំនាក់ទំនងជាមួយក្មេងដទៃ តាមរយៈចំណូលចិត្តសិល្បៈក្នុងទម្រង់ផ្សេងៗ ក្រោមស្នាមញញឹមមាតាបិតានៅពេលឃើញកូនៗមានសក្ដានុពលចាប់យកធ្វើអ្វីដែលថ្មី។
អ្នកនាង ឃ្លែ បន្ថែមថា៖ «ពិតជាសំណាងណាស់ ដែលបានប្រមូលផ្តុំសិល្បករជាច្រើននាក់ ក្នុងការអនុវត្តសិល្បៈច្រើនទម្រង់ក្នុងថ្ងៃតែ ១ ហើយបើកចំហសម្រាប់មនុស្សជាច្រើន។ វាមានសារៈសំខាន់ខ្លាំងក្នុងការប្រើប្រាស់សិល្បៈជាឧបករណ៍ ១ ដើម្បីផ្សព្វផ្សាយសារអំពីអ្វី ដែលទាក់ទងសង្គមកាន់តែច្រើននៅថ្ងៃនេះ»។
ទីធ្លារបស់មជ្ឈមណ្ឌល អ៊ីឃីហ្កៃ មានតួនាទីពហុបំណង ប៉ុន្តែអ្នកនាង ឃ្លែ ថា ពួកគេអាចបត់បែនទៅតាមស្ថានភាពកម្មវិធីជាក់ស្ដែង។
ជាធម្មតាមជ្ឈមណ្ឌលសិល្បៈនេះមានរៀបចំជាហាងតាំងលក់សៀវភៅ និងស្នាដៃសិល្បៈរបស់សិល្បករនៅកម្ពុជា។ មជ្ឈមណ្ឌលក៏មានកន្លែងរៀបចំសកម្មភាពសិប្បកម្ម ថតរូប ការបញ្ចាំងស្លាយ សាលសម្ដែងធំអាចផ្ទុកមនុស្សបាន ៥០ នាក់ និងបន្ទប់សម្រាប់សិល្បករប្រចាំការផងដែរ។
អ្នកនាង ឃ្លែ ប្រាប់ថា៖ «យើងចង់ឱ្យកន្លែងរបស់យើងជាកន្លែងដែលអាចបំផុសគម្រោង និងបង្កើតបទពិសោធដ៏អស្ចារ្យ ដោយទម្លុះរនាំងនៃការច្នៃប្រឌិតរបស់សិល្បករឱ្យកាន់តែល្អប្រសើរ និងផ្ដល់អារម្មណ៍ពិសេសទៅកាន់ទស្សនិកជនទាំងអស់»។
មជ្ឈមណ្ឌលសិល្បៈត្រូវបានបង្កើតក្នុងបំណងផ្តល់នូវការបំផុសគំនិត និងសំណើគម្រោងសិល្បៈមិនទម្រង់សម្តែង សិក្ខាសាលាប្រចាំសប្តាហ៍ សកម្មភាពចម្រុះ ការពិភាក្សា និងសន្និសីទ ដែលទាក់ទាញមនុស្សឱ្យតែងតែត្រឡប់មកទីនេះវិញ។
អ្នកចូលរួមកម្មវិធីនៅមជ្ឈមណ្ឌលសិល្បៈថ្មី អ៊ីឃីហ្កៃ លើវិថី ២៤០។ រូបថត IKIGAI Arts Center 2022
អ្នកនាង ឃ្លែ បានលើកឡើងពីគោលដៅ ២ នៃមជ្ឈមណ្ឌលសិល្បៈថ្មីនេះគឺ៖ ការនាំមកនូវលទ្ធភាពគ្មានដែនកំណត់ និងភាពរស់រវើក សម្រាប់សហគមន៍ឆ្ពោះទៅរកភាពរីកចម្រើន ព្រមទាំងការចែករំលែកសំណើច បទពិសោធ និងភាពអស្ចារ្យនៃសិល្បៈ។
អ្នកនាងបានបន្តថា៖ «អ៊ីឃីហ្កៃ ជាកន្លែងច្នៃប្រឌិត បើកចំហសម្រាប់មនុស្សគ្រប់គ្នាជាមួយជំហររឹងមាំអំពីតួនាទីនៃសិល្បៈនៅក្នុងសង្គម ដោយជឿថា នៅពេលដែលសិល្បៈត្រូវបានរួបរួម វាអាចបង្កើតការផ្លាស់ប្តូរ។ យើងចង់ផ្សារភ្ជាប់មនុស្សឱ្យច្រើនបំផុតតាមដែលអាចធ្វើទៅបាន ដោយមិនប្រកាន់ប្រវត្តិ ភេទ ឬសញ្ជាតិឡើយ»។
អ្នកគ្រប់គ្រងមជ្ឈមណ្ឌល អ៊ីឃីហ្កៃ បានបញ្ជាក់ថា៖ «គ្រប់គ្នាសុទ្ធតែមានភាពច្នៃប្រឌិត។ ដូច្នេះ យើងទើបតែបើកឱ្យមានប្រអប់គម្រោងសិល្បៈ ដែលអ្នកណាក៏អាចទម្លាក់គំនិតនៅក្នុងប្រអប់សាររបស់យើងនូវអ្វីដែលពួកគាត់ចង់សម្រេច»។
ព័ត៌មានបន្ថែមសូមចូលទៅកាន់ទំព័រហ្វេសប៊ុក @IkigaiArtsCenter៕
