.jpg)
ល្ខោនសៀកកម្ពុជាហ្វារ បានផ្ដល់ការកម្សាន្តដល់ទេសចរបរទេស និងភ្ញៀវជាតិអស់រយៈកាលជិត ១០ ឆ្នាំ។ រូបថត សហការី
ភ្នំពេញ: បន្ទាប់ពីការលុបចោល ការពន្យារពេល និងផ្អាកសកម្មភាពបណ្ដាលមកពីការបិទខ្ទប់ និងការរឹតបន្តឹងអស់រយៈពេលជាយូរទីបំផុត ល្ខោនសៀកកម្ពុជាហ្វារ ដែលផ្ដល់ការកម្សាន្តដល់ទេសចរជិត ១០ ឆ្នាំបានវិលត្រឡប់មកវិញ ជាមួយកម្មវិធីពិសេសឈ្មោះថា សៀកហ្វាររះឡើង (Phare Circus Rising) ដែលផ្ដល់ទស្សនីយភាពសម្ដែងរៀងរាល់ចុងសប្ដាហ៍ ថ្ងៃសុក្រ និងសៅរ៍ចាប់ពីម៉ោង ៧ យប់ ចាប់តាំងពីខែធ្នូមក។
អ្វីដែលកាន់តែពិសេស មុនពេលទស្សនាល្ខោនសៀក ទស្សនិកជនក៏អាចញ៉ាំអាហារនៅ ល្ខោនសៀកកម្ពុជាហ្វារបាន ដោយចាប់ពីម៉ោង ៥ ល្ងាច។ ហ្វារកាហ្វេ មានបម្រើអាហារពេលល្ងាចតាមបែបតាមដងវិថីដ៏ឈ្ងុយឆ្ងាញ់ ជាមួយនឹងមុខម្ហូបតម្លៃចាប់ពី ៤ ០០០ រៀលប៉ុណ្ណោះ។
លើសពីកន្លែងសម្ដែងសៀក នៅតង់ក្រហមសម្ដែងសៀកហ្វារ ក៏មានលក់អាវយឺត វត្ថុអនុស្សាវរីយ៍ វត្ថុធ្វើពីដៃ និងស្នាដៃសិល្បករហ្វារផងដែរ។
ប្រធានផ្នែកលក់ និងទីផ្សារ លោក ក្រេក ដចយ៍ ប្រាប់ ភ្នំពេញ ប៉ុស្តិ៍ថា៖ «ទីតាំងយើងបើក ២ ម៉ោងមុនការសម្ដែង ទស្សនិកជនអាចរីករាយនឹងការដើរមើលសម្ភារនៅក្នុងហាង និងក្នុងហ្វារកាហ្វេ ដែលមានបម្រើទាំងភេសជ្ជៈ ស្រាបៀរ ស្រាក្រឡុក ម្ហូប ដែលរៀបចំដោយចុងភៅក្នុងស្រុក»។
លោកបន្តថា៖ «ក្រោមភ្លើងចម្រុះពណ៌ពីតង់សៀកហ្វារ ភ្ញៀវអាចចាប់តុអង្គុយស្រស់ស្រូបអាហារក្នុងតម្លៃសមរម្យ និងមើលការសម្ដែងដោយឥតគិតថ្លៃមុនការសម្ដែងធំ។ គ្រប់គ្នា សុទ្ធតែស្វាគមន៍ចូលមកទទួលទាន បើទោះជាមិនទិញសំបុត្រចូលមើលការសម្ដែងធំក៏ដោយ លើកលែងតែពេលកំពុងសម្ដែង ដើម្បីជាសុវត្ថិភាពដល់សិល្បករ និងកុំឱ្យរំខានអារម្មណ៍ដល់អ្នកទស្សនា»។
ភ្ញៀវអាចរីករាយនឹងអាហារពេលល្ងាចតម្លៃចាប់ពី ៤០០០រៀល។ រូបថត សហការី
ក្រៅពីការដើរទិញអីវ៉ាន់ និងការញ៉ាំអាហារ នៅមានសកម្មភាពប្លែកៗមុនកម្មវិធីធំដូចជា ការសម្តែងស្វាគមន៍នៅជុំវិញផ្លូវចូល និងហាងកាហ្វេ ការទស្សនាក្រុមសិល្បករ អ្នកវាយស្គរ MEDHA និងឱកាសឱ្យភ្ញៀវតុបតែងខ្លួនស្លៀកឈុតប្រពៃណីថតរូប។
ចំពោះទស្សនីយភាពល្ខោនសៀកហ្វារ មានបញ្ជូលទាំងតន្ត្រីកន្ត្រាក់អារម្មណ៍ ការសម្ដែងរបាំ ល្ខោន សៀកកាយសម្ព័ន្ធ សៀកលេងជាមួយភ្លើង សៀកតោងខ្សែ សៀកបោះបាល់។
ជិត ១ ទសវត្សរ៍ហើយ ដែលសិល្បករនៅហ្វារបានតែងតែប្រឹងប្រែងហាត់សម ដើម្បីអាចធ្វើការសម្ដែងបានល្អបំផុតសម្រាប់ភ្ញៀវទេសចរ ក៏ដូចជាបានបង្កប់ខ្លឹមសារវប្បធម៌ អរិយធម៌ចែកចាយទៅតាមសាច់រឿងមួយៗ។
ប្រធានផ្នែកទីផ្សារជនជាតិអាមេរិក ដែលរស់នៅកម្ពុជា ១០ ឆ្នាំរូបនេះបន្តថា៖ «ពួកគេនិទានរឿងខ្មែរ និងលើកយក បទពិសោធផ្ទាល់ពីជីវិតរបស់អ្នកបង្កើត និងអ្នកសម្ដែង ដោយប្រើការសម្ដែងសៀកបែបទំនើបលើកអំពីប្រធានបទ សង្គ្រាម ការរើសអើង ទំនាក់ទំនង ភាពក្រីក្រ និងខ្មោច»។
លោកបានឱ្យដឹងដែរថា៖ «ការសម្ដែងខ្លះមានលាយ ផ្សែង សំឡេងឮខ្លាំងៗ និងភ្លើងហ្វារ ដូច្នេះសម្រាប់ភ្ញៀវដែលអាចនឹងមានបញ្ហា ឬមានកូនតូចអាចទាក់ទងមកបុគ្គលិកផ្នែកលក់សំបុត្រយើងផ្ទាល់»។
បច្ចុប្បន្ន ការសម្ដែងប្រចាំសប្ដាហ៍មានតែថ្ងៃសុក្រ និងសៅរ៍ ប៉ុន្តែលោក ក្រេកថា សង្ឃឹមនឹងអាចធ្វើការសម្ដែងរៀងរាល់យប់នៅពេលទ្វារទេសចរណ៍បើកទូលំទូលាយឡើងវិញ។
ការសម្ដែង «សៀកហ្វាររះឡើង» ដែលផ្ដល់ទស្សនីយភាពរៀងរាល់ថ្ងៃសុក្រ និងសៅរ៍ នៅសៀមរាប។ រូបថត Kim Chhay
សំបុត្រទស្សនាមានតម្លៃ ១០ ដុល្លារ ចំពោះមនុស្សពេញវ័យ និងឥតគិតថ្លៃសម្រាប់កុមារក្រោម ១២ ឆ្នាំ។ រីឯសំបុត្រអាចជ្រើសរើសកន្លែង មានតម្លៃ ២០ ដុល្លារសម្រាប់មនុស្សធំ និង ១០ ដុល្លារកុមារក្រោម ១២ ឆ្នាំ។
ល្ខោនសៀកកម្ពុជាហ្វារ គឺជាគំរូសហគ្រាសសង្គមដ៏ច្នៃប្រឌិតបំផុត ១ នៅកម្ពុជា។ ប្រាក់ចំណេញ ពីការលក់សំបុត្រ ទំនិញ និងការសម្តែងឱ្យឯកជនផ្សេងៗ នឹងជួយដល់ការអប់រំដោយឥតគិតថ្លៃ វគ្គបណ្តុះបណ្តាលសិល្បៈ និងកម្មវិធីគាំទ្រសង្គមរបស់ ហ្វារពន្លឺសិល្បៈក្នុង ខេត្តបាត់ដំបង។
លោក ក្រេក ថា៖ «អ្នកសម្ដែងមានប្រវត្តិចេញពីជីវភាពដ៏លំបាក និងបានអភិវឌ្ឍជំនាញនៅសាលាហ្វារពន្លឺសិល្បៈ ហើយពួកគេអាចផ្លាស់ប្ដូរជីវភាពពីការសម្ដែងសៀកនៅហ្វារ។ ដូច្នេះ តាមរយៈការចូលរួម សៀកហ្វារ ទស្សនិកជនទទួលបានទាំងភាពរីករាយនឹងការសម្ដែងផ្ទាល់ដ៏ល្អបំផុតនៅសៀមរាប ហើយក៏បានក្លាយជាផ្នែកមួយជួយឱ្យរស់រានឡើងវិញនៃសិល្បៈខ្មែរ ផ្តល់ហិរញ្ញវត្ថុដល់សាលា និងផ្តល់ការងារល្អដល់សិល្បករកម្ពុជា ដែលមានក្តីសុបិន»។
លោក ក្រេក ឱ្យដឹងថា តាំងពីបើកវិញពួកគេអាចទទួលភ្ញៀវចន្លោះពី ៦០-៨០ នាក់ ក្នុង ១ យប់ តែកាលមុនកូវីដ គឺចំនួនភ្ញៀវរហូតដល់ ៣០០-៤០០ នាក់ ក្នុងកាសម្ដែង ១ លើក។
លោកបញ្ចប់ថា៖ «សៀកហ្វារ មិនគ្រាន់តែជាការសម្តែងផ្ទាល់ដ៏ល្អបំផុតនៅទីក្រុងប៉ុណ្ណោះទេ។ វាជាបទពិសោធពេលល្ងាចពេញលេញ ១ ក្នុងតម្លៃដ៏អស្ចារ្យ។ ពេលវេលាអាចនឹងឆាប់បន្តិចសម្រាប់គ្រួសារ ប៉ុន្តែចំពោះអ្នកចង់ទៅផាប់ស្ត្រីត ឬក្លិបបន្តខ្ញុំគិតថាវាល្ងាចល្មមក្នុងការចូលរួមទស្សនា»។
សូមស្វែងរកព័ត៌មានបន្ថែមនៅទំព័រហ្វេសប៊ុក @PhareCircus៕
មុនពេលទស្សនាល្ខោនសៀក ភ្ញៀវអាចរីករាយនឹងអាហារឆ្ងាញ់ៗ។ រូបថត សហការី
