.jpg)
ខ្សែកច្នៃពីគ្រាប់ធញ្ញជាតិ និងកាបូបដេរដោយជនពិការ។ រូបថត សហការី
សៀមរាប: តូបទំនិញតូចច្រឡឹងប្រមាណ ២០ រំលេចផលិតផលក្នុងស្រុកសុទ្ធសាធ តម្រៀបគ្នានៅបរិវេណដី ១៥ គុណនឹង ២៨ ម៉ែត្រនៃវិថីអ៊ុំឃុនក្រុងសៀមរាប ក្រោមការចងក្រងជាផ្សារសហគមន៍ឈ្មោះថា «ផ្សារផលិតផលកម្ពុជា» ដោយផ្ដល់ភាពងាយស្រួលដល់ទេសចរស្រឡាញ់គាំទ្រស្នាដៃផលិតក្នុងស្រុកពិតៗ ក្រោមបរិយាកាសទិញទំនិញយ៉ាងរីករាយ និងគិតគូរបរិស្ថាន។
របស់ប្រើប្រាស់ និងវត្ថុអនុស្សាវរីយ៍រួមមាន ក្រមា ចម្លាក់ឈើ ស្ពាន់ ប្រាក់ ស្បែក របស់កែច្នៃពីស្នែងក្របី ពីពោះវៀនកង់ ក្រដាសកាសែត គ្រឿងសេរ៉ាម៊ិច ត្បូង គជ់ ប៉ៃលិន សម្លៀកបំពាក់ និងគ្រឿងអលង្ការច្នៃពីគ្រាប់ធញ្ញជាតិ។ ម្ហូបអាហារមាន គ្រឿងទេស គ្រឿងអាម៉ុក គ្រឿងការី ម្រេចកំពត និងការ៉េមត្នោត ជាដើម។
ជាទីប្រជុំផលិតផលដំបូង ១ ដែលរក្សាគុណតម្លៃផលិតផលក្នុងស្រុកឥតងាករេ «ផ្សារផលិតផលកម្ពុជា» (Made in Cambodia Market ឬ MCM) ត្រូវបានបង្កើតឡើងក្នុងឆ្នាំ ២០១៣ ដោយលោក អាបេ គ្រីស្ទាន ឌីបឿ និងលោក អ៊ុន សាវ៉ាន់។
ត្រឡប់ទីតាំងទើបប្ដូរថ្មីថ្មោង និងបើកឡើងវិញកាលពីថ្ងៃទី ៧ ខែ កុម្ភៈ ឆ្នាំ ២០២២ លោក សាវ៉ាន់ បានរៀបរាប់ពីប្រវត្តិផ្សារប្រាប់មក ភ្នំពេញ ប៉ុស្តិ៍ថា៖ «ពីមុនគេប្រើរូបភាពការប្រមូលផ្ដុំពិព័រណ៍ផ្សេងៗ។ តែដៃគូខ្ញុំម្នាក់ ដែលកាលនោះ ខ្ញុំធ្វើការជាមួយគាត់ ជាអ្នករៀបចំពិព័រណ៍សិល្បៈ គាត់នឹកឃើញថា ចង់ប្រមូលធ្វើជាផ្សារតូចៗធម្មតា»។
ដោយសម្រាំងយកតែផលិតផលក្នុងស្រុកពិតប្រាកដ លោកបានបញ្ជាក់ថា៖ «ក្នុង MCM មិនមែនសំដៅថាគ្រប់យ៉ាងស្ថិតតែនៅក្នុងខ្មែរទេ។ វត្ថុធាតុដើមខ្លះយើងមិនមានហើយនាំចូល ក៏ប៉ុន្តែពួកគាត់ដំឡើង ហើយកែច្នៃដោយខ្មែរ និងទោះបីពេលខ្លះម្ចាស់របស់ផលិតផលជាជនជាតិបរទេសតែអ្នកធ្វើខ្មែរ»។
ខ្សែកច្នៃពីគ្រាប់ធញ្ញជាតិ និងកាបូបដេរដោយជនពិការ។ រូបថត សហការី
ផ្ដើមចេញពីកម្មវិធីប្រមូលផ្ដុំផ្សារនៅលើដងវិថីនៅមុខសណ្ឋាគារ ស៊ីន្តា មុន្នី អង្គរ ដំណើរការឆ្នាំទី១ ផ្សារផលិតផលកម្ពុជាមានវត្តមានតែម្ដងគត់ក្នុង ១ ខែ។ ដោយមានការទទួលស្គាល់ច្រើន នៅឆ្នាំបន្តបន្ទាប់ ផ្សារបានវិវឌ្ឍដំណើរ ១ ថ្ងៃ ក្នុង ១ សប្ដាហ៍ ៤ ថ្ងៃ ក្នុង ១ សប្ដាហ៍ រហូតដល់ពេញ ៧ ថ្ងៃ ក្នុង ១ សប្ដាហ៍។
បច្ចុប្បន្នផ្សារផលិតផលកម្ពុជាបានប្ដូរមកទីតាំងជិតសណ្ឋាគារ ស៊ីន្តា មុន្នី អង្គរ វិញ ដែលស្ថិតនៅមិនឆ្ងាយពី ផាប់ស្ត្រីត និងមន្ទីរពេទ្យកុមារអង្គរ។
លោក សាវ៉ាន់ បានបន្តទៀតថា៖ «ចំណែកស្ថានភាពតូបយើងវិញ យើងចាប់ផ្ដើមពីបែបជាតង់ អាជីវករត្រូវរើចុះរើឡើងរាល់ថ្ងៃ។ ពេលឃើញការលំបាកពួកគាត់ ក្នុងឆ្នាំ ២០១៧ យើងក៏មានការកែប្រែ ធ្វើជាតូបមានលក្ខណៈដូចតូបកាហ្វេ ដោយគាត់អាចបិទបើកទ្វារលក់តែម្ដង»។
ភាពពិសេសនៃផ្សារគឺផលិតផលមិនជាន់គ្នាពីតូប ១ ទៅ ១ តូប ដោយសហស្ថាបនិក ៣៧ ឆ្នាំរូបនេះថា មិនចង់ឱ្យមានការប្រកួតប្រជែងគ្នា។
ហេតុផលដែលធ្វើឱ្យភ្ញៀវសប្បាយចិត្ត គឺពួកគាត់ទទួលបានផលិតផលស្នាដៃខ្មែរពិតៗ សេរីភាពក្នុងការដើរមើល ដើរទិញពីអាជីវករដ៏រួសរាយរាក់ទាក់ ដោយមិនមានការប្រទាញប្រទង់ហៅភ្ញៀវឡើយ។
ក្រៅពីលើកស្ទួយផលិតផលក្នុងស្រុក ផ្សារផលិតផលនេះក៏អនុវត្តការគិតគូរបរិស្ថាន ដោយប្រើក្រដាសកាសែត ឬក្រណាត់ចាស់ៗធ្វើជាថង់ច្រកទំនិញ ជំនួសឱ្យការវេចខ្ចប់ដោយប្លាស្ទិក។
សហស្ថាបនិក និងអ្នករៀបចំកម្មវិធី រូបនេះថា៖ «យើងមានច្បាប់ទម្លាប់ ពួកគាត់ចូលមកត្រូវតែគោរពតាម ដូចជាថង់ច្រកសំរាមយើងក៏ច្រកពីថង់បរិស្ថាន ដែលគេផលិតពីកាកអំពៅ។ ឯអាជីវករក៏ច្រកទឹកដាក់ដបពីផ្ទះដែរ ដើម្បីជាការជួយទាំងបរិស្ថាន និងលើកតម្លៃកន្លែងយើងផង»។
ក្រោមចក្ខុវិស័យបង្កើតផ្សារឱ្យមាននិរន្តរភាព លោក សាវ៉ាន់ មានក្ដីអំណរ ពេលឃើញអាជីវករធ្លាប់តែមិនស្គាល់អ្វីជា Fashion តែយូរទៅគាត់ចាប់ផ្ដើមបែកគំនិតច្នៃជាសម្លៀកបំពាក់។
លោកថា៖ «ពីអ្នកផលិតទៅជាអ្នកលក់ផ្ទាល់ ពីបុគ្គលិកទៅជាម្ចាស់ ពីអ្នកមិនចេះឌីហ្សាញអីសោះ ទៅជាចេះឌីហ្សាញ ពីហាងតូច ១ ទៅធំនេះ ហើយនេះជាគោលដៅរបស់យើង»។
ភ្ញៀវទេសចររីករាយនឹងដើរមើលទិញអីវ៉ាន់នៅផ្សារផលិតផលកម្ពុជា ក្រុងសៀមរាប។ រូបថត Made in Cambodia Market Team
ក្រៅពីជាផ្សារគាំទ្រផលិតផលក្នុងស្រុក និងបង្កើតការងារដល់ខ្មែរ ផ្សារក៏បានជួយគាំទ្រដល់ក្រុមសិល្បៈខ្មែរដូចជា សមាគមថ្លៃថ្នូរ ល្ខោនសៀកកម្ពុជាហ្វារ និងតន្ត្រីករផ្ញើជីវិតលើរទេះ ប្រាក់ សុផាន់ណា តាមរយៈការសម្ដែងនានាកន្លងមក។
ជាអកុសល ពេលនេះសកម្មភាពសម្ដែងទាំងអស់នេះត្រូវបានផ្អាក ដោយសារខ្សត់ភ្ញៀវអន្តរជាតិជាកត្តាចម្បង គួបផ្សំនឹងទីតាំងតូច។ ប៉ុន្តែសហស្ថាបនិករូបនេះថា នឹងព្យាយាមនាំយកទស្សនីយភាពសិល្បៈកម្សាន្តនេះត្រឡប់មកវិញ។
លើសពីគាំទ្រដោយភ្ញៀវបរទេស លោក សាវ៉ាន់ បានឱ្យដឹងថា៖ «យើងមានភ្ញៀវតក់ៗដែរ តែយើងចង់ធ្វើសួនមានកម្មវិធីឡើងវិញដើម្បីទាក់ទាញភ្ញៀវបន្ថែម ហើយដោយសា្នដៃបង្កើតដោយខ្មែរ យើងក៏សូមឱ្យបងប្អូនខ្មែរជួយគាំទ្រដូចគ្នា»។
ផ្សារផលិតផលកម្ពុជា ក៏ធ្លាប់បានចុះផ្សាយដោយទស្សនាវដ្ដី National Geographic magazine និង Skyway (Japanese Airline) ហើយសហស្ថាបនិក សាវ៉ាន់ បានលើកឡើងថា៖ «ចង់បញ្ជាក់ថា មិនមែនខ្ញុំខ្លាំងទេ គ្រប់យ៉ាងដោយសារបងប្អូនយើងបានសហការចូលរួមទាំងការចេះរាក់ទាក់ជាមួយភ្ញៀវ និងមិនបោកភ្ញៀវ ហើយយើងក៏ចង់អរគុណដល់អូតែលដែលតែងតែគាំទ្រយើង ដោយការនាំភ្ញៀវមកកន្លែងយើង»។
«ផ្សារផលិតផលកម្ពុជា» បើកជារៀងរាល់ថ្ងៃចាប់ពីម៉ោង ១២ ថ្ងៃត្រង់ដល់ម៉ោង ៦ ល្ងាច។ ព័ត៌មានបន្ថែមសូមចូលទៅកាន់ទំព័រហ្វេសប៊ុក @MadeinCambodiaMarket៕
