.jpg)
បាច់ផ្កា និងផ្ការក្សាក្នុងស៊ុមរូបថត ត្រូវបានរចនាឡើងពីផលិតផលរុក្ខជាតិក្រៀមៗទាំងអស់។ រូបថត សហការី
ភ្នំពេញ: ផ្កាកុលាប ផ្កាលីលី ផ្កាអ័រគីដេ ផ្កាឈូករ័ត្ន និងផ្កាជាច្រើនប្រភេទ និងចម្រុះពណ៌ត្រូវបានដាក់បញ្ចូលគ្នា រៀបអមជាមួយកន្ត្រក ក្នុងស៊ុមគំនូរ បាច់ផ្កា ឬវត្ថុអនុស្សាវរីយ៍នានា ដែលនាំឱ្យមានការចាប់អារម្មណ៍ខ្លាំងពីអតិថិជន ជាពិសេស ក្នុងឱកាសទិវានៃក្ដីស្រឡាញ់កន្លងទៅ។
សម្រស់បុប្ផា ដែលមើលទៅមិនស៊ាំភ្នែក រហូតដល់អ្នកមានចង់ដាក់ច្រមុះស្រង់ក្លិនពិដោររបស់វាទៀតផង។ ប៉ុន្ដែបើពិនិត្យពិច័យ និងកាន់ស្ទាបផ្ទាល់ដៃ ទើបដឹងថា ផ្កាទាំងអស់នេះគ្រាន់តែជាការច្នៃប្រឌិតចេញពីសម្បកពោត និងស្លឹកចាកប៉ុណ្ណោះ។
ហាង «ផ្កាខ្មែរ» ដែលបើកទ្វារលក់ផ្កាច្នៃចេញពីសម្ភារធម្មជាតិជាង ១ ឆ្នាំនេះ កើតពីចំណូលចិត្ដស្រឡាញ់ការកាច់ផ្កាក្រដាស និងចាប់ផ្ដើមបង្ហោះលក់តាមអនឡាញលេងៗ។
លោក វង្ស ហិរញ្ញនិយុទ្ទ ម្ចាស់ហាងផ្កាប្រាប់ ភ្នំពេញ ប៉ុស្តិ៍ថា៖ «មិត្តភកិ្តខ្ញុំ ជាជាងកាត់សក់ ពេលទំនេរ គាត់កាច់ផ្កា ដោយផ្ដើមការច្នៃផ្កាពីក្រដាស រួចបង្ហោះលក់ធម្មតា។ តាមរយៈកិច្ចការនេះ ពួកយើងក៏មានឱកាសបានស្គាល់ប្អូនស្រី លីណា ជាអ្នកធ្វើផ្កាពីសម្បកពោតយូរហើយ តែធ្វើលេងៗនៅផ្ទះលក់អនឡាញ»។
លោកបន្តថា៖ «ប្អូនស្រីបានណែនាំយើងថា ផ្កាដែលធ្វើពីក្រដាសមិនសូវមានតម្លៃទេ តែបើយកសម្បកពោតច្នៃវាមានតម្លៃ និងប្លែកគួរឱ្យចាប់អារម្មណ៍ជាង។ យើងក៏រៀនពីគាត់ទាំងរបៀបធ្វើ និងរបៀបទុកដាក់។ យើងមើលឃើញថា វាស្អាត និងអាចរក្សាទុកបានយូរ និងមិនទាន់មានអ្នកធ្វើទូលំទូលាយច្រើន។ ដូច្នេះយើងក៏ចាប់ផ្ដើមបង្កើត ផ្ទះ «ផ្កាខ្មែរ» នេះ»។
បុគ្គលិកយកសម្បកពោតស្ងោររួច ទៅហាលសំដិលថ្ងៃល្មមៗ។ រូបថត សហការី
ចាប់ពីសម្បកពោត ស្លឹកចាក រហូតដល់ស្មៅក្រៀម និងផ្កាពោត សុទ្ធតែជាវត្ថុធាតុដើមសម្រាប់ផលិតផ្កាដ៏ស្រស់ស្អាត ដែលងាយស្រួលរក។
អតីតអ្នកធ្វើការផ្នែកទេសចរណ៍រូបនេះ បាននិយាយថា លោកគ្រាន់តែសុំពីអ្នកលក់ពោតស្ងោរ និងពោតអាំង ខណៈដើរបេះបោចដើមស្មៅបន្ថែមជាគ្រឿងលម្អ។ ប៉ុន្ដែដោយសារតម្រូវការកើនខ្ពស់ លោកបានដាក់ម៉ូយជាមួយអ្នកលក់ពោត ដើម្បីឱ្យពួកគេដឹកមកដល់ទីតាំងតែម្ដង។
លោក ហិរញ្ញនិយុទ្ទ បានឱ្យដឹងថា៖ «យើងបានផ្ដាំគាត់ឱ្យជួយទុកសម្បកពោតឱ្យយើង ដោយពេលខ្លះយើងជួយទិញពោតគាត់ និងថ្ងៃខ្លះក៏ជូនជាថវិកាដល់គាត់។ អ៊ឹចឹង ឥឡូវពេលគាត់បកសម្បកពោតហើយ គាត់មិនចោលទៀតទេ។ ពួកគាត់ទុកក្នុងថង់សម្រាប់ពួកយើង»។
ចំពោះលក្ខណៈខុសគ្នារបស់ផ្កាច្នៃ និងផ្កាធម្មតា ឬផ្កាក្រដាស យុវជនរូបនេះ បានអះអាងថា ផ្កាច្នៃចេញពីរុក្ខជាតិក្រៀមទាំងនេះ ប្រើដំណាក់កាលច្រើនជាងការផលិតផ្កាក្រដាស ដែលគ្រាន់តែទិញក្រដាស និងបត់។
លោកបរិយាយថា ចំពោះផ្កាពោត ពួកគេត្រូវយកសម្បកទៅស្ងោរបន្ថែម និងស្ងោរល័ក្ដពណ៌ដើម្បីរំលេចទៅតាមពណ៌ផ្កានីមួយៗ រួចយកហាល។ ចំពោះការហាលក្រោមកម្ដៅថ្ងៃនេះ បើវាក្ដៅពេក វាធ្វើឱ្យសម្បកពោតស្រួយ ហើយបើមិនស្ងួត វាអាចដុះផ្សិត។ ដូច្នេះ គេត្រូវហាលវាឱ្យល្មមៗ និងយកទុកដាក់ ទើបមានអ្នកកាត់ អ្នកបត់ និងអ្នកធ្វើចេញម្ដង ១ ស្រទាប់ៗ។
លោក ហិរញ្ញនិយុទ្ទ លើកឡើងថា៖ «វាអាចចូលរួមមួយចំណែកតូចក្នុងការជួយបរិស្ថាន។ បើប្រជាជនមានការគាំទ្រច្រើន វាជួយបង្កើនការងារច្រើន ពីព្រោះយើងប្រើមនុស្សធ្វើទាំងអស់។ វាទុកបានយូរ និងស្រស់ស្អាតម្យ៉ាងពីផ្កាទូទៅ។ តែបើគិតពីគុណតម្លៃ បើទោះវាមានតូច មានធំ មានខ្លី មានវែងមិនស្មើគ្នា វាបញ្ជាក់ពីភាពពិសេសនៃវត្ថុដែលយើងច្នៃ»។
លោក វង្ស ហិរញ្ញនិយុទ្ទ សហស្ថាបនិកហាង ផ្កាខ្មែរ កំពុងរៀបចំសម្បកពោត។ រូបថត សហការី
យ៉ាងណាមិញ ម្ចាស់ហាងផ្កាខ្មែររូបនេះ បញ្ជាក់ថា ហាងលោកទទួលការកុម្ម៉ង់ជាប្រភេទផ្កាកន្ដ្រក និងផ្កាបាច់ ដោយមិនទាន់មានលទ្ធភាពផ្គត់ផ្គង់ទ្រង់ទ្រាយធំនោះទេ ពីព្រោះលោកគិតពីស្ដង់ដា និងបទពិសោធ។
ចំពោះតម្លៃ វាអាស្រ័យលើទង កន្ដ្រក បាច់ ចំនួនតិច ឬច្រើន ដែលជាក់ស្ដែងផ្កាដ៏ស្រស់ស្អាត ១ កន្ដ្រកមានតម្លៃចាប់ពី ២០ ដុល្លារ។
រីឯ ការកុម្ម៉ង់ម៉ូដផ្កា លោកបាននិយាយថា៖ «ខាងហាងធ្វើផ្កាគ្រប់ប្រភេទ ជាពិសេសផ្កាណាដែលគេពេញនិយម ដូចជា ផ្កាកុលាប ផ្កាឈូករ័ត្ន ផ្កាអ័រគីដេ ផ្កាលីលីជាដើម។ តែបើសិនកុម្ម៉ង់ម៉ូដផ្កាណា ដែលយើងអាចធ្វើបាន យើងនឹងទទួល។ ម៉ូដណា ពិបាកពេក ឬត្រូវចំណាយពេលច្រើនពេក យើងមិនហ៊ានទទួលទេ ឬពេលខ្លះយើងទទួល តែយើងអាចសូមពេលគាត់យូរបន្តិច»។
លោក ហិរញ្ញនិយុទ្ទ ទទួលស្គាល់ថា ការលក់ផ្កាសម្បកពោតដំបូង មិនមានអ្នកគាំទ្រនោះទេ តែហាងផ្កាខ្មែរកាន់តែមានការទទួលស្គាល់ខ្លាំង ពេលភ្ញៀវតែងទៅហើយត្រឡប់វិញ ដោយសារពួកគេមើលឃើញពីភាពស្រស់ស្អាត និងជួយលើកទឹកចិត្ដដល់ការច្នៃប្រឌិតរបស់កូនខ្មែរ។
លោកនិយាយថា៖ «ការទទួលបានការគាំទ្រពីអតិថិជន វាជាកម្លាំងចិត្តរបស់យើង ជាអ្នកធ្វើឱ្យប្រឹងធ្វើ ប្រឹងច្នៃវាបន្ថែមទៀត»។
ថ្មីៗ ហាងផ្កាខ្មែរ ស្ថិតនៅផ្ទះ ២៥០ ផ្លូវ ១៥៣ សង្កាត់បឹងកេងកង ៣ ខណ្ឌចំការមន ក៏មានលក់ផ្កាស្រស់ដែរ តាមតម្រូវការទីផ្សារអតិថិជន។
សម្រាប់ព័ត៌មានបន្ថែម សូមចូលទៅកាន់ Facebook ផ្កាខ្មែរ-Pkar Khmer៕
សកម្មភាពផលិតផ្កាច្នៃចេញពីសម្បកពោត និងរុក្ខជាតិក្រៀមដទៃ។ រូបថត សហការី
