ក្រុងកាប៊ុល: ភាពអត់ការងារធ្វើ ថែមបំណុលវ័ណ្តក និងកាតព្វកិច្ចពុះពារចិញ្ចឹមបីបាច់កូនៗ លោក នូរូដឌីន យល់ឃើញថា លោកគ្មានជម្រើសអ្វីក្រៅពីលក់ក្រលៀន ដែលជាមធ្យោបាយដ៏ពេញនិយមក្នុងចំណោមពលរដ្ឋអាហ្វហ្គានីស្ថានជាច្រើនទៀតក្នុងការផ្គត់ផ្គង់គ្រួសារ។
ទំនោរលក់សរីរៈនេះកាន់តែរីករាលដាលខ្លាំងនៅភាគខាងលិចទីក្រុង Herat ដែលជាតំបន់លំនៅឋាន ត្រូវបានដាក់រហស្សនាមថា «ភូមិក្រលៀនមួយ»។
លោក នូរូដឌីន បានប្រាប់ AFP ក្នុងទីក្រុង ដែលមានព្រំដែនជាប់ប្រទេសអុីរ៉ង់ថា៖ «ខ្ញុំត្រូវតែធ្វើដើម្បីការរស់រានរបស់កូនៗខ្ញុំ»។
លោក នូរូដឌីន ស្ថិតក្នុងចំណោមមនុស្ស ៨ នាក់ ដែលទីភ្នាក់ងារបារាំង AFP បានធ្វើសម្ភាស ដោយពួកគេបានសម្រេចចិត្ដលក់ក្រលៀន ដើម្បីផ្គត់ផ្គង់ជីវភាពគ្រួសារ ឬសងបំណុល ដែលខ្លះសុខចិត្ដលក់ត្រឹមតម្លៃ តែ ១ ៥០០ ដុល្លារប៉ុណ្ណោះ។
វាជាជំនួញខុសច្បាប់ចំពោះការទិញលក់សរីរៈទៅឱ្យប្រទេសអភិវឌ្ឍន៍បំផុត ជាទីដែលអ្នកផ្ដល់ទាក់ទងផ្ទាល់ជាមួយអ្នកទទួល ឬអ្នកធ្វើដោយទឹកចិត្ដសណ្ដោសបរិសុទ្ធ ដែលមិនមើលឃើញប្រយោជន៍តបស្នង។
សាស្ដ្រាចារ្យ មូហាមេដ វ៉ាឃីល ម៉ាទីន ជាអតីតគ្រូពេទ្យវះកាត់កំពូលនៅមន្ទីរមួយភាគខាងជើងទីក្រុង Mazar-i-Sharif បាននិយាយថា៖ «អត់មានច្បាប់ គ្រប់គ្រងថា តើសរីរៈផ្ដល់ឱ្យនោះតាមរយៈការបរិច្ចាគ ឬទិញលក់នោះទេ តែការយល់ពីអ្នកផ្ដល់គឺជារឿងសំខាន់បំផុត»។
នៅគ្រួសារតែមួយ សមាជិកបុរស ៥ នាក់ បានលក់ក្រលៀនម្នាក់ម្ខាងក្នុងរយៈពេល ៤ ឆ្នាំចុងក្រោយ ដោយយល់ថា វាអាចសង្គ្រោះពួកគេចេញពីបន្ទាត់នៃភាពក្រីក្រ តែវិធីដោះទ័លនេះនៅតែពុំអាចធ្វើឱ្យជីវភាពប្រសើរឡើង ដោយមានតែភាពដុនដាប ផ្សំនឹងបញ្ហាសុខភាពស្ដារលែងឡើង។
ដោយបង្ហាញស្លាកស្នាមថ្នេរវះត្រង់ពោះម្ខាង លោក ហ្គូឡាម ណេប៊ី បាននិយាយថា៖ «យើងនៅជាប់បំណុល នៅតែក្រីក្រ ថែមទាំងពុំអាចធ្វើការងារលីសែងធ្ងន់ៗដូចមុនបានឡើយ»។
នៅក្នុងប្រទេសកំពុងអភិវឌ្ឍន៍ អ្នកផ្ដល់ និងអ្នកទទួល តែងតែបន្ដជីវិតរស់នៅដូចប្រក្រតី តែសុខភាពក្រោយការវះកាត់របស់ពួកគេរមែងត្រូវបានតាមដានផ្នែកវេជ្ជសាស្ត្រយ៉ាងយកចិត្ដទុកដាក់ ហើយវាក៏អាស្រ័យទៅលើរបៀបរបបរស់នៅ និងបែបបទការទទួលទានរបស់ពួកគេផងដែរ។
តែលក្ខខណ្ឌពិនិត្យតាមដានសុខភាពដោយវះកាត់លក់ក្រលៀននេះមិនមានឡើយសម្រាប់ពលរដ្ឋដ៏ក្រីក្រអាហ្វហ្គានីស្ថាន ដែលលក់សរីរៈរួចហើយ និងនៅតែជាប់ក្នុងបំណុលវ័ណ្តកឡើយ ហើយជួនកាល ពួកគេធ្លាក់ខ្លួនឈឺធ្ងន់ថែមទៀត។
អ្នកម្ដាយកូន ៣ នាក់ អ្នកស្រី អាហ្សីហ្សា ក៏កំពុងរង់ចាំឱកាសជួបបុគ្គលិកពេទ្យ ដែលកំពុងព្យាយាមរកអ្នកផ្ដល់ក្រលៀនឱ្យត្រូវគ្នាផងដែរ។
អ្នកស្រីបានប្រាប់ AFP យ៉ាងក្ដុកក្ដួលជាមួយទឹកភ្នែករលីងរលោងថា៖ «កូនៗរបស់ខ្ញុំដើរត្រាច់ចរសុំទានតាមដងផ្លូវ។ បើខ្ញុំមិនលក់ក្រលៀនទេ ខ្ញុំនឹងត្រូវបង្ខំចិត្ដលក់កូនស្រីអាយុ ១ ឆ្នាំហើយ»៕ AFP/HR
វីដេអូ៖