.jpg)
ពិព័រណ៍ «ពណ៌ស» ស្នាដៃសិល្បការិនី កែវសុជាតិ មានរូបភាពប្រើបច្ចេកទេសស-ខ្មៅ ចំនួន ១២ ផ្ទាំង។ រូបថត Steve Porte
ភ្នំពេញ: គំនូរត្រូវបានប្រើប៊ិកខ្មៅគូរលើក្រណាត់សរូបភាពស-ខ្មៅ ១២ ផ្ទាំង ជាបច្ចេកទេស ដែលមានសិល្បករមិនច្រើនទេជ្រើសរើសយកមកប្រើ ព្រោះវាហាក់មិនសូវរំលេចសោភណភាពស្នាដៃរបស់សិល្បករ។ យ៉ាងណាមិញ កឹម កែវសុជាតិ ម្ចាស់ស្នាដៃខ្មៅ-សនៃពិព័រណ៍ «ពណ៌ស» ដែលនឹងបញ្ចប់ការដាក់តាំងនៅផ្ទះមេត្តា (Meta House) ថ្ងៃទី ១ មីនា បានផ្លាស់ប្ដូរទស្សនៈនេះទាំងស្រុង តាមរយៈរូបភាពបង្កប់អត្ថន័យ និងសោភណភាពដ៏អស្ចារ្យ។
នេះជាស្នាដៃពិព័រណ៍លើកទី៣ បន្ទាប់ពីកញ្ញាបានបញ្ចប់ការសិក្សាពីសាកលវិទ្យាល័យភូមិន្ទវិចិត្រសិល្បៈ កាលពីឆ្នាំ ២០១៨។
កញ្ញា កែវសុជាតិ បានរំឭកពីស្នាដៃពិព័រណ៍លើកដំបូងបំផុតក្នុងឆ្នាំ ២០២០ ក្រោមប្រធានបទនិយាយពី «ភ្នែកនៃក្ដីមេត្តា» និងពិព័រណ៍លើកទី២ គឺ «ហេតុអ្វីបានខ្ញុំធ្វើ?»។
ចំពោះស្នាដៃលើកទី៣ សិល្បការិនីរូបនេះបានបកស្រាយអត្ថន័យយ៉ាងក្បោះក្បាយថា ស្នាដៃ «ស» កើតឡើងពីពន្លឺនៃបញ្ញា ដែលស្ថិតនៅទីងងឹត។ មានន័យថា ទីអាថ៌កំបាំងនៅទីងងឹតទាញមកឱ្យឃើញទីដែលមានពន្លឺ។ វានិយាយទាក់ទងនឹងការរកឃើញអតីតកាល សម្លឹងមើលបច្ចុប្បន្ន និងអភិវឌ្ឍអនាគត ហើយគ្រប់យ៉ាងសុទ្ធតែមានភាពវិជ្ជមាន និងអវិជ្ជមាន។
សិល្បការិនី កែវសុជាតិ ក្នុងការបើកពិព័រណ៍ទោលលើកទី៣។ រូបថត សហការី
កញ្ញាបានបន្ថែមថា៖ «បច្ចុប្បន្នកាលមានឫសគល់ពីអតីតកាល។ គ្រប់យ៉ាងស្ថិតក្នុងដៃរបស់ខ្លួន អ្នកជាមនុស្សតែម្នាក់ ដែលនឹងបង្កើតអនាគតសម្រាប់ខ្លួនឯង និងអាចកាច់ចង្កូតទៅរកពន្លឺនោះបាន។ នៅពេលដែលយើងមើលទៅពង្សាវតារ ដែលជាប្រទេស ១ មានអរិយធម៌ខ្ពង់ខ្ពស់ ធ្វើឱ្យបច្ចុប្បន្នភាពរបស់យើងគិតថា ពេលបន្ទាប់យើងអាចធ្វើអី្វសម្រាប់ក្មេងៗជំនាន់ក្រោយថ្ងៃអនាគត»។
ស្នាដៃសិល្បការិនី កែវសុជាតិ ក៏បានផ្ដោតលើចំណុចកង្វះសមភាពយេនឌ័រ ទាំងបច្ចុប្បន្នមានការស្រែកទាមទារភាពស្មើគ្នា។
កញ្ញាពន្យល់ថា៖ «បើយើងគិតពីឫសគល់ ខ្មែរយើងតែងតែឱ្យតម្លៃស្ត្រីជាធំបានន័យថា ក្នុងហ្នឹង មិនប្រកាន់ថាស្រី ឬប្រុស ត្រូវមានភាពស្មើគ្នា។ ហើយដោយសារតែបញ្ញាស្មារតី វែកញែកអ្វីដែលល្អ មិនថាយើងជាស្រី ឬក៏ប្រុសទេ យើងនៅតែចេះអប់រំចិត្ត បង្កើតនូវសន្តិភាពផ្លូវចិត្តខ្លួនឯង នោះអ្នកដទៃដែលនៅជុំវិញ ក៏ទទួលបានសន្តិភាពពីយើងដូច្នោះដែរ»។
រូបភាព ១ ក្នុងចំណោមរូបទាំង ១២ រូបត្រូវបានកញ្ញាបកស្រាយថា ជារូបស្ត្រី និងក្រពើ បង្កប់ការព្យាកររបស់កញ្ញាទៅពេលអនាគត។
រូបស្ត្រី និងក្រពើ ដូចជាស្ត្រី និងបុរស ហើយទឹក និងដី។ បើសភាវទាំងនេះតែងតែនៅជាមួយគ្នា។ ប៉ុន្តែបើមានបញ្ហារវាងភេទទាំង ២ ហ្នឹង ដោយមើលគ្នាក្នុងន័យមិនល្អ មិនចេះអប់រំចិត្ត មិនយល់អំពីអត្តសញ្ញាណ ធម្មជាតិ ដែលខ្លួនឯងមាន នោះនឹងមានសង្គ្រាមរវាងគ្នានឹងគ្នា។
សិល្បការិនី កែវសុជាតិ ធ្វើការបង្ហាញដល់ភ្ញៀវនៅវិចិត្រសាល។ រូបថត Steve Porte
ក្នុងរូបពេលស្ត្រីយកជើងជាន់ក្រពើហ្នឹង ថ្ងៃអនាគតក្រពើអាចនឹងងាកមកខាំវិញ។ បញ្ហាកើតឡើងពីខាងក្នុងអំណាចនៃចិត្តជាអកុសលរបស់ខ្លួនឯង ហើយវាបានជះកំហឹង បំផ្លាញទាំងខ្លួនឯង និងអ្នកទៃ។
ការប្រើប្រាស់ស្នាដៃសិល្បៈរំលេចពីប្រធានបទសមភាពយេនឌ័រ ក៏ព្រោះតែកញ្ញាមានពិសោធធ្លាប់រងនូវមតិ ១ វាយតម្លៃថា ស្រីៗមិនអាចចាប់អាជីពគំនូរនេះទេ ព្រោះមានតែប្រុសៗដែលអាចគូរនៅតាមវត្តអារាមបាន។
ប៉ុន្តែគំនិតដុះចេញមកពីបុគ្គលមួយចំនួនតូច មិនបានបង្អាក់ដំណើរវិវឌ្ឍន៍ខ្លួនជាសិល្បករ ១ រូបនោះទេ។
វិចិត្រការិនី មកពីខេត្តកំពត រូបនេះលើកឡើងថា៖ «ការងារនេះជាអ្វីដែលខ្ញុំស្រឡាញ់ និងចង់បន្ត។ ខ្ញុំនឹងដើរលើទស្សនវិស័យ សម្រាប់កាអភិវឌ្ឍខ្លួនឯង។ ខ្ញុំប្រាប់ខ្លួនឯងថា ថ្ងៃណាមួយខ្ញុំនឹងបង្ហាញអំពីតម្លៃ និងប្រើប្រាស់ទេពកោសល្យសិល្បៈ បង្ហាញដល់ពួកគាត់ ក៏ដូចជាយុវជនជំនាន់ក្រោយៗឱ្យសិក្សាស្វែងយល់អំពីអត្ថប្រយោជន៍ គុណតម្លៃ និងសារៈសំខាន់នៃសិល្បៈ ១ នេះ ក៏ដូចជាសិល្បៈផ្សេងៗទៀតនៅក្នុងសង្គមទាំងមូល»។
យ៉ាងណាមិញ ដំណើរលើវិថីក្លាយជាសិល្បការិនីនេះ ពុំត្រូវបានគ្រួសាររបស់កញ្ញាប្រឆាំង ឬជំទាស់ឡើយ។
សិល្បការិនី កែវសុជាតិ បានរំឭកប្រាប់ ភ្នំពេញ ប៉ុស្តិ៍ថា៖ «ខ្ញុំស្រឡាញ់ការគូរតាំងពីនៅថ្នាក់បឋម។ ដូច្នេះ ពេលរៀន ៤ ឆ្នាំចប់នៅភូមិន្ទវិចិត្រសិល្បៈ ខ្ញុំក៏ចាប់ផ្ដើមបង្កើតស្នាដៃ ដោយពិព័រណ៍ខ្ញុំទាំង ៣ លើកសុទ្ធតែជាពិព័រណ៍ទោល។ ខ្ញុំប្រើគូល័រប្រេង និងទឹកក្នុងស្នាដៃសិល្បៈរបស់ខ្ញុំកន្លងមក និងបាននិយាយទាក់ទងនឹងវប្បធម៌ ប្រពៃណី សាសនា គ្រួសារ និងសមភាពនៃយេនឌ័រវប្បធម៌»។
គំនូរលើផ្ទៃសដែលប្រើប៊ិកខ្មៅគូរ នៃពិព័រណ៍ «ពណ៌ស»។ រូបថត Steve Porte
កញ្ញាឱ្យដឹងដែរថា ផលលំបាកជាអ្នកសិល្បៈ គឺការរំពឹងលក់ស្នាដៃ ១ ផ្ទាំងៗ ដើម្បីរ៉ាប់រងចំណាយ បន្តការផលិតស្នាដៃថ្មីថែមទៀត។ ប៉ុន្តែកញ្ញាមិនធ្លាប់មានចិត្តបោះបង់អាជីពដែលជាពំនាក់អ្នកជុំវិញខ្លួននោះទេ។
ជាមួយក្ដីសុបិនប្រើការងារសិល្បៈរបស់ខ្លួនជាប្រយោជន៍ដល់សង្គម សិល្បការិនី កែវសុជាតិ និយាយថា៖ «ខ្ញុំផ្ដោតទៅលើបច្ចុប្បន្នភាពរបស់ខ្លួនឯងកំពុងធ្វើ និងផ្ដោតលើវប្បធម៌ ដែលខ្លួនឯងបង្កើតឡើងចំពោះខ្លួនឯង។ ហើយពេលយើងបង្កើតវប្បធម៌ឱ្យខ្លួនឯង ថ្ងៃអនាគតវប្បធម៌នោះនឹងរីកសាយភាយ ពេលនោះអ្នកដទៃ នឹងស្វែងយល់ដោយខ្លួនឯង»។
ព័ត៌មានបន្ថែមសូមចូលទៅទំព័រហ្វេសប៊ុក Keo Socheat Art៕
