បទថ្មី «ស្រារាំ» របស់តារាចម្រៀងថោនរ៉ាប៊ី ផ្ទុះការគាំទ្រខ្លាំង។ រូបថត ហ្វេសប៊ុក និង ហុង មិនា
ភ្នំពេញៈ ខណៈតារាចម្រៀងប្រុសស្រីនៃផលិតកម្មផ្សេងៗ សស្រោកសស្រាំនាំគ្នាផលិតបទចម្រៀងថ្មី សម្រាប់ត្រៀមចេញមុនថ្ងៃបុណ្យចូលឆ្នាំថ្មីប្រពៃណីខ្មែរ ជិតចូលមកដល់នោះ តារាចម្រៀងស្រីរាងឃ្យូត សាច់សខ្ចី នៅផលិតកម្មថោនកញ្ញា រ៉ាប៊ី ក៏មានបទថ្មីបំពេអារម្មណ៍ប្រិយមិត្តខ្លួនដែរ។
បទថ្មីដែលចេញត្រៀមដើម្បីអបអរសាទរពិធីបុណ្យប្រពៃណីជាតិខ្មែរ ដែលមានចំណងជើងថា «ស្រារាំ» របស់កញ្ញា រ៉ាប៊ី នៅផលិតកម្មថោន គ្រាន់តែចេញតាមបណ្តាញសង្គមយូធូបបានប៉ុន្មានថ្ងៃសោះ ដោយមានអ្នកទស្សនាជាង ១ លានដង ត្រឹមរយៈពេល ១ ថ្ងៃ (ថ្ងៃទី ២៨ កុម្ភៈ) ហើយបើគិតត្រឹមប៉ុន្មានថ្ងៃនៅខែមីនានេះ មានអ្នកចូលទស្សនាប្រមាណជាង ១,៧ លានដងឯណោះ។
តាមរយៈបទ «ស្រារាំ» នេះគឺផលិតឡើងក្នុងន័យពិសេស ញាំងពេលវេលាដ៏ល្អនៃការជួបជុំសមាជិកក្រុមគ្រួសារ ជុំញាត្តិមិត្ត និងដើម្បីរាំលេងកម្សាន្ត ឱ្យកាន់តែសប្បាយរីករាយ ថែមមួយកម្រិតទៀត ក្នុងឱកាសបុណ្យចូលឆ្នាំថ្មីប្រពៃណីខ្មែរ ដែលឈានចូលមកដល់ ក្នុងពេលឆាប់ៗ នៅខែមេសា ឆ្នាំ ២០២២ ខាងមុខនេះ។
ជារឿយៗ និងតាមការកត់សម្គាល់ តារាចម្រៀងស្រីដែលអភិវឌ្ឍខ្លួនពីអាជីពជាអ្នករាំ កញ្ញា ផាន វីរ៉ាទី ហៅកញ្ញា រ៉ាប៊ី រមែងទទួលបានការពេញនិយមពីយុវវ័យខ្លាំង ខណៈដែលនាង ក៏មិនសូវសម្រុកផលិតបទចម្រៀងឱ្យបានច្រើនពេកនោះទេ ក្រោមហេតុផលថា ខ្លាចសាបប្រជាប្រិយភាពពេលចេញបទច្រើនពេក។
កញ្ញា រ៉ាប៊ី ត្រូវបានទស្សនិកជនចាត់ទុកថា ជាតារាចម្រៀងវ័យក្មេងដ៏លេចធ្លោ ១ រូបក្នុងពេលបច្ចុប្បន្ន ជាពិសេសក្នុងប្រភេទបទចម្រៀងបែបញាក់កន្ដ្រាក់អារម្មណ៍ប្រចាំផលិតកម្មថោន ខណៈនៅហង្សមាសវិញមានកញ្ញា សេន យូរី ក្រោយពីបាត់វត្តមានកញ្ញា ទេព បូព្រឹក្ស នោះ។ បទជាច្រើនរបស់តារាចម្រៀងស្រីរូបនេះ តែងស្រូបបានការគាំទ្រខ្លាំង និងសាងភាពល្បីសុសសាយ រហូតដូចជា បទ «មាន់ស្រែ» ឃើញនៅតែមានប្រជាប្រិយក្នុងការស្តាប់ និងការចាក់កម្សាន្តជួបជុំ ឬរាំលេងកម្សាន្ត ដោយមានអ្នកចូលមើលរហូតជាង ៦២ លានដង ក្នុងយូធូប។
ចំពោះព័ត៌មានពាក់ព័ន្ធនឹងរឿងជីវិតឯកជន ឬរឿងជីវិតគូវិញ បើតាមប្រភពអ្នកប្រមាញ់លួចព្រលយឱ្យដឹងថា នាពេលនាងទៅសម្ដែងនៅសហរដ្ឋអាមេរិកនោះ មានគេទាក់ទងផងដែរ ប៉ុន្តែនាងមិនបង្ហាញភ្លើងខៀវឱ្យគេ ទើបស្ងាត់ទៅវិញ ហើយឥឡូវនេះ បែរជាមករអ៊ូរកសង្សារម្នាក់។
ស្រីស្អាត រ៉ាប៊ី តារាចម្រៀងស្រីផលិតកម្មថោនរូបនេះ ក៏ធ្លាប់បញ្ជាក់ដែរថា៖ «ជារឿងធម្មតាទេ ជីវិតមនុស្សមិនទាន់មានគូ គឺតែងតែមានគេមកតាមដូច្នេះហើយ។ តែសម្រាប់នាងខ្ញុំ នាពេលនេះដូចជា មិនទាន់ចង់គិតគូរខ្លាំងរឿងគូគ្រងអ្វីនោះ គឺនាងខ្ញុំចង់ប្រើពេលរកប្រាក់ពីការងារសិល្បៈនេះមួយរយៈសិន ព្រោះថាក្រោយពីបានវិលមកពីអាមេរិកមកនោះ ខ្ញុំក៏ទទួលការងារសិល្បៈច្រើនណាស់ សឹងគ្មានពេលទំនេរទេ ពី ១ អាទិត្យ ទៅ ១ អាទិត្យ»៕
