ភ្នំពេញ: ជាមួយបច្ចេកទេសប្លែកនៃពណ៌ប្រេង និងថ្នាំលាប U-90 ស្នាដៃគំនូរ ២១ ផ្ទាំង ពីសិល្បករ ប៉ែន រ៉ូប៊ីត ដែលធ្វើតាមកំណែទម្រង់ និងកម្ទេចទម្រង់ រូបនិមិត្តវិទ្យានៃ «ក្រមា» និង «ដែកសំណាញ់នៃសំណង់» ត្រូវបានសម្ពោធនៅថ្ងៃទី ៣ ខែមីនា ឯសណ្ឋាគារ រ៉ូសវូដ ភ្នំពេញ ក្រោមប្រធានបទពិព័រណ៍ «សរីរសណ្ឋាននៃទម្រង់ និងពណ៌»។
ការដាក់តាំងដែលនឹងបន្តរហូតដល់ថ្ងៃទី ៣០ ខែ មេសា ឆ្នាំ ២០២២ ក៏មានការបង្ហាញនូវសម្ភាររបស់សិល្បករផ្ទាល់ រួមមានគំនូរព្រាង គូល័រ និងសៀវភៅនៅក្នុងទូ ២ ផងដែរ។
«សរីរសណ្ឋាននៃទម្រង់ និងពណ៌» ជាស្នាដៃថ្មីចុងក្រោយពីសិល្បករ រ៉ូប៊ីត បន្ទាប់ពីពិព័រណ៍ «សេរីភាពនៃថ្ងៃស្អែក» បានរំលេចរូបកាលពីខែមករានៅវិចិត្រសាល សិល្បៈត្រជាក់ភ្នែក។
មិនយូរប៉ុន្មាននៅដើមខែកុម្ភៈ លោកក៏បាននាំមកនូវស្នាដៃថ្មី ១ ទៀត ដែលផុសចេញពីការស្រមើស្រមៃ ដោយប្រើប្រាស់ពណ៌ក្រហម និងខ្មៅជាផ្ទៃបាតនៃគំនូរតំណាងឱ្យទេសកាល ឬភាពនៃការកសាងឡើងវិញក្រោយសង្គ្រាម។ លោក រ៉ូប៊ីត បានផ្ដល់ឈ្មោះថា «សរីរសណ្ឋាននៃទម្រង់ និងពណ៌» ដែលបានដាក់តាំងពីថ្ងៃទី ១ ខែកុម្ភៈ និងសម្ពោធជាផ្លូវការនៅថ្ងៃទី ៣ ខែមីនាកន្លងទៅ។
សិល្បករសហសម័យ លោក រ៉ូប៊ីត បានឱ្យដឹងថា នេះជាការងារថ្មីដែលផ្ដោតទៅលើទម្រង់ សំណង់អគារ ស្ពាន និងទីក្រុង។ ជាមួយការស្វែងរកពណ៌ថ្មី លោកចាប់អារម្មណ៍ទៅលើក្រមា ដោយសារសាវតារធ្លាប់រៀនជាមួយសហស្ថាបនិកអង្គការហ្វារពន្លឺសិល្បៈ លោកគ្រូ ស្រី បណ្ដូល អំពីប្រវត្តិសាស្ត្រខ្មែរក្រហម។
វិចិត្រករ ៣១ ឆ្នាំរូបនេះថា៖ «ខ្ញុំរៀនគំនូរទូទៅពេលនៅសាលា តែពេលចប់ថ្នាក់ យើងស្វែងរកគំនិតក្នុងការបង្កើតស្នាដៃខ្លួនឯង។ អ៊ីចឹងខ្ញុំរកឃើញថា ក្រមាហ្នឹងគួរឱ្យចាប់អារម្មណ៍នឹងប្រវត្តិសាស្ត្រខ្មែរក្រហម ទាក់ទង ប្រជាជន និងវណ្ណៈសង្គម។ អ៊ីចឹងខ្ញុំនិយាយពីប្រវត្តិសាស្ត្រប្រទេសកម្ពុជា ហើយនិយាយពីការកសាងទីក្រុងឡើងវិញក្រោយសង្គ្រាម ខ្ញុំយកក្រមាជាគំនិតដើម ជាប្រពៃណីវប្បធម៌»។
ក្នុងពិធីសម្ពោធពិព័រណ៍ លោក យាន រស្មី ជាស្ថាបនិកវិចិត្រសាល សិល្បៈត្រជាក់ភ្នែកបានឱ្យដឹងថា លោក រ៉ូប៊ីត គឺជាសិល្បករដំបូងគេដែលទទួលបានទីកន្លែងសម្រាប់ស្រាវជ្រាវបង្កើតស្នាដៃថ្មីនៅ STP Cambodia តាមរយៈកម្មវិធី «សម្នាក់សិល្បៈ» ក្រោមការគាំទ្រពីស្ថានទូតសហរដ្ឋអាមេរិកនៅកម្ពុជា។
លោក រស្មី បានលើកឡើងថា៖ «អរគុណ រ៉ូសវូដ ដែលបានតាំងស្នាដៃពិព័រណ៍ ដើម្បីជំរុញបន្ថែមនៅកម្មវិធី សម្នាក់សិល្បៈរបស់យើង ដែលទាក់ទងជាមួយសេដ្ឋកិច្ច ពាណិជ្ជកម្មក្នុងការឱ្យសិល្បករលក់ស្នាដៃ ហើយក៏អរគុណ រ៉ូប៊ីត ដែលបានទទួលការអញ្ជើញរបស់យើងមកសម្រាប់ សម្នាក់សិល្បៈ និងអបអរសាទរដល់គាត់ផងដែរ»។
ស្ថាបនិកវិចិត្រសាលសិល្បៈត្រជាក់ភ្នែកដែលរូបលោកក៏ជាសិល្បករម្នាក់ដែរនោះ បានរៀបរាប់ទៀតថា៖ «ក្នុងការងារពិព័រណ៍នេះ រ៉ូប៊ីត គាត់សិក្សាច្រើនទាក់ទងនឹងក្រមា។ ប្រវត្តិនៃក្រមា គាត់ទទួលបានតាមរយៈការសិក្សា និងធ្វើសិក្ខាសាលាជាមួយលោកគ្រូ ស្រី បណ្ដូល ដែលទើបចែកឋានថ្មីៗ និងជាមួយសិក្ខាសាលាអំពី «ការចងចាំ» នៅសារមន្ទីរឧក្រិដ្ឋកម្មប្រល័យពូជសាសន៍ទួលស្លែង»។
នៅទីនោះ សិល្បករ រ៉ូប៊ីត បានឃើញក្រមា ក្រណាត់ និងគំនរឆ្អឹង ដែលបទពិសោធទាំងនោះធ្វើឱ្យលោកចាប់ផ្ដើមស្រាវជ្រាវពីប្រវត្តិ សាវតារ និងរបៀបប្រើប្រាស់របស់ក្រមាក្នុងសង្គមខ្មែរ។
លោក រស្មី បានបន្តទៀតថា៖ «គាត់បានយកក្រមាក្លាយទៅជាហេតុ ១ ដើម្បីសិក្សាអំពីជាតិសាសន៍ និងវណ្ណៈសង្គមផងដែរ»។
សព្វថ្ងៃនេះ «ដែកសំណាញ់នៃសំណង់» គឺជាឧបករណ៍ ដែលចាក់ស្រែះក្នុងទេសភាពនៃទីក្រុងនានានៅទូទាំងប្រទេសកម្ពុជា និងនៅបណ្ដាប្រទេសដទៃទៀតជុំវិញពិភពលោក។
ការដាក់ទន្ទឹមគ្នារវាងអ្វីដែលជាក្នុងស្រុក និងក្រៅស្រុក ឆ្លុះបញ្ចាំងឱ្យឃើញនូវទ្វេភាព ដែលប្រទាញប្រទង់គ្នាក្នុងការអនុវត្តសិល្បៈរបស់លោក រ៉ូប៊ីត ដូចជាភាពវិជ្ជមាន អវិជ្ជមាន ជីវិត និងការស្លាប់ ល្អ និងអាក្រក់ អំណាច និងទន់ខ្សោយ។
ម្ចាស់ស្នាដៃលោក រ៉ូប៊ីត បរិយាយថា៖ «នៅពេលដែលពិភពលោកកំពុងតែជាប់គាំងនៅក្នុងយុគសម័យថ្មីដ៏ងងឹត ពណ៌តែងតែអាចជួយបំភ្លឺពេលវេលា និងជីវិតរបស់យើងបាន។ វាផ្ដល់ឱ្យពិភពលោកនូវភាពស្រស់ស្អាត និងក្ដីសង្ឃឹមមួយចំនួន»។
ការធ្វើពិព័រណ៍ស្នាដៃកៀកៗគ្នានេះត្រូវបានលោក រ៉ូប៊ីត ពន្យល់ថា ស្នាដៃ «សេរីភាពនៃថ្ងៃស្អែក» ជាក់ស្ដែងត្រូវបានបញ្ចប់តាំងពី ១ ឆ្នាំមុន ហើយទើបមានឱកាសដាក់តាំង រួចលោកក៏មានឱកាសរំលេចពិព័រណ៍ «សរីរសណ្ឋាននៃទម្រង់ និងពណ៌» នេះឡើង។
ព័ត៌មានបន្ថែមនៃស្នាដៃសិល្បករប៉ែន រ៉ូប៊ីត មាននៅទំព័រហ្វេសប៊ុក @STPCambodia៕