.jpg)
អ្នកដំណើរឈរសម្លឹងមើលប៉មទួអេហ្វែលក្រោយបន្ថែមអង់តែនថ្មី។ AFP
ក្រុងប៉ារីស: ប៉មទួអេហ្វែលបានលូតកម្ពស់ ៦ ម៉ែត្រ កាលពីថ្ងៃអង្គារ នៅពេលដែលវិស្វករបានបំពាក់អង់តែនថ្មីនៅលើកំពូលសំណង់ដ៏ល្បីល្បាញដោយមានជំនួយពីឧទ្ធម្ភាគចក្រ។
សំណង់ខ្ពស់ជាងគេ និងជានិមិត្តរូបនៃទីក្រុងប៉ារីស មានកម្ពស់ ៣៣០ ម៉ែត្រ បន្ទាប់ពីការបន្ថែមអង់តែនថ្មី។
អ្នកទេសចរមួយចំនួនតូចបានមើលនៅពេល ដែលអង់តែនត្រូវបានទម្លាក់ចូលទីតាំងកាលពីព្រឹកថ្ងៃអង្គារ ដោយវិស្វករទាំង ២ បានបំពេញភារកិច្ចក្នុងការធានាវាទៅនឹងរចនាសម្ព័ន្ធដែលមើលមិនឃើញពីដី។
លោក ហ្សង់ហ្វ្រង់ស្វ័រ ម៉ាទីនស៍ ប្រធានក្រុមហ៊ុនប្រតិបត្តិការសំណង់នេះបានប្រាប់អ្នកយកព័ត៌មានថា៖ «វាជាមោទនភាពដ៏អស្ចារ្យ ជាប្រវត្តិសាស្ត្រដ៏កម្រក្នុងប្រវត្តិសាស្ត្រនៃប៉មទួអេហ្វែល»។
លោកបាននិយាយថា៖ «សំណង់នេះកំពុងត្រឡប់ទៅរកឫសគល់របស់នាងវិញ ក្នុងនាមជាកន្លែងពិសោធន៍បច្ចេកវិទ្យា និងវិទ្យាសាស្ត្រ»។
ប៉មទួអេហ្វែលត្រូវបានសាងសង់ឡើងក្នុងឆ្នាំ ១៨៨៩ ក្រោមការរចនាដោយស្ថាបត្យករ Gustave Eiffel ប៉ុន្តែវាត្រូវបានគ្រោងនឹងរុះរើក្នុងរយៈពេល ២០ ឆ្នាំក្រោយ។
ដើម្បីរក្សាទុកសំណង់នេះ ស្ថាបនិកវាបានខិតខំប្រឹងប្រែង ដើម្បីផ្តល់ឱ្យវានូវវិជ្ជាជីវៈវិទ្យាសាស្ត្រ ដំឡើងឧបករណ៍ត្រួតពិនិត្យអាកាសធាតុ និងលើកទឹកចិត្តឱ្យប្រើប្រាស់ទួអេហ្វែលសម្រាប់ការសង្កេតតារាសាស្ត្រ។
សំណង់នេះបានដើរតួនាទីជាប៉មបញ្ចេញរលកវិទ្យុដ៏សំខាន់ ដែលដំបូងឡើយសម្រាប់យោធា។
នៅក្នុងទសវត្សរ៍ឆ្នាំ ១៩១០ ប៉មទួអេហ្វែលត្រូវបានគេប្រើ ដើម្បីផ្ញើទូរលេខទៅកាន់សហរដ្ឋអាមេរិក។
អង់តែនពីមុនរបស់វាត្រូវបានជួសជុលក្នុងឆ្នាំ ២០០០ ហើយត្រូវបានប្រើប្រាស់សម្រាប់ទូរទស្សន៍ឌីជីថល៕ AFP/HR
