.jpg)
មនុស្សម្នាអាក្រាតកាយជិះកង់នៅក្រុងខេបថោន កាលពីចុងសប្ដាហ៍។ រូបថត AFP
ក្រុងខេបថោន: មនុស្សម្នាជាច្រើនបានក្លាហានជម្រុះសម្លៀកបំពាក់ ដោយខ្លះមានតែខ្លួនទទេស្អាតលើកែបកង់ ខណៈជើងធាក់ឈ្នាន់ធ្វើដំណើរជាក្រុមក្នុងទិវាស្រាតជិះកង់ពិភពលោក (WNBR) ឆ្នាំទី១៤។
ដោយចាប់ផ្ដើមពីចុងសប្ដាហ៍នៅក្រុងខេបថោន ទឹកដីអាហ្វ្រិកខាងត្បូង អ្នកជិះកង់ទាំងប្រុសទាំងស្រី បានចូលរួមព្រឹត្តិការណ៍ប្រចាំឆ្នាំនេះ ដើម្បីលើកកម្ពស់ការយល់ដឹងពីសុវត្ថិភាពនៃការជិះកង់ ទាក់ទាញចំណាប់អារម្មណ៍មនុស្សឱ្យប្រើមធ្យោបាយធ្វើដំណើរដោយគ្មានឥន្ទនៈ គ្មានផ្សែង ក៏ដូចជាបំផុសជំនឿចិត្តលើរាងកាយ។
ឆ្នាំនេះអ្នកចូលរួមដែលមានលាបខ្លួនពណ៌លឿង និងខៀវ ដូចទង់ជាតិអ៊ុយក្រែន ក៏ឆ្លៀតឱកាសផ្សាយសារពីបញ្ហាជម្លោះអ៊ុយក្រែន និងរុស្ស៊ី ដែលនាំឱ្យជះឥទ្ធិពលដល់តម្លៃប្រេង និងការប្រែប្រួលអាកាសធាតុ។
គោលបំណង ១ ទៀតនៃព្រឹត្តិការណ៍ស្រាតជិះកង់ឆ្នាំនេះ ក៏ត្រូវបានអ្នករៀបចំកម្មវិធីលើកឡើងថា ដើម្បីរំលេចនូវវប្បធម៌ប្រើប្រាស់ទំនិញច្រើនលើសលប់ឥតគិតគូរដល់បរិស្ថាន។
ក្នុងចំណោមអ្នកចូលរួមនោះ តារាយូធូប Juanita Pretorius បាននិយាយថា នាងចូលរួមទិវាស្រាតជិះកង់ពិភពលោក ដោយសារតែនាងរីករាយនឹងអារម្មណ៍សេរីភាព ភាពពេញលេញ និងការព្រលែងខ្លួនឱ្យប៉ះខ្យល់ ឥតខ្វាយខ្វល់។
នាងនិយាយថា៖ «នេះជាថ្ងៃដែលយើងអបអរការរស់រានមានជីវិត។ វាល្អបំផុតហើយដែលយើងដឹងថា យើងកើតមកមានតែខ្លួនប៉ុណ្ណេះ»។
អ្នកតស៊ូដើម្បីសេរីភាពបញ្ចេញមតិ រូបនេះបានលើកឡើងថា៖ «ជួនកាលទាល់តែយើងប្រើប្រាស់វិធីផ្សព្វផ្សាយប្លែកៗ ទើបយើងអាចលាតរឿងពិតឱ្យពិភពលោកបានដឹង»៕ AFP/HR
