ក្រុងការ៉ាឈី: លោក ហេដឌើរ អាលី (Haider Ali) បានជ្រលក់ជក់ក្នុងកំប៉ុងទឹកថ្នាំពណ៌ស្រស់ៗ មុននឹងគូរវាសលើស្បែកជើងកីឡាពណ៌សភ្លឺចែងចាំង ជំនួសឱ្យផ្ទាំងក្រណាត់ និងតួរថយន្តច្រែះ ដែលលោកធ្លាប់តែបញ្ចេញស្នាដៃរចនាតាមវប្បធម៌សិល្បៈរបស់ប៉ាគីស្ថាន។
រថយន្តដឹកទំនិញនៅទឹកដីប៉ាគីស្ថានមានភាពល្បីល្បាញសម្រាប់ «សិល្បៈយានដឹកទំនិញ» ជាមួយផ្ទាំងគំនូរពណ៌ឆើតឆាយ ខ្លះរំលេចរូបភាពសត្វនៅអាស៊ីខាងត្បូងតារាល្បីៗ និងរូបតំណាងសាសនា។
ប្រពៃណីយកគំនូរសិល្បៈស្រោបរថយន្តដឹកទំនិញបានលម្អផ្លូវថ្នល់នានានៅទីក្រុងប៉ាគីស្ថាន ហាក់បីដូចជាពិភពគំនូរជីវចល។
ក្រៅពីគំនូរលើរថយន្ត លោក អាលី ដែលជាវិចិត្រកររថយន្តដឹកទំនិញជើងចាស់ ១ រូប នាំយកវប្បធម៌រចនាឡានមកគូរលើស្បែកជើងប៉ាតា។
គាត់បានរំឭកប្រាប់ថា៖ «អតិថិជនម្នាក់មកពីសហរដ្ឋអាមេរិកបានមករកខ្ញុំឱ្យគូរលម្អស្បែកជើងរបស់គាត់»។
លោកបានបន្តថា៖ «ខ្ញុំក៏បានប្រាប់គាត់នូវតម្លៃ ១ ដ៏ថ្លៃហួសហេតុ ដើម្បីបំបាក់ទឹកចិត្តគាត់ តែគាត់នៅតែយល់ព្រមហ៊ានចំណាយឱ្យខ្ញុំគូរលើស្បែកជើងរបស់គាត់»។
លោក អាលី ចំណាយពេល ៤ ថ្ងៃលើស្បែកជើង ១ គូៗ យកថ្លៃប្រមាណ ៤០០ ដុល្លារ រាល់ការកុម្ម៉ង់ម្ដងៗ។
ចាប់តាំងពីលោកផ្តើមកាន់ជក់គូររូបលើស្បែកជើងកាលពីខែមករាមក លោកសម្រេចបានចំនួន ៨ គូ ហើយពីអតិថិជនភាគច្រើននៅបរទេស និងមានអ្នកខ្លះនៅប៉ាគីស្ថាន។
លោកទទួលបានស្បែកជើងថ្មីជារៀងរាល់ ៤ ថ្ងៃម្ដងសម្រាប់កិច្ចការគូរគំនូរនេះ បន្ទាប់ពីមនុស្សម្នាជាច្រើនចាប់អារម្មណ៍នឹងស្នាដៃលោកលើប្រព័ន្ធផ្សព្វផ្សាយសង្គម។
កាន់ជក់បណ្ដើរ បុរសវ័យ ៤២ ឆ្នាំបាននិយាយបណ្ដើរថា៖ «គំនិតរចនាគូរស្បែកជើងនេះចេះតែមានហូរហែ ពេលដែលខ្ញុំចាប់កាន់ជក់»។
ដើរនៅក្នុងស្ទូឌីយោលើដំបូលក្រុងការ៉ាឈី លោក អាលី កាន់ស្បែកជើង Nikes ពណ៌សដ៏ថ្លៃ ១ គូ រួចរំលេចរូបភាពសត្វស្ទាំង ភ្នែកពណ៌លឿង និងស៊ុមក្បាច់ព័ទ្ធជុំវិញ។
រីឯស្បែកជើង ១ គូទៀត ដែលត្រៀមដឹកជញ្ជូនទៅអតិថិជននៅក្រៅប្រទេស មានរូបសត្វក្ងោក និងក្បាច់ផ្កាភ្ញី។
សិល្បៈប្រើពណ៌ឆើតៗតុបតែងលើរបស់ប្រើប្រាស់ រួមទាំងរថយន្តដឹកទំនិញនេះត្រូវបានអនុវត្តក្នុងទសវត្សរ៍ឆ្នាំ ១៩៤០ នៅពេលដែលអ្នកដឹកជញ្ជូនព្យាយាមធ្វើឱ្យយានជំនិះពួកគេរស់រវើក ភ្ជាប់អត្តសញ្ញាណយីហោតម្រូវអ្នកដំណើរមិនចេះអក្សរ។
អ្នកខ្លះទៀតថា សិល្បៈគំនូរតុបតែងឡានបានចាប់ផ្ដើមដោយអ្នកបើកបររថយន្តក្រុងប្រជែងគ្នា ដើម្បីទាក់ទាញភ្ញៀវជាអ្នកដំណើរ។
សម្រាប់លោក អាលី ក្រៅពីជាជាងគំនូរថយន្តដឹកធំ លោកក៏ធ្លាប់គូរលើយន្តហោះ ម៉ូតូ រថយន្តអណ្ដើក និងសូម្បីតែដងខ្លួននារីនៅពិធីបុណ្យ Burning Man ឯសហរដ្ឋអាមេរិក។
ប៉ុន្តែដូចការគូរលើរថយន្តដឹកទំនិញដែរ គំនូរលើស្បែកជើងនឹងរលុបនៅ ៣ ទៅ ៤ ឆ្នាំ ទុកឱកាសឱ្យជាងគំនូរមានកិច្ចការជាថ្មី៕ AFP/HR