ក្រុងមីឡាន: តារាម៉ូដែលអ៊ុយក្រែន Bogdana Didenko Nevodnik ស្ថិតនៅទីក្រុងមីឡានក្នុងសប្តាហ៍ម៉ូដនៅពេលដែលរុស្ស៊ីវាយចូលអ៊ុយក្រែន ដែលធ្វើឱ្យនាងមិនអាចត្រឡប់មកផ្ទះវិញបានទេ។ ជំនួសឱ្យចិត្តប្ដេជ្ញាកាន់អាវុធធ្វើទាហានស្រីស្ម័គ្រចិត្ត ពេលនេះនាងបានដុតដៃដុតជើងរៀបកញ្ចប់ជំនួយក្នុងក្រុងអ៊ីតាលីសម្រាប់បញ្ជូនទៅមាតុភូមិកំណើតរបស់នាង។
ម៉ូដែលវ័យ ២២ ឆ្នាំរូបនេះបានប្រាប់ AFP ថា៖ «ខ្ញុំមានអារម្មណ៍ថា វាមិនសមសោះដែលយើងកំពុងដើរលើឆាកបង្ហាញម៉ូដ ហើយអ្នកនៅទឹកដីកំណើតកំពុងតែរងទុក្ខ។ ខ្ញុំខ្មាសខ្លួនឯង និងមានអារម្មណ៍ថា ទស្សនិកជនហាក់មិនខ្វាយខ្វល់»។
រាល់ពេលដែលសំឡេងស៊ីរ៉ែនវាយលុកតាមអាកាសនៅពេលយប់នៅក្នុងទីក្រុងកំពង់ផែ Kamianske ជាកន្លែងដែលផ្ទះនាងតាំងនៅ នាង Didenko Nevodnik ត្រូវបានដាស់ដោយកម្មវិធីស្មាតហ្វូន បើទោះជានាងរស់នៅឆ្ងាយពីសង្គ្រាមក្ដី។
ដំបូងឡើយ នាងគិតថា នាងត្រូវតែត្រឡប់ទៅផ្ទះវិញដោយរថភ្លើង ឬរថយន្តក្រុងជើងដំបូង។ ប៉ុន្តែស្វាមីរបស់នាងដែលជាគ្រូពេទ្យវះកាត់វ័យក្មេងនៅអ៊ុយក្រែន និងក្រុមគ្រួសាររបស់នាង ដាច់ខាតពុំព្រមឱ្យនាងទៅស្រុកកំណើតវិញទេ។
ឥឡូវនេះ តារាម៉ូដែលស្លៀកឈុតខ្មៅបានចងក្របួចសក់ដើម្បីធ្វើកិច្ចការជាច្រើនម៉ោងជាមួយអ្នកស្ម័គ្រចិត្តផ្សេងទៀតចំនួន ២០ នាក់ ដោយរៀបចំកញ្ចប់ជំនួយដែលត្រូវបានទុកចោលក្នុងទីធ្លាតូចមួយនៃស្ថានកុងស៊ុលអ៊ុយក្រែននៅទីក្រុងមីឡាន។
រថយន្តផ្ទុកកញ្ចប់អាហារ ថ្នាំពេទ្យ ថ្ម និងប្រដាប់ក្មេងលេង ត្រូវបានកំណត់គោលដៅទៅតំបន់សង្គ្រាម។
នាង Didenko Nevodnik ដែលស្លៀកពាក់ខ្មៅ និងជាម៉ូដែលសម្រាប់ម៉ាកល្បីៗជុំវិញពិភពលោកនិយាយថា៖ «ខ្ញុំហ៊ានប្រថុយជីវិតនៅអ៊ុយក្រែន ហើយបើអាចខ្ញុំនឹងចូលបម្រើទ័ព»។
ម៉ូដែលដែលធ្លាប់ចូលរៀនប្រដាល់កាល និងមានជំនាញបាញ់កាំភ្លើងត្រង់ នៅវ័យជំទង់បាននិយាយថា៖ «ខ្ញុំតែងតែមានស្មារតីប្រយុទ្ធ»។
រីឯតារាម៉ូដែលជនជាតិអ៊ុយក្រែនម្នាក់ទៀតឈ្មោះ Valya Fedotova ដែលបានចូលរួមធ្វើការស្ម័គ្រចិត្ដផងដែរនោះ បាននិយាយថា នាងស្ទើរតែស្រក់ទឹកភ្នែកអំឡុងពេលកម្មវិធីបង្ហាញម៉ូដក្រុងមីឡាន ដែលជាការឱកាសដើរលើវេទិកាធំបំផុតលើកដំបូងរបស់នាង។
មមាញឹករៀបអំណោយមនុស្សធម៌ទៅមាតុភូមិ ម៉ូដែលអ៊ុយក្រែនរូបនេះបាននិយាយទាំងអួលដើមកថា៖ «ប៉ុន្តែខ្ញុំមិនអាចយំលើឆាកបានទេ។ ខ្ញុំទទួលបានប្រាក់ពីការងារម៉ូដែល ហើយខ្ញុំអាចផ្ញើវាទៅគ្រួសារខ្ញុំនៅអ៊ុយក្រែន»៕ AFP/HR