ភ្នំពេញ: សៀវភៅ ២៣៩ ទំព័របណ្ដុំគំនូរ ១០០ រូប និងប្រវត្តិម្ចាស់ស្នាដៃលោក វ៉ាន់ ណាត ដែលជាវិចិត្រករល្បីឈ្មោះ ១ រូប និងជាអ្នករួចជីវិតក្នុងចំណោមជនរងគ្រោះដទៃទៀតនៅមន្ទីរស-២១ ត្រូវបានដាក់សម្ពោធជាសាធារណៈ កាលពីថ្ងៃទី ១៤ ខែមីនា នៅវិចិត្រសាលសិល្បៈត្រជាក់ភ្នែក។
លើសពីសៀវភៅ ឬឯកសារនិយាយពីរបបប្រល័យពូជសាសន៍ រូបគំនូរពីវិចិត្រករជើងចាស់ មិនត្រឹមតែនាំមកនូវការចងចាំដ៏រស់រវើកនោះទេ ស្នាដៃទាំងនេះក៏ផ្លាស់ប្ដូរការគិត និងការទទួលយកអត្តសញ្ញាណរបស់លោក ហ្សង់សៀន គីន ជាអ្នកកែសម្រួលសៀវភៅ «វ៉ាន់ ណាត» ផងដែរ។
ជាជនភៀសខ្លួនទៅប្រទេសបារាំង តាំងពីក្មេងរហូតដល់ធំពេញវ័យ លោក ហ្សង់សៀន តែងប្រឈមការចម្រូងចម្រាសនៃអត្តសញ្ញាណរបស់លោកជាជនជាតិបារាំងសុទ្ធ។ ក្នុងការចងចាំពីកុមារភាព លោកតែងខ្មាសគេ ដែលឪពុកម្ដាយជាជនភៀសខ្លួនរមែងត្រូវការជំនួយពីអ្នកជិតខាងពីព្រោះពួកគាត់មិនចេះអានភាសាបារាំង។
លោក ហ្សង់សៀន ប្រាប់ ភ្នំពេញ ប៉ុស្តិ៍ថា៖ «ពេលខ្ញុំសួរឪពុកម្ដាយខ្ញុំពីអតីតកាល គាត់តែងតែពិបាកក្នុងការនិយាយ។ ខ្ញុំក៏សម្រេចចិត្តស្រាវជ្រាវមើលដោយខ្លួនឯងតាមអ៊ីនធឺណិត និងបានប្រទះឃើញស្នាដៃរបស់លោក វ៉ាន់ ណាត គឺរូបគំនូរ បុរសជាទាហានខ្មែរក្រហម ២ នាក់ កំពុងលែងអ្នកទោសម្នាក់ ដោយចងដៃ ចងជើង ដូចជាសត្វធាតុ»។
លោកបានបន្តថា៖ «រូបនេះពិតជាប៉ះពាល់ចិត្តខ្ញុំមែនទែន។ ដូច្នេះ ពេលខ្ញុំបានដឹងពីប្រវត្តិឈឺចាប់របស់ឪពុកម្ដាយខ្ញុំ វាបានផ្លាស់ប្ដូរការគិត ការវិនិច្ឆ័យ និងការប្រើជីវិតរបស់ខ្ញុំ។ ខ្ញុំចាប់ផ្ដើមទទួលយកអត្តសញ្ញាណរបស់ខ្លួន និងមានមោទនភាព ដែលខ្ញុំបានទទួលការចិញ្ចឹមមើលថែពីលោកទាំង ២ មកទល់ពេលនេះ»។
ជាសាក្សីផ្ទាល់ និងជាវិចិត្រករផង របៀបដែលលោក វ៉ាន់ ណាត បកស្រាយរឿងរ៉ាវរបបអាវខ្មៅក្នុងរូបគំនូរហាក់មានភាពពិសេស និងដូចជាគ្មានកំហឹង។ ស្នាដៃគំនូររបស់លោកបានបង្ហាញទាំង បទពិសោធផ្ទាល់ខ្លួន ទុក្ខលំបាក ការឈឺចាប់ ភាពស្មោះត្រង់ និងអាចឱ្យមនុស្សគ្រប់គ្នាទទួលដឹងអារម្មណ៍នេះបាន។
លោក ហ្សង់សៀន ថា អ្នកដែលពិតជាទទួលដឹងពីការឈឺចាប់ ដែលស៊ូទ្រាំពីសង្គ្រាមដោយជនរងគ្រោះ ប្រាកដជាចង់បានសន្តិភាព និងព្យាយាមធ្វើគ្រប់វិធី ដើម្បីកុំឱ្យវាកើតឡើងម្ដងទៀត។ នេះគឺជាគោលបំណង ដែលសៀវភៅ «វ៉ាន់ ណាត» ត្រូវបានបង្កើតឡើង។
យុវជនខ្មែរ-បារាំងរូបនេះបានជួប លោក វ៉ាន់ ណាត ក្នុងឆ្នាំ ២០០៦ នៅប្រទេសបារាំង និងក្រោយមក ឆ្នាំ ២០០៨ នៅពេលដែលលោកបានមកប្រទេសកម្ពុជាជាលើកទី១។
លោករំឭកថា៖ «ក្នុងឆ្នាំ ២០០៩ លោកអ៊ំ វ៉ាន់ណាត បានប្រាប់ថា មានបំណងបោះពុម្ពសៀវភៅជាអាល់ប៊ុមស្នាដៃរបស់លោក ហើយខ្ញុំក៏ស្ម័គ្រចិត្តជួយព្រោះខ្ញុំជាអ្នករចនាក្រាហ្វិកស្រាប់ ប៉ុន្តែជាអកុសលគាត់បានស្លាប់មុនក្នុងឆ្នាំ ២០១១»។
ទោះជាយ៉ាងណា លោក ហ្សង់សៀន មិនបោះបង់កិច្ចការនេះទេ។ លោក និងមិត្តភក្តិបាននាំគ្នាចំណាយពេលប្រមូលផ្ដុំស្នាដៃលោក វ៉ាន់ ណាត ពីម្ចាស់រូបនៅបណ្ដាប្រទេសជាច្រើន ដោយមានអ្នកចូលរួមកិច្ចការនេះ ១២ នាក់ និងប្រើពេល ១២ ឆ្នាំកន្លះ។
សៀវភៅជាភាសាខ្មែរ និងអង់គ្លេស នេះមានគោលបំណងឆ្លុះបញ្ចាំងពីគន្លងសិល្បៈដ៏ទូលំទូលាយរបស់ វ៉ាន់ ណាត។ អ្វីដែលគួរឱ្យកត់សម្គាល់ នៃការងារលោកគឺការតស៊ូដើម្បីការចងចាំរបស់ជនរងគ្រោះក្នុងរបបខ្មែរក្រហម ដើម្បីឱ្យសំឡេងពួកគាត់បានឮ និងមានន័យលើសពីការបាត់បង់ជីវិត។
ប្រធានកម្មវិធីវិចិត្រសាល សិល្បៈត្រជាក់ភ្នែក (STP) លោក យាន រស្មី បានរៀន និងស្គាល់លោក វ៉ាន់ ណាត ក្នុងឆ្នាំ ២០១១ ពេលលោកនៅអង្គការហ្វារពន្លឺសិល្បៈ មុននឹងវិចិត្រកររូបនេះចែកឋានយ៉ាងសោកសៅ។
លោករៀបរាប់ថា៖ «ពេលខ្ញុំបានជួបគាត់ រូបភាព គឺផ្លាស់ប្ដូរដោយសារខ្ញុំឃើញការងារគាត់ ២។ ១ គឺ ឌុចអង្គុយជុំវិញក្បាលខ្មោច ហើយមាន ១ តាំងនៅក្នុងវិចិត្រសាល ខ្ញុំសប្បាយចិត្តដែលក្រុមគ្រួសារលោកអ៊ំ វ៉ាន់ ណាត អនុញ្ញាតឱ្យយើងបង្ហាញស្នាដៃគាត់ ដែលជាការងារគាត់ព្យាយាមនិយាយទាក់ទងអំពីការចងចាំ ប្រវត្តិសាស្ត្ររបស់សិល្បៈ។ គាត់ជាបុគ្គល ១ សំខាន់ក្នុងប្រវត្តិសាស្ត្រខ្មែរ ក៏ដូចជាប្រវត្តិសាស្ត្រសិល្បៈ»។
ក្នុងពិធីសម្ពោធសៀវភៅ លោក វ៉ាន់ ចាន់ណារ៉ុង កូនប្រុសពៅរបស់វិចិត្រករ វ៉ាន់ ណាត ឱ្យដឹងថា លោកសប្បាយចិត្ត ពេលបានឃើញកម្រងស្នាដៃជាច្រើនឆ្នាំពីលោកឪពុកត្រូវបានបោះពុម្ពបង្ហាញក្មេងជំនាន់ក្រោយ។
លោក ចាន់ណារ៉ុង អ្នករចនាក្រាហ្វិក និងជាអ្នកថតរូបនៅមជ្ឈមណ្ឌលបុប្ផាណាថា៖ «ខ្ញុំក៏ចង់អរគុណដល់គ្រប់គ្នា ដែលធ្វើឱ្យសៀវភៅនេះកើតឡើង ហើយក៏ពិតជារីករាយដែលគ្រប់គ្នាគាំទ្រ និងនៅតែបន្តកោតសរសើរស្នាដៃឪពុករបស់ខ្ញុំ»។
សៀវភៅមានលក់នៅវិចិត្រសាលសិល្បៈត្រជាក់ភ្នែក Vann Nath Art Gallery វិចិត្រសាលនៃគម្រោងសិល្បៈ ស.ស និង ពិចិត្រ ជាហាងរចនា និងវិចិត្រសាលនៃគំនិតច្នៃប្រឌិត។
លោក ហ្សង់សៀន បន្ថែមថា៖ «យើងជឿថា យ៉ាងហោចក៏នៅមាន ១០០ ស្នាដៃទៀត ដែលយើងមិនទាន់អាចកំណត់អត្តសញ្ញាណម្ចាស់គំនូរនៅឡើយ ដូច្នេះយើងសង្ឃឹមថា សៀវភៅនេះនឹងរកឃើញផ្លូវចូលទៅក្នុងដៃរបស់ម្ចាស់គំនូរ ដែលយើងមិនទាន់ស្គាល់។ សង្ឃឹមថា យើងនឹងអាចចេញការបោះពុម្ពលើកទី២ ក្នុងរយៈពេលប៉ុន្មានឆ្នាំទៀតជាមួយស្នាដៃសិល្បៈរបស់លោកអ៊ំ វ៉ាន់ ណាត បន្ថែម»។
ព័ត៌មានបន្ថែមពីសៀវភៅ «វ៉ាន់ ណាត» សូមទៅកាន់ទំព័រហ្វេសប៊ុក STPCambodia៕
វីដេអូ៖