.jpg)
ពីឡុតវ័យ ១៦ ឆ្នាំកាន់តុក្កតាខ្លាឃ្មុំ មុនបើកយន្តហោះជុំវិញពិភពលោក។ រូបថត AFP
ក្រុងសូហ្វីយ៉ា: ពីឡុតជំទង់ម្នាក់បានវិលកង់ត្រដាងស្លាបចេញដំណើរកាលពីថ្ងៃពុធសប្ដាហ៍កន្លងទៅ ជាមួយនឹងការតាំងចិត្ដបង្កើតសមិទ្ធផលល្អប្រសើរជាងបងស្រី ដែលបានជាប់កំណត់ត្រាជាអ្នកពនេចរហោះហើរដ៏អង់អាចជុំវិញពិភពលោកតែម្នាក់ឯងក្នុងវ័យដ៏ក្មេងខ្ចីបំផុត។
បងស្រីរបស់អ្នកបើកយន្តហោះ ប្រុសវ័យជំទង់ឈ្មោះ ម៉េក រ៉ាត់ធើហ្វដ គឺកញ្ញា ហ្សារ៉ា អាយុ ១៩ ឆ្នាំ ទើបតែបានក្លាយជានារីក្មេងបំផុតដែលបញ្ចប់បេសកកម្មហោះហើរជុំវិញពិភពលោកតែម្នាក់ឯងកាលពីខែមករា ឆ្នាំ ២០២២។
នាងបានឡើងជិះយន្ដតូចបរលើអាកាសដោយបញ្ចប់បេសកកម្មឆ្លងកាត់ប្រមាណ ៥២ ប្រទេស និង ៥ ទ្វីបជុំវិញពិភពលោក។
យុវតីកូនកាត់អង់គ្លេស-បែលហ្ស៊ិក វ័យ ១៩ ឆ្នាំ មានក្ដីសុបិនថ្ងៃណាមួយក្លាយជាអវកាសយានិក តែពេលនេះគោលបំណងចម្បងរបស់នាងចង់ក្លាយជានារីផ្សងព្រេងលើវេហាស៍តែម្នាក់ឯងដ៏ក្មេងបំផុត។
ដំណើររយៈពេល ៣ ខែ របស់យុវតីរូបនេះ នឹងផ្សងព្រេងនៅលើមហាសមុទ្រ វាលខ្សាច់ និងវាលទឹកកកស៊ីបេរី។ ពេលនេះកញ្ញាស្ថិតក្នុងទីក្រុង រ៉ាដូមៀ ប្រទេសប៊ុលហ្គារី ដើម្បីជូនដំណើរប្អូនប្រុសអាយុ ១៦ ឆ្នាំ ដែលចាប់ផ្ដើមហោះហើរជាមួយតុក្កតាខ្លាឃ្មុំធេដឌីរបស់ខ្លួន។
ក្រុមគ្រួសារកូនកាត់អង់គ្លេស-ប៊ុលហ្គារី ដ៏លេចធ្លោមួយនេះ បានបង្កើតប្រវត្ដិសាស្ដ្រជាអ្នកហោះហើរ ៤ ជំនាន់ ហើយពីឡុតក្មេង ម៉េក បានភ្លក់រសជាតិការបើកបរយន្ដហោះតាំងពីខ្លួនអាយុ
៧ ឆ្នាំម្ល៉េះ។
អ្នកចូលរួមអបអរសាទរជូនដំណើរពីឡុតវ័យក្មេងបំផុត ម៉េក រ៉ាត់ធើហ្វដ។ រូបថត AFP
ក្នុងដៃឱបតុក្កតាខ្លាឃ្មុំ ម៉េក បានប្រាប់អ្នកសារព័ត៌មានមុនពេលចេញដំណើរថា៖ «មិនចាំបាច់តែគ្រប់អាយុ ១៨ ឆ្នាំនោះទេ ក្នុងការសម្រចអ្វីមួយពិសេសសម្រាប់ខ្លួនឯង»។
ខណៈយុវជន ហ្សារ៉ា ចំណាយពេល ៥ ខែ ហោះហើរជុំវិញពិភពលោកព្រោះតែអាកាសធាតុមិនអំណោយផល ពីឡុតប្អូន ម៉េក មានបំណងប្រើពេលពី ២ ទៅ ៣ ខែ ហើយគ្រោងត្រឡប់មកវិញឱ្យទាន់ពេលចូលរៀនដើម្បីប្រឡងយកនិទ្ទេស A។
យុវជន ម៉េក រ៉ាត់ធើហ្វដ រំពឹងថា នឹងបំបែកកំណត់ត្រា ដែលគ្រងដោយយុវជនចក្រភពអង់គ្លេសអាយុ ១៨ ឆ្នាំ ត្រាវីស លូដឡូ ដែលបានបញ្ចប់បេសកកម្មហោះហើរតែឯងជុំវិញពិភពលោកកាលពីឆ្នាំមុន។
ជំនួសឱ្យការហោះហើរលើប្រទេសរុស្ស៊ី និងអាស៊ីកណ្ដាល យុវជនរូបនេះនឹងធ្វើដំណើរតាមគោលចរភាគខាងត្បូង ទៅកាន់ភាគខាងកើតតាមរយៈប្រទេសប៉ាគីស្ថាន ឥណ្ឌា ចិន កូរ៉េខាងត្បូង ជប៉ុន និងបន្ទាប់មក ឆ្ពោះទៅត្រង់សហរដ្ឋអាមេរិក។
ពីឡុត ម៉េក បាននិយាយថា ឧបសគ្គធំបំផុត គឺដំណើរដ៏វែងឆ្ងាយឆ្លងកាត់មហាសមុទ្រ។ ប៉ុន្ដែក្មេងជំទង់រូបនេះបាននិយាយថា រូបគេមានក្ដីរំភើបរីករាយបំផុតក្នុងការហោះហើរលើសមុទ្រខ្សាច់សាហារ៉ា និងប្រជុំកោះឋានសួគ៌នានា។
ពីឡុតវ័យ ១៦ ឆ្នាំរូបនេះ សង្ឃឹមថា៖ «នឹងទាក់ទាញចិត្ដមនុស្សច្រើនទៀត ដោយអាចសម្រេចចិត្ដក្ដីសុបិនរបស់ខ្លួន»៕ AFP/HR
