.jpg)
ថ្នាំពន្យារកំណើតបុរសត្រូវបានពិសោធលើកណ្ដុរ ក្រោយពីថ្នាំពន្យារកំណើតស្ត្រីត្រូវបានអនុម័ត ៦០ ឆ្នាំមុន។
ក្រុងវ៉ាស៊ីនតោន: អ្នកវិទ្យាសាស្ដ្រ ១ ក្រុម បានឱ្យដឹងពីសប្ដាហ៍មុនថា ពួកគេបានអភិវឌ្ឍថ្នាំពន្យារកំណើតសម្រាប់បុរស ដែលមានប្រសិទ្ធភាពរហូតដល់ ៩៩ ភាគរយ ចំពោះសត្វកណ្ដុរ និងមិនបង្កបញ្ហាប៉ះពាល់ ហើយគ្រោងនឹងបន្ដយកឱសថនេះមកប្រើប្រាស់លើមនុស្សនៅដំណាច់ឆ្នាំនេះ។
លទ្ធផលការសិក្សានឹងត្រូវបានបង្ហាញនៅជំនួបនិទាឃរដូវរបស់អង្គការសង្គមគីមីវិទ្យាអាមេរិក និងកំណត់ជាជំហានគន្លឹះក្នុងការពង្រីកវិសាលភាពជម្រើសនៃការពន្យារកំណើត ក៏ដូចជាការទទួលខុសត្រូវពីបុរស។
តាំងពីថ្នាំគ្រាប់ពន្យារកំណើតសម្រាប់ស្ដ្រីត្រូវបានអនុម័តឱ្យប្រើប្រាស់ជាលើកដំបូងក្នុងទសវត្សរ៍ឆ្នាំ ១៩៦០ ក្រុមអ្នកស្រាវជ្រាវបានព្យាយាមរិះរកថ្នាំគ្រាប់សម្រាប់បុរសវិញម្ដង។ នេះបើយោងតាមវេជ្ជបណ្ឌិតឱសថសាស្ដ្រ អាប់ឌុលឡា អាល់ ណូមេន ជានិស្សិតបញ្ចប់ការសិក្សានៅសាកលវិទ្យាល័យ មីនណេស៊ូតា ដែលនឹងធ្វើបទបង្ហាញការងារនេះ។
លោកបាននិយាយថា៖ «ការសិក្សាជាច្រើនបានបង្ហាញថា បុរសចាប់អារម្មណ៍ចង់ចែករំលែកការទទួលខុសត្រូវចំពោះការពន្យារកំណើតជាមួយដៃគូ។
តែរហូតទល់ពេលនេះ មានតែជម្រើស ២ ប៉ុណ្ណោះនោះគឺ ស្រោមអនាម័យ និងការចងមេជីវិត»។
ដើម្បីអភិវឌ្ឍឱសថដោយមិនប្រើអ័រម៉ូន លោក ណូមេន ដែលធ្វើការក្នុងមន្ទីរពិសោធន៍អ្នកស្រីសាស្ដ្រាចារ្យ Gunda Georg ផ្ដោតលើប្រូតេអ៊ីន ហៅថា «retinoic acid receptor (RAR) alpha»។
សារធាតុគីមីនោះ ត្រូវបានស្គាល់ជា YCT529 ដែលកាត់បន្ថយចំនួនមេជីវិតបុរស និងមានប្រសិទ្ធភាពទប់ស្កាត់ការបង្កកំណើត ៩៩ ភាគរយក្នុងដំណាក់កាលបង្កាត់ពូជ។
ថ្នាំពន្យារកំណើតបុរសមានប្រសិទ្ធភាពខ្ពស់លើសត្វកណ្ដុរ។ រូបថត AFP
ក្រុមអ្នកស្រាវជ្រាវបានតាមដានលើទម្ងន់ របបអាហារ និងសកម្មភាពទូទៅ ដោយមិនបានរកឃើញផលប៉ះពាល់អវិជ្ជមានអ្វីឡើយ បើទោះបីជាសត្វកណ្ដុរពិសោធន៍មិនអាចរាយការណ៍ពីបញ្ហាគួបផ្សំ ដូចជា ឈឺក្បាល ឬអារម្មណ៍មួម៉ៅជាដើម។
ក្រោយរយៈពេលពី ៤ ទៅ ៦ សប្ដាហ៍ ពួកវាឈប់ផឹកឱសថពន្យារកំណើត កណ្ដុរដែលប្រើថ្នាំរួច នឹងអាចបង្កើតឥទ្ធិពលមេជីវិត ហើយមានសមត្ថភាពអាចបង្កកំណើតមានកូនសាជាថ្មីឡើងវិញ។
ក្រុមការងារដែលទទួលបានមូលនិធិពីវិទ្យាស្ថានជាតិសុខភាព និង Male Contraceptive Initiative នេះបានធ្វើការជាមួយក្រុមហ៊ុនឈ្មោះ «YourChoice Therapeutics» ក្នុងការពិសោធទៅលើមនុស្សនៅត្រីមាសទី៣ ឬទី៤ នៃឆ្នាំ ២០២២។
ជាមួយគម្រោងឱសថដែលទំនងដាក់លក់នៅរយៈពេល ៥ ឆ្នាំខាងមុខ ឬឆាប់ជាងនេះ អ្នកស្រីបានបន្ដថា៖ «ខ្ញុំមានសុទិដ្ឋិនិយមថា វានឹងឆាប់កើតចេញជាសមិទ្ធផល»។
សំណួរចម្រូងចម្រាសអំពីអនាគតគឺថា តើបុរសព្រមប្រើថ្នាំពន្យារកំណើតរបស់ខ្លួនដែរទេ និងតើនារីៗទុកចិត្ដបុរសដែរ ឬយ៉ាងណា៕ AFP/HR
