ក្រុងសៀងហៃ: ពេលពលរដ្ឋក្រុងសៀងហៃ ជាច្រើនសម្ងំនៅក្នុងផ្ទះដោយសាររោគរាតត្បាតកូវីដ ១៩ ទិដ្ឋភាពស៊ាំភ្នែកជាងគេនៅតាមដងផ្លូវ គឺក្រុមម៉ូតូដឹកចំណីអាហារ។
នៅពេលទីក្រុងដែលមានប្រជាជន ២៥ លាននាក់ កំពុងត្រៀមខ្លួនទទួលយកនូវស្ថានភាពលំបាក ក្រុមហ៊ុន Dingdong Maicai បានបង្កើនការជួលបុគ្គលិក ៣០០ នាក់បន្ថែមនៅទូទាំងទីក្រុងនាពេលថ្មីៗនេះ ដោយអ្នកខ្លះជាបុគ្គលិកដើរទាត់ខ្យល់ដោយសារភោជនីយដ្ឋានត្រូវបិទទ្វារ។
ទ័ពម៉ូតូដឹកជញ្ជូនរបស់ចិនត្រូវបានចាត់ទុកជាក្រុមវរជនជាតិកាលពី ២ ឆ្នាំមុន នៅពេលពួកគេបានជួយបំពេញភាពស្រេកឃ្លានមនុស្សរាប់លាននាក់ដោយសារការបិទខ្ទប់ ពេលវីរុសចាប់ផ្ដើមរីករាលដាលដំបូង។
មេរៀនពីឆ្នាំ ២០២០ ជួយក្រុមហ៊ុនដឹកជញ្ជូនអាហារឈរលំដាប់កំពូលអំឡុងពេលជួបវិបត្ដិសុខភាពនេះ។
លោក ហ្សាង យ៉ាងយ៉ាង ជានាយកគ្រប់គ្រងផ្នែកចែកចាយ Dingdong ដ៏មមាញឹក បាននិយាយថា៖ «យើងមានដៃដែក។ ថាមិនត្រូវ យើងប្រឈមនឹងភ្លើងសិប្បនិម្មិតឬយ៉ាងណា? យើងត្រូវ
មានប្រតិកម្មឆាប់រហ័ស។ ខ្ញុំអត់មានថ្ងៃសម្រាកចុងសប្ដាហ៍នោះទេ»។
ចិនមានសេវាកម្មដឹកជញ្ជូនអាហារ ធំ និងទំនើបបំផុតក្នុងពិភពលោក ជាមួយកម្មវិធីទូរស័ព្ទដ៏ពេញនិយមជាច្រើនអនុញ្ញាតឱ្យអ្នកប្រើប្រាស់ចុចកុម្ម៉ង់អាហារពីភោជនីយដ្ឋាននានា ឬតូបអាហារចម្ងាយរាប់សិបគីឡូម៉ែត្រ ដោយកម្មវិធីទូរស័ព្ទបានបង្ហាញកម្ដៅក្នុងខ្លួនអ្នកដឹកជញ្ជូនថែមទៀត។
អ្នកដឹកម្ហូបបាន និងកំពុងដឹកជញ្ជូនរហូតដល់ ១០០ ជើងក្នុង ១ ថ្ងៃ ដែលរមែងដាក់ទំនិញនៅមុខទ្វារផ្ទះអតិថិជន ដើម្បីបញ្ចៀសការជួបគ្នាផ្ទាល់។
លោក លី យ៉ាវូ ជាប់ដៃបំពេញការងាររហូតដល់ ១៥ ម៉ោង ក្នុង ១ ថ្ងៃ។
លោកបានបន្ដថា៖ «ដំបូងខ្ញុំភ័យខ្លាចដែរ តែនៅពេលដឹកជញ្ជូនដល់ដៃភ្ញៀវ និងឃើញក្រសែភ្នែកអរគុណរបស់ពួកគេ ខ្ញុំលែងមានអារម្មណ៍បារម្ភអីទៀតហើយ»៕ AFP/HR